Ko e Hā ʻOku ʻIkai ke Kātoangaʻi Ai ʻe he Kau Fakamoʻoni ʻa Sihová ʻa e Toetuʻú?
Ngaahi Maʻuhala
Maʻuhala: Ko e ʻuhinga ʻoku ʻikai ke kātoangaʻi ai ʻe he Kau Fakamoʻoni ʻa Sihová ʻa e Toetuʻú he ʻoku ʻikai ko ha kau Kalisitiane kinautolu.
Moʻoní: ʻOku mau tui kia Sīsū Kalaisi ko homau Fakamoʻui, pea ʻoku mau fai homau lelei tahá ke “muimui ofi ʻi hono topuvaʻé.”—1 Pita 2:21; Luke 2:11.
Maʻuhala: ʻOku ʻikai ke mou tui naʻe fokotuʻu hake ʻa Sīsū mei he maté.
Moʻoní: ʻOku mau tui ki he toetuʻu ʻa Sīsuú; ʻoku mau ʻiloʻi ko e uho ia ʻo e tui ʻa e Kalisitiané pea ʻoku mau fakamamafaʻi ia ʻi heʻemau ngāue fakamalangá.—1 Kolinitō 15:3, 4, 12-15.
Maʻuhala: ʻOku ʻikai ke mou tokanga ki he tō homou fānaú mei he fiefia ʻi he ʻaho mālōlō Toetuʻú.
Moʻoní: ʻOku mau ʻofa ʻi heʻemau fānaú—ʻoku mau fai homau lelei tahá ke akoʻi mo tokoniʻi kinautolu ke nau fiefia.—Taitusi 2:4.
Ko e hā ʻoku ʻikai ke kātoangaʻi ai ʻe he Kau Fakamoʻoni ʻa Sihová ʻa e Toetuʻú?
Ko e ʻaho mālōlō Toetuʻú ʻoku ʻikai makatuʻunga ia ʻi he Tohi Tapú.
Naʻe tuʻutuʻuni ʻe Sīsū ke tau kātoangaʻi ʻene pekiá, ʻikai ko ʻene toetuʻú. ʻOku mau kātoangaʻi ʻa e Fakamanatu ko ení he taʻu taki taha ʻi hono fakamanatu ʻene pekiá ʻo fakatatau ki he tohimāhina Fakatohitapú.—Luke 22:19, 20.
ʻOku mau tui ko e tupuʻanga ʻo e Toetuʻú, ʻa ia ʻoku haʻu mei he ouau fakafanau ʻi he kuonga muʻá, ʻokú ne ʻai ʻa e Toetuʻú ke taʻefakahōifua ki he ʻOtuá. ʻOku fiemaʻu ʻe he ʻOtuá ke tau ʻoange kiate ia “ʻa e anga-līʻoa maʻataʻatā,” pea ʻokú ne houhau ʻi he lotu ʻoku kau ai ʻa e ngaahi tōʻonga ʻoku taʻefakahōifua kiate iá.—ʻEkisoto 20:5, New World Translation; 1 Tuʻi 18:21.
ʻOku mau tui ko ʻemau fili ke fakaʻehiʻehi mei hono kātoangaʻi ʻa e Toetuʻú ʻoku makatuʻunga fefeka ia ʻi he Tohi Tapú, ʻa ia ʻoku fakalototoʻaʻi ai hono ngāueʻaki ʻa e “boto mooni moe iloilo” kae ʻikai ko e muimui pē ki he ngaahi talatukufakaholo fakaetangatá. (Palōveepi 3:21, Paaki Motuʻa; Mātiu 15:3) Neongo ʻemau vahevahe ʻemau tui fekauʻaki mo e Toetuʻú ki he niʻihi kehé ʻi he taimi ʻoku nau ʻeke aí, ʻoku mau toe fakaʻapaʻapaʻi ʻa e totonu ʻa e tokotaha taki taha ke fili ʻa e meʻa te ne faí.—1 Pita 3:15.