Fakamahuʻingaʻi Ho Vahaʻangatae mo Sihová

ʻOku maʻu ʻe he Kau Fakamoʻoni ʻa Sihová ha monū makehe. ʻI he tuʻunga ko ha Kalisitiane fakatapui ʻosi papitaisó ʻoku tau hokohoko atu ke fakatupulekina ha vahaʻangatae fekoekoeʻi mo fakafoʻituitui mo e ʻEiki Hau ko Sihová. Kuó Ne tohoakiʻi kitautolu kiate ia fakafou ʻi hono ʻAló. (Sione 6:44) ʻOkú Ne fanongo mai ki heʻetau ngaahi lotú.​—Saame 34:15.

ʻE lava fēfē ke tau maluʻi ʻa hotau vahaʻangatae mahuʻinga mo e ʻOtuá? Ko e meʻa ʻe taha, kuo pau ke tau fakaʻehiʻehi mei he ʻalunga angahalaʻia naʻe fai ʻe he kau ʻIsilelí. Naʻa nau fakahoko ha fuakava makehe mo Sihova. Hili ha taimi siʻi mei ai, naʻa nau ngaohi ha kiʻi pulu koula pea hoko ai ʻo tauhi ʻaitoli. (ʻEki. 32:7, 8; 1 Kol. 10:7, 11, 14) Te tau ʻeke hifo nai: ‘ʻOku anga-fēfē ʻeku fakafeangai ki ha ʻahiʻahi? ʻOku hā mei heʻeku ngaahi ngāué ʻoku ou fakamahuʻingaʻi ʻa hoku vahaʻangatae mo Sihová?’ Ko e ʻofa loloto ki heʻetau Tamai fakahēvani te ne tokoniʻi kitautolu ke tau hola mei ha meʻa ʻokú ne fehiʻa ai.​—Saame 97:10.

SIO ʻI HE VITIŌ MALUʻI HO VAHAʻANGATAE MO SIHOVÁ (KOL. 3:5), PEA TALI LEVA ʻA E NGAAHI FEHUʻI KO ENÍ:

• Ko e hā ʻa e mānumanu?

• Ko e hā ʻoku totonu ai ke tau talitekeʻi ʻa e mānumanú mo e tauhi ʻaitolí?

• ʻOku anga-fēfē felāveʻi ʻa e feʻauakí mo e tauhi ʻaitolí?

• Tautefito ki he faʻahinga ʻoku nau maʻu ʻa e ngaahi fatongia ʻi he fakatahaʻangá, ko e hā ʻoku totonu ai ke nau tokanga ki he ngaahi fiemaʻu ʻa honau hoa malí?