Tāimuʻa

ʻOku tau ngāueʻaki fakapotopoto hotau iví ʻi heʻetau fokotuʻu ʻa e ngaahi taumuʻa fakalaumālié. (1 Kol. 9:26) ʻI heʻetau fokotuʻu ʻa e ngaahi taumuʻá ʻoku tokoniʻi ai kitautolu ke tau ngāue lelei taha ʻaki hotau taimí ki muʻa ke ngata ʻa e fokotuʻutuʻu ko ení. (ʻEf. 5:15, 16) ʻI hoʻo lotu fakafāmilí, fēfē ke ke fokotuʻu ha ngaahi taumuʻa ki he taʻu fakangāue hokó? Ke tokoniʻi koé, ko e polokalama ngāue ko ení ʻoku ʻi ai ʻa e ngaahi kupu ʻoku fekauʻaki mo e ngaahi taumuʻa ʻe lava ke ke fakakaukau faʻa lotu ki ai.​—Sēm. 1:5.

Ko e fakatātaá, ʻi he ngāue fakataha ʻa e fāmilí ʻe lava ke nau tokoniʻi ha toko taha ke hoko ʻo tāimuʻa tuʻumaʻu? Kapau ʻoku ʻikai lava ke ke fakapapauʻi te ke maʻu ʻa e houa ʻoku fiemaʻú talanoa ki ha kau tāimuʻa ʻoku nau ʻi ha tuʻunga meimei tatau mo koe. (Pal. 15:22) Mahalo ʻe lava ke ke fakaʻekeʻeke ha tāimuʻa lolotonga hoʻo lotu fakafāmilí pea hiki leva ha taimi-tēpile ʻe malava ke ke aʻusia. Kapau naʻá ke tāimuʻa ʻi he kuohilí, fakakaukau ki ho tuʻungá pe ʻe lava ke ke toe foki ʻo tāimuʻa.

ʻE lava ke tāimuʻa ha taha ʻi ho fāmilí ʻi ha māhina ʻe taha pe lahi ange? Kapau ʻoku fakangatangata ho iví ʻe malava ke ke tāimuʻa tokoni ʻaki hoʻo kau ki he ngāue fakamalangá ʻi he ʻaho taki taha ʻi ha taimi nounou. Kapau ʻoku fakangatangata hoʻo kau ki he ngāue fakamalangá lolotonga ʻa e uiké, koeʻuhi ʻokú ke ngāue pe ako, mahalo te ke fili ha māhina ʻoku ʻi ai ha ʻaho mālōlō pe fakaʻosinga uike ʻe nima. ʻI he tohi māhiná, hikiʻi ai ʻa e taimi ʻokú ke loto ke tāimuʻa tokoni aí pea fokotuʻu ha taimi-tēpile.​—Pal. 21:5.

SIO ʻI HE VITIŌ HOKO ʻO LOTO-TOʻA . . . KO HA TĀIMUʻA, PEA TALI LEVA ʻA E FEHUʻI KO ENÍ:

• Ko e hā ʻoku tau ako mei he hokosia ʻa Emma fekauʻaki mo e tokanga anga-ʻofa ʻa Sihova ki he faʻahinga ʻoku nau fai ha ngaahi feilaulau ke tāimuʻa?