Ko e ʻālifá ko e ʻuluaki mataʻitohi ia ʻi he ʻalafapeti faka-Kalisí, pea ko e ʻōmeká ko e mataʻitohi fakamuimui tahá ia. ʻI hono ngāueʻaki ʻa e kupuʻi lea ko e “ʻĀlifá mo e ʻŌmeká,” ʻoku fakahaaʻi ai ʻe Sihova, ʻi he taimi ʻokú ne kamataʻi ai ha meʻa te ne fakahoko ia kae ʻoua kuo lavameʻa moʻoni. Hili hono fakatupu ʻe Sihova ʻa ʻĀtama mo ʻIví, naʻá Ne folofola kiate kinaua: “Mo fanafanau mo fakatokolahi pea fakafonu ʻa e māmaní pea mo pule ki ai.” (Sēn. 1:28) ʻI he mōmeniti ko iá, naʻe hangē ia naʻe lea ʻa Sihova “ʻĀlifá.” Naʻá ne fakahaaʻi mahino ʻene taumuʻá: ʻE hoko mai ha taimi, ko e hako haohaoa mo talangofua ʻo ʻĀtama mo ʻIví te nau fakafonu ʻa e māmaní pea liliu ia ke hoko ko ha palataisi. ʻI he taimi ko ia ʻi he kahaʻú, ko Sihova ʻi ha ʻuhinga, te ne pehē, “ʻŌmeká.” Hili ʻa e kakato hono fakatupu ʻo e “langí mo e māmaní mo e meʻa kotoa ʻi aí,” naʻe ʻomai ʻe Sihova ha fakapapauʻiʻanga. Naʻá ne fakapapauʻi heʻikai taʻefakahoko ʻene taumuʻa ki he faʻahinga ʻo e tangatá mo e māmaní. ʻE fakahoko kakato ʻene taumuʻá ʻi he ngataʻanga ʻo e ʻaho hono fitú.—Sēn. 2:​1-3. w23.11 5 ¶13-14

Ko e fononga faingataʻa mei Pāpilone ki ʻIsilelí naʻe feʻunga nai mo e māhina ʻe fā, ka naʻe talaʻofa ʻe Sihova ko ha fakafaingataʻaʻiaʻanga pē naʻe hā ngali te ne taʻofi ʻenau fokí ʻe fakaʻataʻatā. ʻI he ʻatamai ʻo e kau Siu faitōnungá, ko e ngaahi ʻaonga ʻo e toe foki ki ʻIsilelí naʻe laka mamaʻo ange ia ʻi ha feilaulau pē te nau fai. Ko e tāpuaki lahi taha naʻe kau ki aí ko ʻenau lotú. Naʻe ʻikai ke ʻi ai ha temipale ʻo Sihova ʻi Pāpilone. Naʻe ʻikai ke ʻi ai ha ʻōlita ʻa ia ʻe lava ke ʻoatu ai ʻe he kau ʻIsilelí ʻa e ngaahi feilaulau naʻe fiemaʻu ʻe he Lao ʻa Mōsesé, pea naʻe ʻikai ha tuʻunga-taulaʻeiki naʻe fokotuʻu ke nau ʻoatu ʻa e ngaahi feilaulau ko iá. Tānaki atu ki aí, naʻe tokolahi mamaʻo ange ʻa e kau tangata mo e kau fefine panganí, ʻa ia naʻe ʻikai haʻanau tokaʻi ʻe taha ʻa Sihova pe ko ʻEne ngaahi tuʻungá ʻi he kakai ʻa Sihová. Ko ia ko e kau Siu manavahē-ʻOtuá—ko e laui afe ʻo kinautolu—naʻa nau fakatuʻotuʻa atu ke foki ki honau fonua tupuʻangá ʻa ia ʻe lava ke nau toe fakafoki mai ai ʻa e lotu maʻá. w23.05 14-15 ¶3-4

ʻOku tau fiemaʻu ʻa e tokoni ʻa e laumālie māʻoniʻoni ʻo e ʻOtuá koeʻuhí ke lava ke tau hanganaki tōʻonga ʻo hangē “ko e fānau ʻo e māmá.” Ko e hā hono ʻuhingá? Koeʻuhí ko ha pole moʻoni ia ke nofoʻaki maʻa ʻi he māmani taʻetaau ko ení. (1 Tes. 4:​3-5, 7, 8) Ko e laumālie māʻoniʻoní ʻe lava ke ne tokoniʻi kitautolu ke tauʻi ʻa e fakakaukau ʻa e māmaní, ʻo kau ai ʻa hono ngaahi filōsofia mo e vakai ʻoku fepaki mo e fakakaukau ʻa e ʻOtuá. ʻE lava ke toe tokoniʻi kitautolu ʻe he laumālie māʻoniʻoní ke fakatupulekina “ʻa e faʻahinga kotoa pē ʻo e leleí mo e māʻoniʻoní.” (ʻEf. 5:9) Ko e founga ʻe taha ʻe lava ke tau maʻu ai ʻa e laumālie māʻoniʻoní ko e lotu fekauʻaki mo ia. Naʻe pehē ʻe Sīsū ko Sihova te ne “foaki ʻa e laumālie māʻoniʻoní ki he faʻahinga ʻoku kole kiate iá.” (Luke 11:13) Pea ʻi heʻetau fakahīkihikiʻi fakataha ʻa Sihova ʻi he ngaahi fakatahá, ʻoku tau toe maʻu ai ʻa e laumālie māʻoniʻoní. (ʻEf. 5:​19, 20) Ko e tākiekina lelei ʻa e laumālie māʻoniʻoni ʻo e ʻOtuá te ne tokoniʻi kitautolu ke moʻui ʻi ha founga ʻoku fakahōifua ki he ʻOtuá. w24.03 23-24 ¶13-15