ʻIkai Kuo Tau ʻOsi Fanongo Ai ki Muʻa?
1 Ko e moʻoni kuo tau ʻosi fanongo ai! ʻOku toutou ʻomai ʻe Sihova ʻa e ngaahi meʻa lahi ʻi heʻene Folofolá ke ʻaonga ki heʻene kakaí. Naʻe faʻa toutou ʻomai ʻe Sīsū ʻene ngaahi akonaki fekauʻaki mo e ngaahi tafaʻaki kehekehe ʻo e Puleʻangá. Naʻe fakamanatu hokohoko ʻe heʻene kau ākongá ʻa e ngaahi meʻa fakalaumālié mo e faʻahinga ko ia naʻa nau tuʻumaʻu ʻi he moʻoní.—Loma 15:15; 2 Pita 1:12, 13; 3:1, 2.
2 ʻI hotau taimí kuo fokotuʻutuʻu ʻe he kautaha ʻa Sihová ʻa e ngaahi kaveinga mahuʻinga ke toutou fakamanatu ʻi he ngaahi fakataha ʻa e fakatahaʻangá. Kuo toutou ako ʻa e ngaahi tohi pau. ʻIo, ʻoku mahuʻinga ke fanongo ki he ngaahi meʻa kuo tau ʻosi fanongo ai ki muʻá!
3 Ko e Toutou ʻAí ʻOkú Ne Fakahoko ha Fiemaʻu Mātuʻaki Mahuʻinga: Ko e ngaahi fakamanatu ʻa Sihová ʻokú ne fakalolotoʻi ʻetau mahinó, fakalahi ʻetau vakaí, pea fakaivimālohiʻi ʻetau fakapapau ke nofo ai pē ʻi he ʻalunga fakalaumālié. (Sāme 119:129) Ko hono fakamanatu ʻa e ngaahi tuʻunga mo e ngaahi tefitoʻi moʻoni ʻa e ʻOtuá ʻoku hangē ia ko e sio ki ha sioʻata. ʻOku tokoniʻi ai kitautolu ke sivisiviʻi kitautolu pea fakafepakiʻi ʻa e hehema ke hoko “ko ha taha fanongo kae ngalo.”—Sem. 1:22-25.
4 Kapau ʻoku ʻikai te tau hanganaki fakamanatu kiate kitautolu ʻa e moʻoní, ʻe tākiekina hotau lotó ʻe he ngaahi meʻa kehé. ʻOku fakaivimālohiʻi kitautolu ʻe he ngaahi fakamanatu ʻa e ʻOtuá ke tau talitekeʻi ʻa e ngaahi tākiekina fakatupu maumau ʻa e māmani ʻo Sētané. (Sāme 119:2, 3, 99, 133; Fili. 3:1) Ko e ngaahi fakamanatu tuʻumaʻu ʻoku tau maʻu fekauʻaki mo hono fakahoko ʻo e ngaahi taumuʻa ʻa e ʻOtuá ʻokú ne fakavaveʻi kitautolu ke tau “leʻo.” (Mk. 13:32-37) Ko hono toutou leaʻaki ʻa e ngaahi moʻoni Fakatohitapú ʻokú ne tokoniʻi kitautolu ke tau tuʻumaʻu ʻi he hala ki he moʻui taʻengatá.—Sāme 119:144.
5 Founga ke Maʻu Ai ʻa e ʻAonga Fakafoʻituituí: Kuo pau ke tau ‘ofeʻi hotau lotó ki he ngaahi fakamanatu ʻa Sihová.’ (Sāme 119:36, NW) ʻI he taimi ʻoku fai ai ha lāulea ki ha kaveinga anga-maheni ʻi ha fakataha ʻa e fakatahaʻangá, ʻoku totonu ke tau teuteu ki muʻa, sio ki he ngaahi konga Tohitapu ʻoku lave ki aí, pea fakalaulauloto ki he founga te tau malava ke ngāueʻaki ai ʻa e fakamatalá. ʻAi ke ʻoua te tau taʻeteuteu ʻa e fakamanatu tohinima ʻi he Ako Fakafaifekau Fakateokalatí, ʻo fakakaukau ʻoku ʻikai ke fiemaʻu ia. (Luke 8:18) Pea ʻoua ʻaupito te tau loto ke hoko ʻo taʻetokanga koeʻuhi ko e ngaahi moʻoni tefito ʻoku faʻa toutou ʻomai ia ʻi heʻetau ngaahi fakatahá.—Hep. 5:11.
6 ʻOfa ke tau fakakaukau tatau mo e tokotaha-tohi-sāmé: “Kuo u hakahaka ʻi he ʻalunga ʻo hoʻo ngaahi fakamoʻoni, ʻo tatau mo ʻete maʻu ha koloa lahi.” (Sāme 119:14) ʻIo, kuo tau ʻosi fanongo ʻi he ngaahi meʻa mahuʻinga ko ʻení ki muʻa, pea ngalingali te tau toe fanongo pē ki ai. Ko e hā hono ʻuhingá? Koeʻuhí he ʻoku ʻafioʻi ʻe Sihova ʻoku fiemaʻu ke tau fanongo kiate kinautolu!