Fanongo ki he ʻOtuá—Founga ke Ngāueʻaki Iá

Ko e polosiua Fanongo ki he ʻOtuá naʻe faʻu ia ke akoʻi ʻa e ngaahi moʻoni tefito ʻo e Tohi Tapú ʻaki ʻa e ngaahi tokoni fakaemamatá ki he faʻahinga ʻoku faingataʻa ke nau ako mei ha fakamatala kuo tohi. Ko e lēsoni taki taha ʻoku peesi ʻe ua ʻa ia ʻoku ʻi ai ha ngaahi fakatātā ʻosi teuteuʻi lelei mo ha fakaʻilonga ʻoku tuhu ki he fakatātā hokó ke tataki ʻa e fetalanoaʻakí mei he fakatātā ki he fakatātā.

Ko e polosiua Fanongo ki he ʻOtuá pea Moʻui Taʻengata ʻoku tatau hono ngaahi fakatātaá mo ia ʻi he Fanongo ki he ʻOtuá, ka ʻoku lahi ange ʻa e fakamatala ʻi he Fanongo ki he ʻOtuá pea Moʻui Taʻengata pea ʻoku lava ke ngāueʻaki ia ʻe he kau ako ʻoku nau lava ʻo lautohí. ʻOku faʻa ngāueʻaki ʻe he kau malangá ʻa e tatau ko iá ko e tatau ia ʻa e tokotaha faiakó kae ngāueʻaki ʻe he tokotaha akó ʻa e tatau Fanongo ki he ʻOtuá. Ko e lahi taha ʻo e ngaahi pēsí ʻoku ʻi ai ha puha mo ha fakamatala fakalahi ʻe lava ke fai ha lāulea ki ai, ʻo makatuʻunga ʻi he malava ʻa e tokotaha akó.

ʻE lava ke ke tuʻuaki ʻa e polosiuá ʻi ha faʻahinga taimi pē naʻa mo e māhina ʻoku ʻikai ke tuʻuaki ai iá. ʻI hono fakahoko ha ako Tohi Tapu, ngāueʻaki ʻa e ngaahi fakatātaá ke fakamatalaʻi ʻa e meʻa ʻi he Tohi Tapú. ʻEke ha ngaahi fehuʻi ʻe fakakau ki ai ʻa e tokotaha akó pea fakapapauʻi ʻokú ne mahinoʻi. Lau pea lāulea ki he ngaahi konga Tohi Tapu ʻi lalo ʻi he peesi taki taha. ʻI he ʻosi ʻa e polosiuá, ako ʻa e Ko e Hā ʻOku Akoʻi Moʻoni ʻe he Tohi Tapú? pe What Can the Bible Teach Us? ke tokoniʻi hoʻo ako Tohi Tapú ke fakalakalaka ki he papitaisó.