Ko ʻApikale mo Tēvita

ʻOKÚ KE ʻilo pe ko hai ʻa e fefine fakaʻofoʻofa ko ʻena ʻoku haʻu ke fakafetaulaki kia Tēvitá? Ko hono hingoá ko ʻApikale. Ko e fefine naʻe fakakaukau lelei, pea naʻá ne taʻofi ai ʻa Tēvita mei heʻene fai ha meʻa ʻoku kovi. Ka ki muʻa ke tau ako ʻo fekauʻaki mo iá, tau vakai ki he meʻa naʻe hoko kia Tēvitá.

Hili ʻa e hola ʻa Tēvita meia Saulá, naʻá ne toi ʻi ha ʻana. Naʻe haʻu ki ai hono ngaahi tokouá mo e toenga hono fāmilí. Naʻe feʻunga mo e kau tangata ʻe toko 400 naʻe haʻu kiate iá, pea naʻe hoko ʻa Tēvita ko honau taki. Naʻe toki ʻalu ʻa Tēvita ki he tuʻi ʻo Mōapé ʻo ne pehē: ‘Kātaki tuku muʻa ʻa ʻeku tamaí mo ʻeku faʻeé ke mou nofo heni kaeʻoua ke u vakai pe ko e hā ʻe hoko kiate au.’ Pea ki mui ai naʻe kamata leva ke toi ʻa Tēvita mo ʻene kau tangatá ʻi he ngaahi moʻungá.

Naʻe hili ʻa e meʻa ko ʻení pea toki fetaulaki ʻa Tēvita ia mo ʻApikale. Ko hono husepānití ko Nāpale ko e tokotaha maʻu tofiʻa mo koloaʻia. Naʻe ʻi ai ʻene fanga sipi ʻe toko 3,000 mo e fanga kosi ʻe toko 1,000. Ko e tangata anga-kovi ʻa Nāpale. Ka naʻe fuʻu fakaʻofoʻofa ʻaupito ʻa hono uaifi ko ʻApikalé. Kau atu ki ai ʻa ʻene fai ʻa e meʻa ʻoku totonú. ʻI he taimi ʻe taha, naʻe aʻu ʻo ne fakahaofi hono fāmilí. Tau vakai ange pe naʻe anga-fēfē.

Naʻe anga-lelei ʻa Tēvita mo ʻene kau tangatá kia Nāpale. Naʻa nau tokoni ki hono maluʻi ʻo ʻene fanga sipí. Ko ia, ʻi he ʻaho ʻe taha naʻe fekau atu ʻe Tēvita kia Nāpale ʻa e niʻihi ʻo ʻene kau tangatá ʻo kole ha meʻa. Naʻe haʻu ʻa e kau tangata ʻa Tēvitá kia Nāpale lolotonga ia ʻoku nau kosi mo hono kau tokoní ʻa e fulufulu ʻo e fanga sipí. Ko e ʻaho kātoanga ʻeni, pea naʻe lahi ʻa e ngaahi meʻakai lelei ʻa Nāpale ke kai. Ko ia ko e meʻa ʻeni naʻe leaʻaki ʻe he kau tangata ʻa Tēvitá: ‘Kuo mau fai lelei kiate koe. Kuo ʻikai te mau kaihaʻasi hoʻo fanga sipí, ka ne mau tokoni ki hono tauhi iá. Ko ia, kātaki muʻa ʻo ʻomai haʻamau meʻakai.’

Naʻe pehē ʻe Nāpale: ‘Heʻikai te u ʻoatu ʻeku meʻakaí ki ha kau tangata hangē ko kimoutolú.’ Naʻá ne lea ange ʻi ha founga anga-kovi moʻoni, pea naʻe lea kovi ʻo fekauʻaki mo Tēvita. ʻI he foki atu ʻa e kau tangatá ʻo fakahā kia Tēvita ʻo fekauʻaki mo e meʻá ni, naʻe ʻita lahi ʻaupito ʻa Tēvita. Naʻá ne tala ki heʻene kau tangatá: ‘Toʻo hoʻomou heletā!’ Pea naʻa nau fononga atu leva ke tāmateʻi ʻa Nāpale mo ʻene kau tangatá.

Ko ha tokotaha ʻo e kau tangata ʻa Nāpalé, ʻa ia naʻá ne fanongo ki he ngaahi lea anga-kovi naʻe leaʻaki ʻe Nāpalé, naʻá ne tala kia ʻApikale ʻa e meʻa naʻe hokó. ʻI he taimi pē ko iá naʻe teuteu leva ʻe ʻApikale ha meʻakai. Naʻá ne fakaheka leva ia ki ha ngaahi ʻasi peá ne fononga atu leva he halá. ʻI heʻene fetaulaki mo Tēvitá, naʻá ne hifo leva mei he ʻasí, ʻo ne punou ki lalo mo ne pehē: ‘Kātaki tangataʻeiki, ʻoua te ke tokanga ki hoku husepāniti ko Nāpalé. Ko e vale ia, pea ʻokú ne fai ʻa e ngaahi meʻa ngalivale. Ko e meʻaʻofa ʻeni. Kātaki ʻo tali ia, pea ke fakamolemoleʻi kimautolu ʻi he meʻa naʻe hokó.’

Naʻe tali ʻe Tēvita: ‘Ko e fefine poto koe. Kuó ke taʻofi au mei heʻeku tāmateʻi ʻa Nāpale ko hono totongi ki heʻene ngaahi founga anga-koví. Foki koe ki ho ʻapí ʻi he melino.’ Ki mui mai, ʻi he mate ʻa Nāpalé, naʻe hoko ʻa ʻApikale ko e taha ʻo e ngaahi uaifi ʻo Tēvitá.