Taukapoʻi ʻa e Tauʻatāina ki he Lotú ʻi he Ngaahi Kolo Tuʻufonuá

ʻI he kakai ʻe laui teau miliona ʻoku nofo ʻi ʻAmelika Latiná, ko e laui miliona ʻoku ʻi ai pē ʻenau lea tuʻufonua mo e anga fakafonua. Ko e tokolahi ʻo e kakai tuʻufonua ko ení ko hotau fanga tokoua mo e fanga tuofāfine fakalaumālie, ʻoku nau fakamahuʻingaʻi honau anga fakafonuá. Koeʻuhi ke tokoniʻi fakalaumālie ʻa e kakaí, ʻoku nau liliu mo tufaki ʻa e ʻū tohi ʻa e Kau Fakamoʻoni ʻa Sihová ʻi he lea tuʻufonua ʻi ʻAmelika Latina ʻe 130 tupu.a Neongo ia, ko e niʻihi ʻo kinautolu kuo nau fehangahangai mo e fakafepaki ʻi he fili ke tauhi kia Sihová pea mo e fakafisi ke kau ʻi he ngaahi anga fakafonua taʻefakatohitapu ʻoku anga-maheni ʻi honau ngaahi koló. Kuo anga-fēfē hono ngāueʻaki hoʻo meʻaʻofá ke tokoni kiate kinautolú?

Tokoni Ke Nau Foki ki ʻApi

ʻI Mekisikou, ko hotau fanga tokoua mo e fanga tuofāfine ʻi ha kolo Huichol ʻi he ʻotu moʻunga ʻi he Vāhenga Jalisco naʻa nau fakafisi anga-fakaʻapaʻapa ke kau ʻi he ngaahi tōʻonga fakalotu naʻe maumauʻi ai honau konisēnisí.b Ka naʻe fakaʻitaʻi heni ʻa e niʻihi ʻi he koló. ʻI Tīsema 4, 2017, naʻe ʻohofi ʻe ha fuʻu kakai anga-fakamālohi ha kulupu ʻo e Kau Fakamoʻoní mo ha niʻihi kehe naʻa nau ʻi ai fakataha. Naʻe kapusi kinautolu ʻe he fuʻu kakaí mei he koló, maumauʻi ʻenau ʻū meʻá, pea fakamanamanaʻi ke tāmateʻi ha taha pē ʻe feinga ke foki mai.

Ko e Kau Fakamoʻoni ʻi he ngaahi kolo ofi maí naʻa nau tokangaʻi ʻa e ngaahi fiemaʻu vivili hotau fanga tokouá mo e fanga tuofāfiné. Ka ko e hā ʻe fai ke nau lava ʻo foki ki honau ʻapí? “Naʻe ʻikai ke mau maʻu ha paʻanga feʻunga ke totongiʻaki ha loea,” ko e fakamatala ia ha tokoua ko Agustín, “pea naʻe ʻikai ke mau ʻiloʻi pe te mau hanga ki fē ki ha faleʻi fakalao.”

Koeʻuhi naʻe uesia ʻa e tauʻatāina hotau fanga tokouá ki he lotú, naʻe fai leva ʻe he vaʻa ʻi ʻAmelika Lotolotó ha ngāue. ʻUluakí, naʻa nau kole ki he kau ʻōfisa fakalotofonuá ke nau fakatotoloʻi ʻa e ngaahi hia ko ení. Hokó, naʻa nau maʻu ha ngofua mei he Kōmiti Kouʻotineita ʻo e Kulupu Pule ʻo e Kau Fakamoʻoni ʻa Sihová ke ngāue fakataha mo e Potungāue Lao ʻi he ʻuluʻi ʻapitanga ʻi māmaní pea faile ha hopo maʻa hotau fanga tokoua mo e fanga tuofāfine Huichol. Naʻe faai atu pē ʻo aʻu ʻa e keisí ki he Fakamaauʻanga Lahi ʻo e Puleʻangá​—ko e fakamaauʻanga māʻolunga taha ia ʻi Mekisikoú.

Naʻe teuteuʻi ʻe ha timi ʻo e kau loea fakavahaʻapuleʻanga ha fakakikihi mahino ʻa ia naʻa nau fakamatalaʻi ai hangē pē ko e pau ke fakaʻapaʻapaʻi ʻe he niʻihi kehé ʻa e anga fakafonua ʻa e ngaahi kolo tuʻufonuá, ko e ngaahi koló kuo pau ke nau fakaʻapaʻapaʻi mo maluʻi ʻa e tauʻatāina ʻa e faʻahinga kotoa ʻi he koló. ʻOku ʻi ai ʻa e tauʻatāina ʻa e tokotaha kotoa neongo pe ʻoku nau nofo ʻi fē.

ʻI Siulai 8, 2020, naʻe ikuna ʻa e Kau Fakamoʻoni ʻa Sihová ʻi he Fakamaauʻanga Lahí. Naʻa nau tuʻutuʻuni ko e faʻahinga kotoa naʻe kapusí ʻoku totonu ke fakaʻatā ke nau foki ki honau koló. Ko Agustín, naʻe lave ki ai ki muʻá, ʻokú ne fakahāhā ʻa e ongoʻi houngaʻia ʻokú ne maʻu pehē ki he niʻihi kehé: “ʻOku mau mātuʻaki houngaʻia mo fiefia ki he meʻa kuo fai ʻe he fanga tokouá maʻa kimautolú. Kapau naʻe ʻikai ke nau tokoniʻi kimautolu, heʻikai ke mau lava ʻo fai ha meʻa.”

