Ngaahi Ongoongo Falalaʻanga mo Fakatupu Tui Mālohi

ʻOku tokanga lahi ʻa e Kau Fakamoʻoni ʻa Sihová ʻo fekauʻaki mo honau kaungātuí. (1 Pita 2:17) Ko e tokolahi ʻo kitautolu ʻoku ongoʻi hangē ko Tannis, ko ha tuofefine ʻi Keniaá. ʻOkú ne pehē, “ʻOku ou saiʻia ke ʻilo ʻa e meʻa ʻoku hoko ki siʻoku fanga tokoua mo e fanga tuofāfine takatakai ʻi he māmaní.” Kuo anga-fēfē hono ʻiloʻi eni ʻe Tannis mo e Kau Fakamoʻoni kehe ʻe laui milioná? Talu mei he 2013, kuo mau fakahoko eni fakafou ʻi he peesi Ngaahi Ongoongo ʻi heʻemau uepisaiti, jw.org.

ʻOku ʻi he Ngaahi Ongoongo ʻa e ngaahi līpooti falalaʻanga ʻo fekauʻaki mo e Kau Fakamoʻoni ʻa Sihová ʻi he ngaahi kaveinga hangē ko e tuku ange ʻo e Tohi Tapú, ngāue tokoni ki he fakatamakí, ngaahi ngāue langa, pea mo e ngaahi meʻa mahuʻinga kehe. ʻOku mau toe ʻilo ai fekauʻaki mo homau fanga tokoua mo e fanga tuofāfine ʻoku tuku pilīsone koeʻuhi ko ʻenau tuí. ʻOku toe ʻi he Ngaahi Ongoongo ʻa e ngaahi hokosia fakalototoʻa fekauʻaki mo e ngaahi feingangāue fakamalangá pea mo hono kātoangaʻi ʻa e Fakamanatú. Ko hai ʻokú ne kumi ʻa e ngaahi kupu ko eni ʻi he ongoongó, pea ʻoku anga-fēfē hono teuteuʻi kinautolú?

Ko Hono ʻIloʻi mo Hono Līpooti ʻa e Ngaahi Ongoongó

Ko e Ngaahi Ongoongo ʻoku tokangaʻi ia ʻe he Potungāue Maʻuʻanga Fakamatala, pe OPI. Ko e potungāue ko ení ʻoku tuʻu ia ʻi he ʻuluʻi ʻapitangá pea ʻoku ngāue ʻi he malumalu ʻo e Kōmiti Kouʻotineita ʻo e Kulupu Pulé. Ko e OPI ʻoku ngāue ai ʻa e fanga tokoua mo e fanga tuofāfine laka hake he toko 100, ʻa ia ko e tokolahi ʻo kinautolu ko e kau ngāue pole nofo mavahe, pea ʻoku kau ai ʻa e kau faitohi, kau fekumi, kau tā-valivali mo e kau liliu leá. Ko e niʻihi ʻoku nau fai ʻa e fetuʻutaki ki he kau ʻōfisa fakapuleʻangá, kau faiakó, kau palōfesá pea mo e maʻuʻanga ongoongó. Ko e OPI ʻoku tokoni ki ai ʻa e ʻŌfisi Maʻuʻanga Fakamatala, pe PID, laka hake he 80 ʻi he ngaahi vaʻa takatakai ʻi he māmaní.

Ke teuteuʻi ha foʻi ongoongo, ʻoku ngāue vāofi ʻa e OPI mo e PID. Ko hono ʻiloʻi pē ʻe he fanga tokouá ha ongoongo, ʻoku nau fekumi ki he kaveingá pea fakatahatahaʻi ʻa e fakamatala alafalalaʻanga. ʻOku lava ke kau heni ha ngaahi fakaʻekeʻeke mo e talanoa ki ha kau mataotao. Hili ʻenau fakatahatahaʻi ʻa e ngaahi moʻoniʻi meʻá, ʻoku taipeʻi leva ʻa e foʻi ongoongó, ʻētitaʻi, toe lau, tānaki ki ai ha ngaahi laʻi tā, pea ʻave leva ia ki he Kōmiti Kouʻotineitá ke fakaʻatā mai.

