ʻE Fakangata ʻe Sīsū ʻa e Faihiá

ʻOku mahinoʻi ʻe Sīsū ʻa e ʻuhinga ke faingataʻaʻia ai koeʻuhi ko e faihiá mo e fakamaau taʻetotonú. Naʻe tukuakiʻi halaʻi, tā taʻefakalao, fakamāuʻi taʻetotonu, fakahalaiaʻi ʻi ha founga hala pea tāmateʻi ʻi he founga anga-fakamamahi. Neongo naʻá ne tonuhia, naʻá ne feilaulauʻi taʻesiokita mo loto-lelei “ʻene moʻuí ko ha huhuʻi maʻá e tokolahi.” (Mātiu 20:28; Sione 15:13) ʻI hono tuʻunga ko e Tuʻi ʻo e Puleʻanga ʻo e ʻOtuá ʻi he taimí ni, ʻoku vavé ni ke ne ʻomai ʻa e fakamaau totonú ki māmani kātoa, pea fakangata ʻosi ʻa e faihiá.​​—ʻAisea 42:3.

ʻOku fakamatalaʻi ʻe he Tohi Tapú ʻa e tuʻunga ʻe ʻi ai ʻa e māmaní ʻi he hili ʻa e ngāue mai ʻa Sīsū:

• “ʻE ʻikai toe ʻi ai ʻa e kau fulikivanú; te ke fakasio ʻa e feituʻu naʻa nau ʻi aí, ka ʻe ʻikai te nau ʻi ai. Ka ko e anga-vaivaí te nau maʻu ʻa e māmaní, pea te nau maʻu ʻa e fiefia lahi ʻi he melino hulu fau.”​​—Saame 37:10, 11.

ʻE lava fēfē ke tau fakahaaʻi ʻetau houngaʻia ki he meʻa kotoa kuo fai ʻe Sīsuú mo ia ʻoku teu ke ne fai maʻa kitautolú? Ko e founga ʻe taha ko e ako lahi ange fekauʻaki mo e “ongoongo lelei ʻo e Puleʻanga ʻo e ʻOtuá,” ʻa ia ko e pōpoaki ia naʻá ne malangaʻí. (Luke 4:43) Lau ʻa e kupu “Ko e Hā ʻa e Puleʻanga ʻo e ʻOtuá?”