Ko Hai ʻa Mele Makitaline?
Tali ʻa e Tohi Tapú
Ko Mele Makitaliné (Mele Makitala) ko ha muimui faitōnunga ia ʻo Sīsū Kalaisi. Ko hono hingoá ʻa e Makitaliné ʻoku ngalingali naʻe maʻu ia mei he kolo naʻá ne nofo aí ʻi Makitala (ngalingali ko Makatani) ʻa ia naʻe ofi ki he Tahi ʻo Kālelí.
Naʻe kau ʻa Mele Makitaline ʻi he kau fefine naʻe fononga fakataha mo Sīsū mo ʻene kau ākongá pea tokangaʻi ʻenau ngaahi fiemaʻu fakamatelié. (Luke 8:1-3) Naʻá ne sio tonu ʻi hono tutuki ʻo Sīsuú pea kau ʻi he ʻuluaki faʻahinga naʻa nau sio kiate ia ʻi heʻene toetuʻú.—Maʻake 15:40; Sione 20:11-18.
Ko Mele Makitaliné ko ha fefine feʻauaki?
ʻOku ʻikai lave ʻa e Tohi Tapú kia Mele Makitaline ko ha fefine feʻauaki. Ko e meʻa pē ʻoku lave fekauʻaki mo iá ko hono puipuituʻá naʻe kapusi ʻe Sīsū ha fanga tēmeniō ʻe toko fitu meiate ia.—Luke 8:2.
Naʻe maʻu mei fē ʻa e foʻi fakakaukau ko ha fefine feʻauaki iá? Hili ha laui senituli mei heʻene maté naʻe taukaveʻi ʻe he kakai ʻe niʻihi ko ia ʻa e fefine naʻe ʻikai hano hingoa (ngalingali ko ha fefine feʻauaki) naʻá ne fufulu ʻa e vaʻe ʻo Sīsuú ʻaki hono loʻimatá pea holoholoʻi ia ʻaki hono louʻulú. (Luke 7:36-38) Kae kehe, ʻoku ʻikai ha makatuʻunga Fakatohitapu ki he tui ko ení.
Ko Mele Makitaliné ko ha “ʻapositolo ia ki he kau ʻapositoló”?
ʻIkai. ʻOku ui ʻe he Siasi Katoliká ʻa Mele ko “Sangato Mele Makitaline” pea “ko e ʻapositolo ki he kau ʻapositoló” koeʻuhí naʻá ne kau ʻi he ʻuluaki faʻahinga naʻá nau ʻomai ʻa e ongoongo ʻo e toetuʻu ʻa Sīsuú ki heʻene kau ʻapositoló. Ka naʻe ʻikai ke ʻai heni ai ia ko ha ʻapositolo. Pea ʻoku ʻikai poupouʻi eni ʻe he Tohi Tapú.—Luke 6:12-16.
Naʻe kakato ʻa e Tohi Tapú ʻi he ofi ki he ngataʻanga ʻo e ʻuluaki senituli T.S. Ka ʻi he hili ha taʻu ʻe ono ngeau mei ai, naʻe hanga ʻe he kau taki lotú ʻo ʻoange ha fakalāngilangi makehe kia Mele Makitaline. Naʻe fakamatalaʻi ʻi he ngaahi tohi mei he senituli hono uá mo e tolú ʻa ia ʻoku ʻikai ko ha konga ʻo e Tohi Tapú, ko e niʻihi ʻo e kau ākonga ʻa Sīsuú naʻa nau meheka koeʻuhi ko Mele. Ko e ngaahi talanoa faʻu ko iá ʻoku ʻikai hano makatuʻunga ʻi he Tohi Tapú.
Ko Mele Makitaliné ko e uaifi ia ʻo Sīsū Kalaisí?
ʻIkai. Ko hono moʻoní, ʻoku fakahaaʻi mahino ʻi he Tohi Tapú naʻe ʻikai ʻaupito ke mali ʻa Sīsū.a
a Sio ki he kupu “Was Jesus Married? Did Jesus Have Siblings?”