ʻE Maʻu Moʻui ʻa e Kakai Kotoa Pē
1. ʻOku fakatuʻunga ʻi he hā hotau ongoongo ki he ʻOtuá?
1 Kuo fakaava ʻe he ʻofa maʻataʻatā ʻa e ʻOtuá ʻa e hala ki he fakamoʻuí. Ko e finangalo ia ʻo Sihová ke “maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Tim. 2:3, 4) Ko hotau ongoongo ki he ʻOtuá ʻoku fakatuʻunga ia, ʻo ʻikai ʻi hotau matakalí, tuʻunga fakasōsialé, ngaahi malavá pe fōtunga hā mai ʻi tuʻá, ka ʻi heʻetau ngāueʻi ʻa e tui ki he feilaulau huhuʻi ʻa Sīsuú. (Sione 3:16, 36) ʻI hotau tuʻunga ko e kaungāngāue ʻo e ʻOtuá, kuo pau ke tau fakaʻatā kitautolu mei ha faʻahinga filifilimānako pē, ʻa ia te ne tākiekina hotau lotó ke fakataleʻi ʻa e kakai ʻa ia ʻoku finangalo ʻa Sihova ke ne talí.
2, 3. Ko e hā te ne tokoniʻi kitautolu ke ʻoua te tau fakamāuʻi ʻa e kakaí ʻi honau fōtunga hā mai ʻi tuʻá?
2 Fakaʻehiʻehi mei he Fakamāuʻí: ʻOku ʻafio ʻa Sihova ki he tuʻunga ʻoku ʻi ai ʻa e kakaí ʻi lotó, ʻo ʻikai ha loto-kovi pe filifilimānako. (1 Sam. 16:7) ʻOkú ne toe vakai foki kia kinautolu ki he meʻa te nau malavá. Ko ia ai, ʻokú ne hāngaifofonga mai ki he faʻahinga ko ia ʻoku nau fiemaʻu ke fakahōifuaʻi iá ʻoku nau manakoa. (Hak. 2:7, NW) ʻOku tau vakai ki he niʻihi kehé ʻo hangē ko e ʻOtuá?
3 Ko e kakai ʻe niʻihi ʻoku tau fetaulaki mo ia ʻi he ngāue fakafaifekaú te nau fakaʻohovaleʻi nai kitautolu ʻi honau fōtunga hā maí. ʻOku nau ʻai vala noaʻia pe taʻefakanānā nai, felekeu ʻa e kavá pe tui ha ngaahi foʻi hau ʻi he ihú pe loungutú. Ko e niʻihi ʻoku ʻikai nai ke ʻi ai hanau ʻapi. ʻE ngaohikoviʻi nai kitautolu ʻe he niʻihi. ʻI he ʻikai ke fakamāuʻi ʻa e faʻahinga peheé ʻo hangehangē ʻe ʻikai ʻaupito te nau hoko ko ha kau lotu kia Sihová, ʻoku totonu ke tau maʻu ha fakakaukau pau, “he ko kitautolu foki ʻi muʻa, ko e kau taʻeloto, talangataʻa, mo ʻalu he.” (Tai. 3:3) ʻI he ʻiloʻi ení, te tau vēkeveke leva ke malanga ki he tokotaha kotoa, naʻa mo e faʻahinga ko ia ʻoku nau hā ngali mei honau ngaahi fōtunga hā mai ʻi tuʻá, ʻoku ʻikai ke nau tāú.
4, 5. Ko e hā ʻoku tau ako mei he ngaahi faʻifaʻitakiʻanga ʻa Sīsū mo Paulá?
