Ko e Ako Fakafaifekau Fakateokalati ki he 2000
1 Kuo fakamoʻoniʻi ko e Ako Fakafaifekau Fakateokalatí kuo hoko ko ha tāpuaki lahi ki he kakai ʻa Sihová. Laka hake ʻi he taʻu ʻe 50 kuohilí, kuó ne tokoniʻi ai ʻa e laui miliona ke fakatupulekina ʻenau ngaahi malavá ʻi he tuʻunga ko e kau malanga mo e kau faiako ʻo e ngaahi moʻoni ʻo e Tohitapú ki he kakaí. (Sāme 145:10-12; Mt. 28:19, 20) ʻOku lava ke ke sio ki he founga kuo tokoniʻi ai koe ʻe he akó? ʻE malava ke hoko atu ʻene fai peheé he lolotonga ʻo e 2000 kapau te ke kau kakato ki ai pea ngāueʻaki ʻa e akonaki ʻoku ʻomai aí.
2 Ko e ngaahi fakahinohino fekauʻaki mo e ngaahi kongá pea mo e ngaahi tohi ʻe ngāueʻakí ʻoku fakahokohoko ʻi he ʻuluaki peesi ʻo e fakahokohoko ako ki he 2000. Ko e taimi ʻoku vaheʻi ki he konga taki taha, ko e maʻuʻanga fakamatalá, founga ke ʻoatu ai ʻa e fakamatalá, pea mo e ngaahi fakaikiiki kehe ʻoku lave ki aí. Kātaki ʻo vaheʻi ha taimi ke lau fakalelei ai ʻa e ngaahi fakahinohinó pea ngāueʻaki kinautolu. Ki ha ngaahi malanga ʻoku makatuʻunga ʻi ha tokotaha ʻi he Tohitapú, neongo kapau ʻoku ʻikai ke ke mahinoʻi ʻa e lea faka-Pilitāniá ʻe lava ke ke ngāueʻaki ko ha maʻuʻanga fakamatala ʻa e ngaahi konga Tohitapu ʻa ia ʻoku lave ki ai ʻi he kupu ʻi he Insight, ʻa ia ʻe lava ke ke lau ʻi hoʻo Tohitapu faka-Tongá. ʻE toe ʻi ai nai ha talanoa fekauʻaki mo ia ʻi he Ko ʻEku Tohi ʻo e Ngaahi Talanoa Faka-Tohitapú, pe ko ha tokoua ʻokú ne ʻilo ʻa e lea faka-Pilitāniá ʻe lava ke ne tokoniʻi koe ke mahino ʻa e kupu ʻi he Insight.
3 Lau Tohitapu Fakauiké: ʻOku ʻi ai ʻa e ongo polokalama kehekehe ʻe ua ki he lau Tohitapu fakauiké ʻoku fakahokohoko ʻi he fakahokohoko ki he akó. Ko e taha ko e polokalama lautohi anga-maheni ʻoku kāpui ai ʻa e ngaahi peesi nai ʻe nima ʻo e Tohitapú. ʻOku fakatuʻunga ʻa e ngaahi meʻa mahuʻinga mei he Tohitapú ʻi he lautohi ko ʻení. Ko e polokalama lautohi ʻe tahá ko e fakalahi pea ʻokú ne kāpui ʻa e fakamatala ʻoku liunga ua hono lahí. ʻI he muimui ki he polokalama ko ʻení, te ke malava ai ke lau ʻa e kotoa ʻo e Tohitapú ʻi he taʻu ʻe tolu. ʻOku ʻiloʻi ko e niʻihi ʻoku nau loto nai ke lau ʻo lahi ange ʻi he fakahokohoko ki he polokalama fakalahí, pea ko e niʻihi kehe ʻoku ʻikai nai malava ke nau tauhi ki ai. ʻI he ʻikai ko hono fakafehoanaki koe mo e niʻihi kehé, fiefia ʻi he meʻa ʻoku malava ke ke lavaʻí. (Kal. 6:4) Ko e meʻa mātuʻaki mahuʻingá ke lau fakaʻaho ʻa e Folofola ʻa e ʻOtuá.—Sāme 1:1-3.
4 Ke kau ʻi he Ako Fakafaifekau Fakateokalatí, ʻoku totonu ke ke lea ki he ʻovasia ʻo e akó. Kātaki ʻo fai fakamātoato ʻa hoʻo ngaahi kongá, pea ʻoua ʻe kaniseli noaʻia. Houngaʻia ʻi he akó he ko ha tokonaki meia Sihova. Teuteu lelei, hoko ʻo alāanga kakato mo e fakamatala kuo vaheʻí, pea fakahaaʻi atu koe mei he lotó, ʻokú ke maʻu ʻa e ʻaonga kakato mei he ako laulōtaha ko ʻení.