Ako mei he Kau Malanga Taukei Angé

ʻOku tau fakamahuʻingaʻi lahi ʻa e kau malanga taukei ʻi he fakatahaʻangá. Ko e niʻihi kuo nau tauhi faitōnunga kia Sihova ʻi he ngaahi taʻu lahi. Ko e niʻihi kehe kuo nau maʻu ʻa e ngaahi pōtoʻi ʻi he ngāue fakafaifekaú ki muí ni mai. Ko e kau malanga ko ení kuo nau sio ki he anga hono tataki ʻe Sīsū ʻa e fakatahaʻanga Kalisitiané ʻi he ngaahi ʻaho fakaʻosí ʻaki hono fakalahi ʻa e ngāue fakamalangá mo e ngāue ngaohi ākongá. (Māt. 28:19, 20) ʻI he kau ʻi he ngāue fakafaifekaú, kuo nau maʻu “ʻa e mālohi ʻoku mahulu atu ia ʻi he tuʻunga anga-mahení” ke fekuki ai mo e ngaahi pole fakafoʻituitui mo e ngaahi ʻahiʻahi. (2 Kol. 4:7) ʻOku lahi ʻa e meʻa ke ako mei he kau malanga taukei ko ení. ʻI heʻenau maʻu ha faingamālie, ʻoku nau fiefia ke akoʻi ki he niʻihi kehé ʻa e meʻa kuo nau akó. (Saame 71:18) Ko ia, ʻoku totonu ke tau ʻai ha faingamālie ke ako meiate kinautolu. ʻE lava fēfē ke fai ení?

ʻI he Ngāue Fakafaifekau. Ke hoko ʻo ola lelei ʻi he ngāue fakafaifekaú, ko e kau malanga foʻou pe ʻikai loko taukeí ʻoku fiemaʻu ke akoʻi. ʻE lava ke ako ha meʻa lahi ʻaki ʻa e tokanga ki he founga ʻoku fakahoko ai ʻe he kau malanga taukeí ʻenau ngāue fakafaifekaú. (Sio ki he kupu ʻi he Taua Leʻo Fepueli 15, 2015, “Tauhi Maʻu Hoʻo Faivelenga ʻi he Ngāue Fakafaifekaú,” palakalafi tolu ʻi he kaveinga tokoni “Tokoniʻi ʻa e Kau Malanga Foʻoú.”) Kuo anga-fēfē hoʻo maʻu ʻaonga mei he ngāue mo e faʻahinga ko iá ʻi he ngāue fakafaifekaú?

ʻE lava ke ke fakaafeʻi ha tokotaha malanga taau ke ke ngāue mo ia ʻi he ngāue fakafaifekaú? Kapau ʻoku vaivai ʻa e tokotaha malangá, mahalo ʻe lava ke ke fakahoko ha taha hoʻo ngaahi ako Tohi Tapú ʻi hono ʻapí. Hili ʻa e akó, kole ki he tokotaha malangá ke ne ʻoatu ha faleʻi ʻaonga.

Fakamoleki ha Taimi mo Kinautolu: ʻAi ke ke ʻiloʻi ʻa e kau malanga taukeí ʻaki hono fakamoleki ha taimi mo kinautolu. Fakaafeʻi ha taha ʻo kinautolu ki hoʻo lotu fakafāmilí pea fakaʻekeʻeke. Kapau ʻoku vaivai ʻa e tokotaha malangá, ʻe lava ke ke fokotuʻutuʻu ke fai ʻa e lotu fakafāmilí ʻi hono ʻapí? ʻEke ʻa e founga naʻá ne haʻu ai ki he moʻoní. Ko e hā e ngaahi tāpuaki kuó ne maʻú? Ko e hā ʻa e tupu fakalotofonua kuó ne mātaá? Ko e hā ʻa e fiefia kuó ne maʻu ʻi he tauhi kia Sihová?

Hoko ʻo maʻu ʻa e mahino pea mafamafatatau ʻi he meʻa ʻokú ke ʻamanekiná. Hangē pē ko kitautolu kotoá, ko e kau malanga fuoloá ʻoku nau maʻu ʻa e ngaahi meʻaʻofa kehekehe ʻi he ngāue fakafaifekaú. (Loma 12:6-8) Ko e niʻihi ʻoku nau hoholo ke motuʻa pea ʻe fakangatangata nai ʻe he meʻá ni ʻa e taimi ʻe lava ke nau fakamoleki mo kitautolú. Kae kehe, ʻe lava ke tau ako ʻa e meʻa lahi meiate kinautolu koeʻuhí ko ʻenau taukei ʻi he tauhi faitōnunga kia Sihová.