4 Faʻifaʻitakiʻanga he ʻUluaki Senitulí: Naʻe loto-lelei ʻa Sīsū Kalaisi ke tokoniʻi ʻa e faʻahinga ko ia ʻoku liʻaki nai ʻe he niʻihi kehé ʻo pehē ʻoku ʻikai toe ʻi ai ha ʻamanaki kia kinautolú. (Luke 8:26-39) Lolotonga naʻe ʻikai ʻaupito te ne fakamolemoleʻi ʻa e ngaahi tōʻongafai naʻe halá, naʻá ne ʻiloʻi ʻe lava ke femoʻuekina ʻa e kakaí ʻi ha founga hala ʻo e moʻuí. (Luke 7:37, 38, 44-48) Ko ia ai, naʻá ne fakahāhā naʻá ne maʻu ʻa e mahino, ʻi he “langa hono fatu ʻi he ʻofa kiate kinautolu, koeʻuhi ko ʻenau hange ha fanga sipi taʻe hanau tauhi.” (Mk. 6:34) ʻE lava ke tau faʻifaʻitaki kakato ange ki heʻene faʻifaʻitakiʻangá?
5 Naʻe tolomakaʻi ʻa e ʻapositolo ko Paulá, haha mo tuku pilīsone. (Ng. 14:19; 16:22, 23) Naʻe fakatupunga nai ia ʻe he ngaahi hokosia kakaha peheé ke ne hoko ʻo loto-ʻita pea ke fakamulitukuʻaki naʻá ne fakamoleki noaʻia hono taimí ʻi ha ngaahi fonua mo ha ngaahi kulupu fakamatakali pau? ʻIkai ʻaupito. Naʻá ne ʻiloʻi ʻe lava ke maʻu ʻa e faʻahinga tāutaha ʻoku nau loto-totonú ʻi he haʻohaʻonga ʻo e kulupu fakamatakali kotoa pē, pea naʻá ne fakapapauʻi ke kumi kia kinautolu. Ko e founga nai ia ʻoku tau vakaiʻaki ki he faʻahinga ʻi hotau feituʻu ngāué ʻa ia ʻoku nau mei he ngaahi puipuituʻa mo e ngaahi anga fakafonua kehekehé?
6. Ko e hā ʻa e ola ʻoku lava ke fakahoko ʻe heʻetau fakakaukaú ki he faʻahinga foʻou ʻi he ngaahi fakataha ʻa e fakatahaʻangá?
6 Talitali Lelei ʻa e Niʻihi Kehé ʻi he ʻAhó Ni: Ko e tokolahi ʻo e kakai ʻa e ʻOtuá ʻoku nau fiefia he naʻe talitali lelei kinautolu ki he fakatahaʻangá ʻe he fanga tokoua mo e fanga tuofāfine naʻe ʻikai ke tākiekina kinautolu ʻe he fōtunga hā mai ʻi tuʻá. Naʻe aʻu ha tangata naʻe kava felekeu, ʻulu loloa ki he umá, pea tui e vala likoliko, ki ha Fale Fakatahaʻanga ʻi Siamane. Naʻá ne maʻu ha ongoongo kovi. Ka neongo ia, naʻe talitali māfana ia ʻi he fakatahá. Naʻe maongo lahi kiate ia he naʻá ne toe foki ki ai hili mei ai ha uike. ʻI ha taimi nounou, naʻá ne fakamaʻa hono fōtunga hā maí, taʻofi ʻene ifí peá ne ʻai ke fakalao ʻene nonofo mo hono kaumeʻa fefiné. ʻIkai ke fuʻu fuoloa, ko kinaua mo hona ongo ʻofefiné naʻa nau tauhi kia Sihova ko ha fāmili fāʻūtaha.
7. ʻE lava fēfē ke tau faʻifaʻitaki ki hotau ʻOtua taʻefilifilimānakó?
7 ʻI he faʻifaʻitaki ki hotau ʻOtua taʻefilifilimānakó, ʻofa ke tau fakaaʻu ki he tokotaha kotoa ʻa e fakaafe ke maʻu ʻaonga mei he ʻofa maʻataʻatā ki he tokotaha kotoa ʻa e ʻOtuá.
[Fakamatala ʻi he peesi 3]
“ʻOku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.”—Ng. 10:34, 35.