Naʻa Nau Mātā Tonu ʻa e ʻOfa Faka-Kalisitiané

Ko Yomara mo hono ongo tuongaʻané​—ʻa Marcelo mo Hiver—​ʻoku nau nofo ʻi ha kiʻi kolo ʻi Kuatemala. Naʻe kamata ako Tohi Tapu ʻa Yomara mo e Kau Fakamoʻoní, pea faai atu pē naʻe kau mo hono ongo tuongaʻané ʻi he akó. Ka naʻe ʻi ai ha palopalema. Ko e fānau ʻe toko tolu ko ení ʻoku nau kui, pea ʻikai lava ke nau lau ʻa e tohi maʻá e kau kuí. Ko ia ai, ko ʻenau faiako Tohi Tapú te ne lau ange kiate kinautolu ʻa e fakamatala ʻoku fai ai ʻa e akó pea mo e ngaahi veesi Tohi Tapu ʻi he lēsoní.

Ko e ngaahi fakataha ʻa e fakatahaʻangá naʻe toe ʻi ai hono pole. Naʻe ʻikai ke nau malava ʻiate kinautolu pē ke fononga miniti ʻe 40 ki he Fale Fakatahaʻanga ofi tahá. Ka ko e fanga tokoua ʻi he fakatahaʻangá naʻa nau fokotuʻutuʻu ke ʻave kinautolu ki he ngaahi fakatahá kotoa. Pea ʻi he taimi naʻe kamata ke fai ʻe he fānau ko ení ʻa e ngaahi konga ʻi he fakataha lolotonga e uiké, naʻe tokoniʻi kinautolu ʻe he fanga tokouá ke nau ako maʻuloto ʻenau kongá.

ʻI Mē 2019, naʻe kamata ke fakahoko ʻa e ngaahi fakataha ʻa e fakatahaʻangá ʻi honau koló. ʻI he taimi ko iá, naʻe ʻi ai ha ongo meʻa tāimuʻa tuʻumaʻu naʻá na hiki ki he koló. Naʻá na ʻai ia ko ʻena taumuʻa ke akoʻi ʻa e fānau ʻe toko tolu ko ení ke lautohi mo tohi ʻi he lea maʻá e kau kuí, neongo naʻe ʻikai ke poto ai ʻa e ongo meʻa ko ení. Naʻá na ʻalu ki ha laipeli ʻo maʻu mei ai ha ngaahi tohi maʻá e kau kuí pea ako ki he founga ke ngāueʻaki ai ia ke akoʻi ʻa e niʻihi kehé.

ʻI ha māhina siʻi mei ai, naʻe lava lelei ke lau ʻe he fānau ʻe toko tolú ʻa e tohi maʻá e kau kuí, pea naʻe malava heni ke nau fai ʻa e fakalakalaka fakalaumālie lahi ange.a ʻI he taimí ni ko Yomara, Marcelo mo Hiver ʻoku nau ngāue ko e kau tāimuʻa tuʻumaʻu. Ko Marcelo ko ha sevāniti fakafaifekau. ʻOku nau kau kakato ʻi he ngaahi ngāue fakalaumālié ʻi he kotoa ʻo e uiké. Ko ʻenau faivelengá ʻoku maongo ki he niʻihi kehé.

Ko e fānau ko eni ʻe toko tolú ʻoku nau houngaʻia ʻi he poupou anga-ʻofa ʻa e fakatahaʻangá. “Talu mei heʻemau fuofua fetaulaki mo e Kau Fakamoʻoní, kuo nau fakahāhā mai ʻa e ʻofa faka-Kalisitiane moʻoní,” ko e lau ia ʻa Yomara. “ʻOku mau maʻu ha ngaahi kaungāmeʻa lelei ʻi heʻemau fakatahaʻanga fakalotofonuá, pea ʻoku mau hoko ko ha konga ʻo e fetokouaʻaki fakavahaʻapuleʻangá ʻoku haʻi fakatahaʻi ʻe he ʻofá,” ko e lea ia ʻa Marcelo. Ko Yomara mo hono ongo tuongaʻané ʻoku nau fakaʻamua ke aʻu ki he ʻaho te nau sio ai ki hono liliu ʻa e māmaní ko ha palataisí.​—Saame 37:10, 11; ʻAi. 35:5.