Ko e Hā ʻOku Ako ʻe he Niʻihi Kehé mei Heʻenau Siofi Koé?

1. Ko e hā naʻe ako ʻe he kau ākonga ʻa Sīsuú mei heʻenau siofi iá?

¹ Naʻe pehē ʻe Sīsū: “Mou fua fakataha mo au ʻa ʻeku ʻioké, pea ako meiate au.” (Mt. 11:29, NW, fkm. ʻi lalo) ʻOku hā mahino, naʻá ne akoʻi ʻa e niʻihi kehé ʻaki hono fokotuʻu ha faʻifaʻitakiʻanga lelei, ʻo ʻikai ʻaki ʻene leá pē. Fakakaukau atu ki he meʻa naʻe ako ʻe he kau ākongá mei heʻenau siofi ʻa Sīsuú. Naʻá ne anga-malū, anga-lelei mo anga-ʻofa. (Mt. 8:1-3; Mk. 6:30-34) Naʻá ne anga-fakatōkilalo moʻoni. (Sione 13:2-5) ʻI heʻenau ō fakataha mo Sīsū ʻi he ngāue fakafaifekaú, naʻe sio ai ʻa e kau ākongá ko ha tokotaha ngāue taʻehelaʻia ia ʻa ia naʻe ola lelei ʻa ʻene akoʻi ʻa e moʻoní ki he niʻihi kehé. (Luke 8:1; 21:37, 38) ʻOku anga-fēfē hono ueʻi ʻa e niʻihi kehé ʻi heʻenau siofi kitautolu ʻi he ngāue fakafaifekaú?

2. ʻOku anga-fēfē ʻa e maongo ʻa hotau fōtungá mo e tōʻongá ki he faʻahinga ʻi he ʻapí?

² Faʻahinga ʻi he ʻApí: Ko ʻetau vala fakanānaá, ʻulungaanga leleí, mo e mahuʻingaʻia fakafoʻituitui loto-moʻoni ʻi he kakaí ʻoku lava ke ʻi ai hono kaunga mālohi ki he faʻahinga ʻi he ʻapí. (2 Kol. 6:3; Fili. 1:27) ʻOku nau fakatokangaʻi ʻoku tau toutou ngāueʻaki ʻa e Tohi Tapú. ʻOku maongo ki he niʻihi ʻa ʻetau fanongo anga-fakaʻapaʻapa ʻi he taimi ʻoku nau lea aí. ʻOua ʻaupito ʻe fakasiʻisiʻia ʻa e lava ke tohoakiʻi mai ʻa e kakaí ki he pōpoaki ʻo e Puleʻangá ʻi hono fokotuʻu ha faʻifaʻitakiʻanga leleí.

3. Ko e hā ʻa e ola lelei ʻe lava ke maʻu meia kitautolu ʻe hotau fanga tokouá?

³ Ko Hotau Fanga Tokouá: Fakakaukau foki ki he ola lelei ʻe lava ke maʻu meia kitautolu ʻe hotau fanga tokouá. Ko ʻetau faivelenga ʻi he ngāue fakafaifekaú ʻoku pipihi. Hangē ko e fakamāsila ʻe he ʻaioné ʻa e ʻaioné, ko ʻetau tuʻuaki teuteu leleí ʻe ueʻi ai ʻa e niʻihi kehé ke nau fakamāsilaʻi ʻenau pōtoʻi ʻi he ngāue fakaʻevangelioó. (Pal. 27:17) Ko ʻetau faivelenga ʻi hono tauhi ha lēkooti totonu ʻo e faʻahinga ʻoku nau fakahaaʻi ʻa e mahuʻingaʻiá pea foki vave leva ki aí ʻoku tokoni ia ki hono ueʻi ʻa e niʻihi kehé ke nau fai ʻa e meʻa tatau. Te tau hoko ai ko ha tākiekina lelei ki he kaungāngāué ʻaki hono fakahoko kakato ʻetau ngāue fakafaifekaú.—2 Tim. 4:5.

4. Ko e hā ʻoku totonu ai ke tau sivisiviʻi ʻi he taimi ki he taimi ʻa ʻetau faʻifaʻitakiʻangá?

⁴ Ko e hā ʻoku ʻikai ai ke ke sivisiviʻi ʻi he taimi ki he taimi ʻa e meʻa ʻokú ke fai mo leaʻakí mo e founga hoʻo ueʻi ʻa e niʻihi kehé fakafou ʻi hoʻo faʻifaʻitakiʻangá? Ko ʻetau faʻifaʻitakiʻanga leleí ʻe fakahōifuaʻi ai ʻa Sihova pea ʻai ai ke tau malava ʻo fakaongo atu ʻa e fakakaukau ʻa e ʻapositolo ko Paulá ʻi heʻene fakahaaʻi: “Mou hoko ko e kau faʻifaʻitaki kiate au, ʻo hange foki ko ʻeku faʻifaʻitaki ʻaku kia Kalaisi.”—1 Kol. 10:34 (11:1, PM).