Ngaahi Fehuʻi mei he Kau Lautohí

Ko e hā naʻe fakaafeʻi ai ʻe Sīsū ne toetuʻú ʻa Tōmasi ke ne ala ange kiate ia kae taʻofi ʻa Mele Makitaline ia mei he fai pehē ki muʻa angé?

ʻOku ʻomai ʻe he ngaahi liliu motuʻa ange ʻe niʻihi ʻo e Tohi Tapú ʻa e fakahuʻuhuʻunga ʻo pehē naʻe tala ange ʻe Sīsū kia Mele Makitaline ke ʻoua ʻe ala ange kiate ia. Hangē ko ʻení, ʻoku fakalea ʻe he Paaki Motuʻá ʻa e ngaahi lea ʻa Sīsuú: “Oua naa ala kiate au; he oku teeki ai teu alu hake ki he eku Tamai.” (Sione 20:​17, PM) Kae kehe, ko e muʻaki foʻi veape faka-Kalisí, ʻa ia ʻoku faʻa liliu ko e “ala,” ʻoku toe ʻuhinga ia “ki he piki, tāupe, pukepuke, kuku, ngaohi.” ʻOku ʻuhinga lelei leva, naʻe ʻikai ke fakafepakiʻi ʻe Sīsū ia ha ala ange pē ʻa Mele Makitaline kiate ia, koeʻuhi naʻá ne fakaʻatā ʻa e ongo fefine kehe ʻi he faʻitoká ke na ‘puke hono vaʻé.’—Mātiu 28:9.

Ko e ngaahi liliu lea fakaeonopooni lahi, hangē ko e New World Translation of the Holy Scriptures, The New Jerusalem Bible, mo e New English Bible, ʻoku nau tokoniʻi kitautolu ke tau mahinoʻi ʻa e ʻuhinga moʻoni ʻo e ngaahi lea ʻa Sīsuú ʻaki hono liliu kinautolu: “ʻOua ʻe piki kiate au.” Ko e hā ʻe lea pehē ai ʻa Sīsū kia Mele Makitaline, ʻa ia ko ha takanga ofí?—Luke 8:​1-3.

Ngalingali, naʻe manavahē ʻa Mele Makitaline naʻa mavahe ʻa Sīsū ʻo ʻalu hake ki hēvani. ʻI hono ueʻi ʻe heʻene holi mālohi ke nofo fakataha mo hono ʻEikí, naʻá ne piki maʻu kia Sīsū, ʻo ʻikai tukuange ia ke ne ʻalu. Ke fakapapauʻi kiate ia naʻe teʻeki ai taimi ke ne mavahé, naʻe tala ange ʻe Sīsū kia Mele ke ʻoua ʻe piki kiate iá kae ʻalu ʻo tala ki heʻene kau ākongá ʻa e ngaahi ongoongo ʻo ʻene toetuʻú.—Sione 20:17.

Ko e fetalanoaʻaki ʻia Sīsū mo Tōmasí naʻe kehe ia. ʻI he taimi naʻe hā ai ʻa Sīsū ki he niʻihi ʻo e kau ākongá, naʻe ʻikai ke ʻi ai ʻa Tōmasi. Ki mui ai, naʻe fakahaaʻi ʻe Tōmasi ʻene ngaahi veiveiua fekauʻaki mo e toetuʻu ʻa Sīsuú, ʻo ne pehē heʻikai te ne tui kae ʻoua kuó ne sio ki he ngaahi mata kafo ʻo Sīsuú pea ʻai hono nimá ki he vakavaka ʻo Sīsū naʻe hoka taoʻí. ʻI he ʻaho ʻe valu mei ai, naʻe toe hā ai ʻa Sīsū ki he kau ākongá. ʻI he taimi ko ʻení, naʻe ʻi ai ʻa Tōmasi, pea naʻe fakaafeʻi ia ʻe Sīsū ke ne ala ange ki he ngaahi mata kafó.—Sione 20:​24-27.

Ko ia, ʻi he meʻa fekauʻaki mo Mele Makitaliné, naʻe feangai ai ʻa Sīsū ia mo ha holi fehālaaki ke taʻofi ia mei heʻene mavahé; ʻi he meʻa fekauʻaki mo Tōmasí, naʻe tokoniʻi ai ʻe Sīsū ia ha taha naʻe veiveiua. ʻI he ongo tuʻungá ni fakatouʻosi, naʻe maʻu ai ʻe Sīsū ʻa e ngaahi ʻuhinga lelei ke ngāue ʻo hangē pē ko ia naʻá ne faí.