Ko e Hā Hoʻo Meʻa ʻOku Fakamuʻomuʻá?
1 ʻOku fai ʻe he ngaahi kautaha lotu lahi ʻa e fakamamafa ki hono fai ʻa e ngaahi ngāue ʻofa, hangē ko e tokonaki ʻa e ngaahi fale ki he ako fakamāmaní pe ko e ngaahi fiemaʻu fakafaitoʻó. Kae kehe, ko e Kau Fakamoʻoni ʻa Sihová, lolotonga ʻoku ʻikai ngalo ʻia kinautolu ʻa e “fai lelei, moe foaki” ʻoku nau fakamuʻomuʻa ʻa hono tokoniʻi fakalaumālie ʻo e kakaí.—Hep. 13:16, PM.
2 Sīpinga ʻi he ʻUluaki Senitulí: Naʻe fai ʻe Sīsū ʻa e ngaahi ngāue lelei lahi lolotonga ʻene ngāue fakafaifekau ʻi he māmaní, ka ko ʻene ngāue muʻomuʻá ko e faifakamoʻoni ko ia ki he moʻoní. (Luke 4:43; Sione 18:37; Ng. 10:38) Naʻá ne fekauʻi hono kau muimuí ke nau ‘ō, ʻo ngaohi ʻa e ngāhi kakai kotoa pe ko e kau ako, ʻo akoʻi kinautolu.’ (Mt. 28:19, 20) Pea naʻá ne fakahaaʻi ko e faʻahinga ko ia ʻoku nau ngāueʻi ʻa e tui kiate iá te nau fakahoko ʻi ha tuʻunga lahi ange ʻa e ngāue naʻá ne kamataʻí. (Sione 14:12) Naʻe fakamuʻomuʻa ʻe Sīsū ʻa e ngāue fakamalangá koeʻuhi ʻoku tokoniʻi ai ʻa e kakaí ke nau ʻiloʻi ʻa e hala ki he fakamoʻuí.—Sione 17:3.
3 Naʻe vakai ʻa e ʻapositolo ko Paulá ki heʻene ngāue fakamalangá ko ha “fatongia,” ko ha fiemaʻu ʻe ʻikai lava ke ne tukunoaʻi. (1 Kol. 9:16, 17) Naʻá ne loto-lelei ke fai ha feilaulau pē, kātakiʻi ha ʻahiʻahi pē, pe fuesia ha faingataʻa pē naʻe fiemaʻu, koeʻuhi ke fakahoko ʻa ʻene ngāue fakafaifekaú. (Ng. 20:22-24) Ko e ʻapositolo ko Pitá mo hono ngaahi kaungāmeʻá naʻa nau fakahāhā ha laumālie tatau. Naʻa mo e fehangahangai mo e nofo pilīsoné pea mo e hahá, “naʻe ʻikai tuku ʻenau ako mo malangaʻaki ʻa Sisu, ko e Misaia ia.”—Ng. 5:40-42.
4 Fēfē kitautolu? ʻOku tau fakamuʻomuʻa ʻa e ngāue ʻo hono fanongonongo ʻa e ongoongo lelei ʻo e Puleʻangá mo e ngaohi-ākongá? ʻI he hangē ko Sīsuú, ʻoku tau tokanga moʻoni ki he faʻahinga ʻoku nau “ongosia mo tukuhāusia, ʻo hange ko ha fanga sipi taʻe hanau tauhi”? (Mt. 9:36) Ko e ngaahi meʻa ʻoku lolotonga hoko he māmaní pea mo e kikite faka-Tohitapú ʻoku fokotuʻu mahino mai ai ʻoku vave ke ngata ʻa e fokotuʻutuʻu fulikivanu ko ení! Ko hono manatuʻi ʻa e mahuʻinga ʻo e ngāue fakamalangá te ne ueʻi ai kitautolu ke tau hokohoko atu ʻa e malanga faivelengá.
5 Fakafuofua Ho Ngaahi Tuʻungá: Koeʻuhi ʻoku faʻa liliu ʻa e ngaahi tuʻunga fakafoʻituituí, ʻoku lelei ke fakakaukau ʻi he taimi ki he taimi pe ʻe lava ke tau fai ha ngaahi feʻunuʻaki koeʻuhí ke kau kakato ange ai ʻi he ngāue fakamalangá. Ko ha tuofefine ʻe taha naʻe tāimuʻa tuʻumaʻu ia lolotonga ʻa e ’50 tupú, ’60 tupú, mo e ’70 tupú ka naʻá ne ʻilo naʻe fiemaʻu ke tuku koeʻuhí naʻá ne mahamahaki. Kae kehe, naʻe fakalakalaka ʻi ha taimi ʻa hono tuʻunga moʻui leleí. Naʻá ne fakafuofuaʻi ki mui ʻa hono ngaahi tuʻungá pea fakapapauʻi ai ʻe toe lava pē ke ne tāimuʻa. He fiefia ē ko ia ʻi heʻene kau ki he Ako Ngāue Tāimuʻá ʻi hono taʻu 90! Fēfē koe? ʻOku ofi ho taimi mālōlō mei he ngāué pe maʻu tohi fakamoʻoni akó? ʻE lava ke fakaʻatā koe ʻi he liliu ho ngaahi tuʻungá ke ke tāimuʻa?
6 ʻI he ʻiloʻi ʻe Sīsū ko Māʻatá naʻe “fehākaaki . . . ʻi he fai ʻo ha fuʻu teuteu,” naʻá ne fokotuʻu anga-ʻofa ange te ne utu ʻa e ngaahi tāpuaki lahi ange kapau te ne tauhi ke faingofua ʻa e ngaahi meʻá. (Luke 10:40-42) ʻE lava ke ke fakafaingofuaʻi hoʻo founga moʻuí? ʻOku fiemaʻu moʻoni ki he husepānití mo e uaifí fakatouʻosi ke na ngāue fakamāmani? Kapau ʻe fai ha ngaahi feʻunuʻaki, ʻe lava ke moʻui ʻa e fāmilí ʻi ha paʻanga hū mai pē ʻe taha? Kuo maʻu ʻaonga fakalaumālie ʻa e tokolahi ʻi hono fai ʻa e ngaahi feʻunuʻaki koeʻuhi ke kau lahi ange ai ʻi he ngāue fakafaifekaú.
7 ʻOfa ke tau muimui kotoa ʻi he sīpinga naʻe fokotuʻu ʻe Sīsū mo e kau ʻapositoló! ʻE lava ke tau maʻu papau ʻa e tāpuaki ʻa Sihová ʻi heʻetau ngaahi feinga moʻoni ke kau kakato ʻi he ngāue mātuʻaki mahuʻinga ko hono malangaʻi ʻa e ongoongo lelei ʻo e Puleʻangá.—Luke 9:57-62.