Ngaahi Lea ʻo e Houngaʻia

ʻOku anga-fēfē ongoʻi ʻa hotau kaungātuí fekauʻaki mo e Ngaahi Ongoongo? ʻOku pehē ʻe Cheryl, ko ha tuofefine mei he ʻOtu Motu Filipaini, “ʻOku ou manako moʻoni ʻi hono kamataʻaki hoku ʻahó hono lau ʻa e ngaahi ongoongo fekauʻaki mo e kautaha ʻa Sihová mo hono kakaí.”

Ko e kau lautohi tokolahi ʻoku fakamatala fekauʻaki mo e kehekehe ʻoku nau sio ki ai ʻi he vahaʻa ʻo e Ngaahi Ongoongo ʻi he jw.org mo e ngaahi maʻuʻanga ongoongo kehé. ʻOku fakamatala ʻa Tatiana mei Kāsakisitani: “ʻOku ou houngaʻia ʻi he lava ke u falala ki he ongoongo ʻi he jw.org. ʻOku falalaʻanga mo makatuʻunga ʻi he ngaahi moʻoniʻi meʻa.” Ko ha tuofefine mei Mekisikou ko hono hingoá ko Alma, ʻokú ne pehē: “ʻI hono fakahoa ki he ngaahi meʻa fakamamahi mei he maʻuʻanga ongoongo anga-mahení, ko e Ngaahi Ongoongo ʻoku mātuʻaki fakalototoʻa.”

ʻOku ʻikai ngata pē ʻi he alafalalaʻanga ʻa e Ngaahi Ongoongo, ka ʻoku toe fakatupu tui mālohi. ʻOku pehē ʻe Bernard mei Keniā: “Kuo tokoniʻi au ʻe he Ngaahi Ongoongo ke u vakai ki he fanga tokouá mo e fanga tuofāfine takatakai ʻi he māmaní ko hoku fāmili ʻo tatau ai pē pe ʻoku nau ʻi fē. ʻOku ou malava ke fakakau honau ngaahi hingoá mo honau ngaahi tuʻungá tonu ʻi heʻeku ngaahi lotú.” ʻOku toe pehē ʻe ha tuofefine ko Bybron ʻi Keniā: “ʻOku ou fiefia maʻu pē ʻi heʻeku sio ki ha kupu fekauʻaki mo hono tuku ange ʻo e Tohi Tapú ʻi ha lea kehe! ʻOku fakamanatu mai ʻe he ngaahi kupu ko ení kiate au ʻoku ʻikai ke filifilimānako ʻa Sihova.”

Naʻa mo e ngaahi ongoongo fekauʻaki mo hono fakatangaʻi hotau fanga tokouá ʻoku lava ke ne fakalototoʻaʻi kitautolu. “Ko e fakalaulauloto ki heʻenau loto-toʻá kuó ne fakaivimālohiʻi ʻeku tuí,” ko e lau ia ʻa Jackline ʻi Keniā. “ʻOku ou ako maʻu pē ki he meʻa ʻokú ne tokoniʻi kinautolu ke kātakí. Kuó u ako ki he mahuʻinga ʻo e ngaahi meʻa hangē ko e lotu, lau Tohi Tapu pea naʻa mo e hivá ʻi hono ʻai hotau fanga tokouá ke mālohí.”

ʻOku houngaʻia ha tuofefine ʻi Kositā Lika ko Beatriz he ngaahi ongoongo fekauʻaki mo e ngaahi fakatamaki fakanatulá. ʻOkú ne pehē: “ʻOku lava ke u sio ʻi he Ngaahi Ongoongo ki he anga hono tokonaki ʻe he kautahá ʻa e ngaahi fiemaʻu ʻa hotau fanga tokouá ʻi ha founga vave, ʻaonga mo ʻofa. ʻOku fakatuipauʻi ai au ko e kautaha eni ʻa Sihová.”

ʻOku tau houngaʻia moʻoni he ngaahi ongoongo fakamuimui taha fekauʻaki mo hotau fanga tokoua ʻi māmani lahí! ʻOku malava eni koeʻuhí ko hoʻo foaki nima-homo ki he ngāue ʻi māmani lahí, ko e lahi tahá ʻoku fai ia ʻi he donate.jw.org. Mālō ʻaupito ki hoʻo tokoni nima-homó.