“Meʻa Lahi ki ha Kiʻi Tokosiʻi”

ʻI he lolotongá ni, ko hotau fanga tokoua ʻi San Juan de Ilumán, ko ha kolo ʻi ʻEkuatoa ʻa ia ʻoku nofo ai ʻa e kakai tuʻufonua tokolahi ʻo e Feituʻu Otavalo, naʻa nau fehangahangai mo e fakafepaki meimei tatau. ʻI he 2014, hili hono maʻu ʻa e ngofua kotoa naʻe fiemaʻú, naʻa nau kamata ke langa ha Fale Fakatahaʻanga. Neongo ia, ko ha pātele naʻá ne taki ʻi ha fuʻu kakai ʻe toko 100 tupu naʻa nau haʻu ʻo taʻofi anga-fakamālohi ʻa e langá. Naʻe fekauʻi leva ʻe he koló ʻa e Kau Fakamoʻoni ʻa Sihová ke taʻofi ʻa e fakatahataha fakataha ki he lotú.

Ko e potungāue lao ʻi he vaʻa ʻEkuatoá mo ia ʻi he ʻuluʻi ʻapitanga ʻi māmaní naʻa nau ngāue fakataha ke taukapoʻi ʻa e fakatahaʻangá mei hono maumauʻi ko eni ʻenau tauʻatāina ki he lotú. Naʻe ʻave ʻe hotau fanga tokouá ʻa e meʻá ni ki he fakamaauʻangá. Naʻe ʻai heni ʻa e koló ke taʻofi ʻenau fakafepakí pea fakaʻatā ʻa e fakatahaʻangá ke hoko atu ʻenau ngaahi fakatahá pea fakaʻosi ʻa e langa honau Fale Fakatahaʻangá. Ka ke maluʻi ʻa e totonu hotau fanga tokouá ʻi he kahaʻú, naʻe kole ʻe heʻetau kau fakafofongá ki he fakamaauʻanga māʻolunga angé ke fai ha tuʻutuʻuni ʻi ha ʻīsiu mātuʻaki mahuʻinga: Kuo pau ke fakaʻapaʻapaʻi ʻe he ngaahi kolo tuʻufonuá ʻa e totonu fakavahaʻapuleʻanga ʻa e tangatá?

ʻI Siulai 16, 2020, ko e Fakamaauʻanga Konisitūtone ʻo ʻEkuatoá, ʻa e fakamaauʻanga māʻolunga taha ʻi he fonuá, naʻa nau fakamāuʻi ʻa e keisí. Ko e fanga tokoua ʻa ia ko e kau loea ʻi ʻEkuatoá naʻa nau fakafofongaʻi ʻa e fakatahaʻangá. Tānaki atu ki aí, ko e toko fā ʻi hotau fanga tokouá ʻa ia ko e kau loea fakavahaʻapuleʻanga taukei naʻa nau kau ki he hopó. Koeʻuhi ko e ngaahi fakangatangata ʻi he COVID-19, naʻa nau kau mai mei he ngaahi fonua kehekehe fakafou ʻi he tā vitioó. Ko e fuofua taimi eni ke fakaʻatā ai ʻe ha fakamaauʻanga ha timi fakalao ʻa ia ʻoku nau fakafofongaʻi ʻa e Kau Fakamoʻoni ʻa Sihová ke fakahaaʻi ʻenau fakakikihí ʻi he founga ko ení.c Naʻe lave ʻa e timí ki he ngaahi mafai fakalao fakavahaʻapuleʻanga ke fakapapauʻi ʻaki ko e kakai tuʻufonuá ʻoku ʻikai ke nau tuku ange ʻenau totonu fakatāutahá koeʻuhí pē ko ha konga kinautolu ʻo ha kolo tuʻufonua.

Ko hotau fanga tokoua ʻi he Feituʻu Otavalo ʻoku nau tatali vēkeveke ki he tuʻutuʻuni ʻa e Fakamaauʻanga Konisitūtoné. ʻI he lolotonga ní, ʻoku maongo kiate kinautolu ʻa e tokoni naʻa nau maʻú. Ko César, ko ha mātuʻa ʻi he Fakatahaʻanga Ilumán Quichua, ʻokú ne pehē: “Ko Sihova pē, fakafou ʻi heʻene kautahá, te ne fai ha meʻa lahi ki ha kiʻi tokosiʻi.”

Ko e kau loea naʻa nau kau ki he hopó ko e Kau Fakamoʻoni ʻa Sihova kotoa, pea ʻoku nau fiefia ke tokoni taʻetotongi ʻaki ʻenau taukei fakalaó. Ka, ko hono faile ʻa e ngaahi keisi ko ení, teuteu ki ai, pea fakakikihiʻi ia ʻi he fakamaauʻangá ʻoku fiemaʻu ki ai ʻa e taimi mo e paʻanga. Ko ʻetau kau loeá mo e fanga tokoua kehe naʻa nau fakamoleki ʻa e houa ʻe 380 tupu ʻi hono teuteu ʻa e ngaahi fakakikihi fakalaó pea mo ha toe houa ʻe 240 ke liliu ʻa e ngaahi fakamatala ki he hopo ʻi he lea faka-Mekisikoú. Ko e kau loea ofi ki he toko 40 mei māmani lahi naʻa nau fakamoleki ʻa e houa ʻe lauingeau ʻi he keisi ʻi ʻEkuatoá. Kuo anga-fēfē ʻetau malava ke feau ʻa e ngaahi fakamole ki hono taukapoʻi hotau fanga tokouá? Fakafou ʻi he tokoni kuó ke fai ʻo ngāueʻaki ʻa e ngaahi founga kehekehe ʻoku fakamatalaʻi ʻi he donate.jw.org. Fakamālō atu ki hoʻo nima-homó.