Fakaafeʻi Kinautolu ke Haʻu
1 Ko ha fakaafe naʻe fai ʻi he ngaahi senituli kuo maliu atú ʻoku kei ongona pē ia ʻi he ngaahi fonua ʻe 233 takatakai ʻi he māmaní: “Haʻuā, ke tau ʻalu hake ki he moʻunga ʻo Sihova, . . . pea te ne ako kiate kitautolu hano ngaahi ʻalunga, pea te tau fou ʻi hono ngaahi founga.” (Ai. 2:3) Ko hono tataki ʻa e kakaí ki he kautaha ʻa Sihová ko e taha ia ʻo e ngaahi founga lelei taha ʻe lava ke tau tokoni ai kiate kinautolu ke nau fai ha fakalakalaka fakalaumālie ʻa ia ʻe taki atu ki he moʻui taʻengatá.
2 ʻOku toumoua nai ʻa e kau malanga ʻe niʻihi ke fakaafeʻi ʻa e kakaí ki he Fale Fakatahaʻangá kae ʻoua kuo nau fakahāhā ha fakalakalaka lahi ʻaupito ʻi ha ako Tohitapu ʻi ʻapi. Kae kehe, ʻi he taimi ʻe niʻihi ʻe kamata maʻu ʻe he kakaí ia ʻa e ngaahi fakataha ʻa e fakatahaʻangá naʻa mo e ki muʻa ke kamata ha ako Tohitapu mo kinautolu. ʻOku totonu ke ʻoua te tau toloi ʻa hono fakaaʻu atu ha fakaafe loto-māfana pea fakalototoʻaʻi ʻa e kakaí ke haʻu ki he ngaahi fakatahá.
3 Ko e Meʻa ke Faí: Ngāueleleiʻaki ʻa e lauʻipepa fakaafé ke fakahā ki he kakaí fekauʻaki mo ʻetau ngaahi fakataha ʻi he feituʻú. Tala ange ko e ngaahi fakatahá ʻoku taʻetotongi pea ʻoku ʻikai ʻaupito fai ai ha tānaki paʻanga. Fakamatalaʻi ʻa e founga hono fai ʻa e ngaahi fakatahá. Tala ange ko e ngaahi ako Tohitapu moʻoni kinautolu pea ko e tohi akó ʻoku tokonaki mai ia ki he tokotaha kotoa pē ke muimui ai. Fai ha tokanga ki he kehekehe ʻi he ngaahi ʻātakaí pea mo e tuʻunga fakasōsiale ʻa e faʻahinga ʻoku kau ki aí. Tala ange ko kinautolú ko e kakai mei he feituʻú pea ko e fānau ʻi he taʻumotuʻa kotoa pē ʻoku talitali lelei ke nau haʻu. ʻOku totonu ke tau fakaafeʻi ʻa e faʻahinga ʻoku tau ako mo iá, ʻo tala ange te tau tokoniʻi kinautolu ʻi ha faʻahinga founga pē ke nau ʻi ai.
4 Ko e taha ʻi he ngaahi meʻa fakaʻosi ʻoku hiki ʻi he Tohitapú ko ha fakaafe loto-māfana ke maʻu ʻinasi ʻi he ngaahi tokonaki ʻa Sihova ki he moʻuí: “Pea ko e Laumalie mo e Taʻahine ʻoku na pehe, ‘Haʻu!’ . . . Pea ko ia ʻoku fieinua ke ne haʻu. Pea ko ia ʻoku ne loto ki ai, ke ne toʻo taʻetotongi ʻa e Vaiola.” (Fkh. 22:17) ʻOku ʻikai ha fetongi ia ki hono fakaafeʻi ʻa e niʻihi kehé ke maʻu ʻetau ngaahi fakatahá.
5 ʻOku fakamatalaʻi fakaekikite ʻi he Aisea 60:8 ʻa e laui kilu ʻo e kau fakahīkihiki foʻou ʻoku haʻu he taimí ni ki he ngaahi fakatahaʻanga ʻa e kakai ʻa e ʻOtuá ko e fanga lupe ʻoku “puna hange ko e ʻao, pe hange ko e fanga lupe ki honau ngaahi tupa.” ʻOku lava ke tau fakaafeʻi kotoa ʻa e faʻahinga foʻoú ki heʻetau ngaahi fakatahá pea ʻai ke nau ongoʻi ʻoku talitali lelei kinautolu. ʻI he founga ko ʻení, te tau ngāue fakataha ai mo Sihova ʻi heʻene fakavaveʻi ʻa e ngāue fakatahatahaʻí.—Ai. 60:22.