Sīpinga Tuʻuaki
Ke Kamata ha Ako Tohi Tapu ʻi he ʻUluaki Tokonakí ʻi Siulai
“Meimei ko e tokotaha kotoa pē ʻoku mau talanoa mo ia ʻoku nau loto ke sio ʻoku melino ʻa māmani. Neongo ia ʻoku kei fai pē taú. ʻOkú ke fakakaukau ko e hā ʻoku maʻungataʻa ai ʻa e melinó he māmaní?” Tuku ke ne tali. Pea fakahaaʻi leva ʻa e peesi 15 ʻo e Taua Leʻo ʻo Siulai-ʻAokosi pea lāulea fakataha ki he fakamatala ʻi lalo ʻi he ʻuluaki fehuʻí pea mo ha konga Tohi Tapu ʻe taha mei he ngaahi konga tohi ʻoku haá. Tuʻuaki ʻa e makasiní pea fokotuʻutuʻu ke toe foki ʻo lāulea ki he fehuʻi hono hokó.
Fakatokangaʻi: Ko e tuʻuaki ko ení ʻoku totonu ke fokotuʻutuʻu ke fai hano fakahāhaaʻi lolotonga e fakataha ki he ngāue fakamalanga ʻi Siulai 6.
Ko e Taua Leʻo Siulai-ʻAokosi
“ʻOku mau saiʻia ke ʻilo ki he anga hoʻo fakakaukau ki he lea ko ení [Lau ʻa e 1 Sione 4:8.] ʻOku loto-tatau ʻa e tokolahi ki he ngaahi leá ni, ka ʻoku fakakaukau ʻa e niʻihi ia ʻoku anga-fakamamahi ʻa e ʻOtuá ʻi hono fakatupunga, pe naʻa mo hono fakaʻatā ʻa e ngaahi fakatamaki fakanatulá. Ko e hā hoʻo fakakaukaú? [Tuku ke ne tali.] ʻOku fakamatala ʻa e makasini ko ení ki he ngaahi ʻuhinga lelei ʻoku ʻikai totonu ai ke tau fakamaauhalaʻi ʻa e ʻOtuá ʻoku anga-fakamamahi.”
Ko e Taua Leʻo Siulai-ʻAokosi
“Ko e meʻa ʻe taha ʻoku tau faitatau aí he ʻoku ʻi ai ʻetau ngaahi fehālaaki. ʻOkú ke fifili ʻi ha taimi pe ʻe lava ke fakamolemoleʻi ʻe he ʻOtuá naʻa mo e ngaahi tōʻonga fakalilifú?” [Tuku ke ne tali.] Lau ʻa e ʻAisea 1:18 pea fakahaaʻi ʻa e kupu ʻi he peesi 11 ʻo e Taua Leʻo ʻo Siulai-ʻAokosi. “ʻOku tokoniʻi kitautolu ʻi he kupu ko ení ke mahinoʻi ʻa e founga fakamolemole ʻa e ʻOtuá naʻa mo e ngaahi angahala mamafá kapau ʻoku tau maʻu ʻa e fakakaukau fakatomalá.”
Ongoongo Lelei mei he ʻOtuá!
“ʻOku mau ʻaʻahi mai ki he ngaahi fāmili ʻi homou kauhalá ke vahevahe atu ha fakalototoʻa mei he Tohi Tapú. Ko e tokolahi naʻa mau talanoa mo iá ʻoku nau fifili ki he ʻuhinga ʻoku fakaʻatā ai ʻe ha ʻOtua ʻofa ʻa e faingataʻa lahi ʻi he māmaní. ʻOkú ke fakakaukau ko e faingataʻá ko e konga ia ʻo e ʻuluaki taumuʻa ʻa e ʻOtuá ki he māmaní?” Tuku ke ne tali. Huke leva ki he lēsoni 5 pea lau mo lāulea ki he ʻuluaki ongo palakalafí pea mo e ngaahi konga Tohi Tapu ʻoku tohiʻi fakaheiheí. Tuku ʻa e polosiuá, pea fokotuʻutuʻu ke toe foki ʻo lāulea ki he fehuʻi hoko ʻoku tohiʻi ʻuliʻuli matolú.