Ko Hai Naʻá Ne Fokotuʻu ʻa e Kau Fakamoʻoni ʻa Sihová?

Naʻe kamata ʻa e kautaha ʻi onopooni ʻa e Kau Fakamoʻoni ʻa Sihová ʻi he ngataʻanga ʻo e senituli hono 19. ʻI he taimi ko iá, ko ha kiʻi kulupu tokosiʻi ʻo e kau ako Tohi Tapu naʻa nau nofo ofi ki Pittsburgh, Pennsylvania, ʻi he ʻIunaite Seteté, naʻa nau kamataʻi ha sivisiviʻi fakaʻāuliliki ʻo e Tohi Tapú. Naʻa nau fakahoa ʻa e ngaahi tokāteline naʻe akoʻi ʻe he ngaahi siasí mo e meʻa ʻoku akoʻi moʻoni ʻe he Tohi Tapú. Naʻa nau kamata pulusi ʻa e meʻa naʻa nau akó ʻi he ʻū tohi, nusipepa, mo e makasini ʻoku ui he taimí ni Ko e Taua Leʻo—ʻOku Fanongonongo Ai ʻa e Puleʻanga ʻo Sihová.

Naʻe kau ʻi he kulupú ha tokotaha ako Tohi Tapu loto-moʻoni ko Charles Taze Russell. Neongo ʻa e takimuʻa ʻa Russell ʻi he ngāue fakaeako Tohi Tapu ʻi he taimi ko iá pea ko e ʻuluaki ʻētita ia ʻo e Taua Leʻo, naʻe ʻikai ko ia naʻá ne fokotuʻu ʻa e lotu foʻoú. Ko e taumuʻa ʻa Russell mo e Kau Ako Tohi Tapu kehé, ʻa ia naʻe uiʻaki kinautolu ki muʻá, ke pouaki ʻa e ngaahi akonaki ʻa Sīsū Kalaisí pea ke muimui ki he ngaahi ngāue ʻa e fakatahaʻanga Kalisitiane ʻi he ʻuluaki senitulí. Koeʻuhí ko Sīsū naʻá ne Fokotuʻu ʻa e lotu faka-Kalisitiané, ʻoku mau vakai kiate ia ko ia naʻá ne fokotuʻu ʻemau kautahá.—Kolose 1:18-20.