Fakahaaʻi ʻa e ʻOfa ʻi he Fāmilí

Ko e ʻofá ko e kulū ia ʻokú ne haʻi fakataha ʻa e fāmilí. ʻI he ʻikai ha ʻofa, ʻe faingataʻa ki he fāmilí ke hanganaki fāʻūtaha pea loto-lelei ke fengāueʻaki fakataha. ʻE lava fēfē ke fakahāhā ʻe he ngaahi husepānití, uaifí mo e mātuʻá ʻa e ʻofa ʻi he fāmilí?

Ko ha husepāniti anga-ʻofa te ne tokanga ki he ngaahi fiemaʻu hono uaifí, ko ʻene ngaahi fakakaukau mo e ngaahi ongoʻí. (ʻEf. 5:28, 29) Te ne tokangaʻi ʻa e ngaahi fiemaʻu fakamatelie hono fāmilí pea tokoniʻi kinautolu ke ʻunuʻunu ofi kia Sihova, ʻo kau ai hono tauhi maʻu ha efiafi Lotu Fakafāmili tuʻumaʻu. (1 Tīm. 5:8) Ko ha uaifi anga-ʻofa te ne anganofo ki hono husepānití pea fakahāhā kiate ia ʻa e “fakaʻapaʻapa loloto.” (ʻEf. 5:22, 33; 1 Pita 3:1-6) Kuo pau ki ha husepāniti mo ha uaifi ke na loto-lelei ke fefakamolemoleʻaki. (ʻEf. 4:32) Ko ha ongo mātuʻa anga-ʻofa ʻokú na fakahāhā ʻa e mahuʻingaʻia ʻi heʻena fānaú taautaha pea akoʻi kinautolu ke ʻofa kia Sihova. (Teu. 6:6, 7; ʻEf. 6:4) Ko e hā ʻa e ngaahi pole ʻoku fehangahangai mo ʻena fānaú ʻi he ʻapiakó? ʻOku anga-fēfē fekuki ʻa e fānaú mo e tenge mei he toʻumeʻá? ʻI he hulu fau hono fakahāhā ʻa e ʻofá ʻi loto ʻi he fāmilí ʻe ongoʻi malu ai ʻa e tokotaha kotoa.

SIO ʻI HE VITIŌ FAKAHĀHĀ ʻA E ʻOFA HEʻIKAI KAʻANGÁ ʻI HO FĀMILÍ, PEA TALI LEVA ʻA E NGAAHI FEHUʻI KO ENÍ:

• 

  ʻOku anga-fēfē hono tauhi mo fakamahuʻingaʻi ʻe ha husepāniti anga-ʻofa hono uaifí?

• 

  ʻOku anga-fēfē hono fakahāhā ʻe ha uaifi anga-ʻofa ʻa e fakaʻapaʻapa loloto ki hono husepānití?

• 

  ʻOku anga-fēfē hono uhuʻi ʻe ha ongo mātuʻa anga-ʻofa ʻa e Folofola ʻa e ʻOtuá ki heʻena fānaú?