Sio ki he Kau Palōfitá ko ha Sīpinga—Sēfanaia
1. Naʻe fēfē taimi naʻe ngāue ai ʻa Sēfanaia ko ha palōfitá pea ʻoku anga-fēfē ʻene hoko ko e faʻifaʻitakiʻanga lelei kiate kitautolu ʻi he ʻaho ní?
1 ʻI he vaeuaʻanga ʻo e senituli hono fitu K.M., naʻe failahia ai ʻa e lotu Pēalí ʻi Siuta. Naʻe toki fakapoongi ai ʻa e tuʻi kovi ko ʻĀmoní, pea ʻi he taimi ko ení naʻe pule kei siʻi ai ʻa Tuʻi Siosaiá. (2 Kal. 33:21–34:1) ʻI he lolotonga ʻo e taimi ko iá, naʻe fokotuʻu ai ʻe Sihova ʻa Sēfanaia ke talaki ʻEne pōpoaki fakaefakamāú. Neongo naʻe hoko nai ʻa Sēfanaia ko ha mēmipa ʻi he fale ʻo e tuʻi ʻo Siutá, naʻe ʻikai ke ne fakavaivaiʻi ʻa e pōpoaki ʻa Sihová ki hono fakahalaiaʻi ʻo e kau taki ʻo Siutá. (Sēf. 1:1; 3:1-4) ʻI he tuʻunga meimei tatau, ʻoku tau feinga ke faʻifaʻitaki ki he loto-toʻa ʻa Sēfanaiá pea fakaʻehiʻehi mei hono fakaʻatā ʻa e ngaahi haʻi fakafāmilí ke ne uesia ʻetau lotu kia Sihová. (Māt. 10:34-37) Ko e hā ʻa e pōpoaki naʻe talaki ʻe Sēfanaiá pea ko e hā hono ngaahi olá?
2. Ko e hā ʻa e ngāue kuo pau ke tau fai kae lava ke fufū kitautolu ʻi he ʻaho ʻo e houhau ʻo Sihová?
2 Kumi kia Sihova: Ko Sihova pē ʻe lava ke ne fakahaofi ha taha ʻi he ʻaho hono houhaú. Ko ia ai, naʻe kōlenga ʻa Sēfanaia ki he kakai ʻo Siutá ke nau kumi kia Sihova, kumi ki he māʻoniʻoní mo kumi ki he anga-maluú ʻi he lolotonga ʻo e kiʻi taimi ʻoku toé. (Sēf. 2:2, 3, PM) ʻOku tatau pē mo hotau ʻahó ni. ʻI he hangē ko Sēfanaiá, ʻoku tau fakalototoʻaʻi ʻa e niʻihi kehé ke kumi kia Sihova, pea kuo pau foki ke tau fai ha ngāue mo fakapapauʻi ke ʻoua ʻaupito ʻe ‘tafoki mei he kumi kia Jihová.’ (Sēf. 1:6, PM) ʻI hono kehé ʻoku tau kumi kia Sihova ʻaki hono ako fakamātoato ʻene Folofolá pea lotu ki heʻene tatakí. ʻOku tau kumi ki he māʻoniʻoní ʻaki ʻetau moʻui ʻulungaanga maʻa. ʻOku tau kumi ki he anga-maluú ʻaki ʻetau fakatupulekina ha fakakaukau moʻulaloa pea mateuteu ke tali ʻa e tataki mei he kautaha ʻa Sihová.
3. Ko e hā ʻoku totonu ai ke tau tauhi maʻu ha fakakaukau pau ʻi he ngāue fakafaifekaú?
3 Ngaahi Ola Lelei: Naʻe maongo ʻa e pōpoaki fakaefakamaau ʻa Sefanaiá ki he loto ʻo e niʻihi tokosiʻi ʻi Siuta kae tautefito ki he kiʻi talavou ko Siosaiá ʻa ia naʻá ne kamata ke kumi kia Sihova lolotonga ʻene kei siʻí. Naʻe fakahoko ʻe Siosaia ʻa e feingangāue mālohi ke fakafepakiʻi ʻa e tauhi ʻaitoli ʻi he fonuá. (2 Kal. 34:2-5) ʻI he ʻahó ni, neongo ko e tenga ʻo e Puleʻangá ʻoku ngangana ʻi he veʻehalá, ʻi he lau maká, pe ʻi he lotolotonga ʻo e ngaahi ʻakau talatalá, ko e niʻihi ʻoku toe tūtuuʻi ʻi he kelekele leleí pea ʻoku fakatupu mai ai ʻa e fua. (Māt. 13:18-23) ʻOku tau falala-pau ʻe hokohoko atu ʻe Sihova ke tāpuakiʻi ʻetau ngaahi feingá ʻi heʻetau nofoʻaki femoʻuekina ʻi hono tūtuuʻi ʻa e tenga ʻo e Puleʻangá.—Saame 126:6.
4. Ko e hā ʻoku totonu ai ke tau ‘hanganaki tatali kia Sihová’?
4 Naʻe fakakaukau ʻa e niʻihi ʻi Siuta heʻikai ʻaupito ke fai ʻe Sihova ha meʻa. Kae kehe, naʻe fakapapauʻi ʻe Sihova kiate kinautolu kotoa ʻoku ofi hono ʻaho lahí. (Sēf. 1:12, 14) Ko e fakamoʻuí ʻoku maʻu pē ia ʻe he faʻahinga ʻoku nau kumi hūfanga kiate iá. (Sēf. 3:12, 17) ʻI heʻetau ‘hanganaki tatali kia Sihová,’ ʻofa ke tau maʻu ʻa e fiefia ʻi heʻetau ngāue fāʻūtaha mo e kaungālotú ki hotau ʻOtua lahí!—Sēf. 3:8, 9.