Mālōloó—Ko ha Matapā Ia ke Fakalahi Ai ʻa e Ngāué?
1 ʻOku fakaʻamua ʻe he kakai ngāue mālohi tokolahi ʻa e taimi ʻe fakatauʻatāinaʻi ai ʻe he mālōloó kinautolu mei he ngāué mo e ngaahi faingataʻa ʻo e ngāue fakamāmaní. Neongo ia, ʻoku faʻa iku ʻa e mālōloó ki he ongoʻi taʻemahuʻingaʻia, pipikoʻia, mo e motuʻa vave. Ko e ʻikai ha ngāue mohu taumuʻá ʻe lava ke nōfoʻi ai ʻa e ʻatamaí ʻi he hohaʻa fekauʻaki mo kitá. Naʻe līpooti ʻi ha nusipepa Pelēsila ko e kau ngāue fakapuleʻanga mālōloó naʻa nau lāunga fekauʻaki mo e ngaahi palopalema mei he ‘taʻefiemālie, ʻiteʻita, taʻemalu, mo e mole ʻo e falalá ʻi he loto-mafasiá pea mo e ongoʻi ʻoku ʻikai ha taumuʻa ʻenau moʻuí.’
2 ʻI hono kehé, ʻoku vakai ʻa e kau Kalisitiane tokolahi ki he tuʻunga foʻou ko eni ʻi heʻenau moʻuí ko ha matapā ia ke fakalahi ai ʻa e ngāue fakalaumālié. Ko ha tokoua ʻe taha ʻa ia naʻá ne kamata tāimuʻa ʻi he uike ʻe ua hili ʻene aʻu ki hono taʻu 65 naʻá ne pehē: “Kuo ʻikai ʻaupito te u hokosia ha vahaʻa taimi ʻi heʻeku moʻuí ʻe mātuʻaki fonu mahuohua ʻi he ngaahi tāpuakí ʻo hangē ko e taʻu ʻe hongofulu kuo ʻosi ʻo e ngāue tāimuʻá.” Naʻe tohi ha ongo meʻa: “Ko homa ngaahi taʻu lelei taha moʻoní naʻe kamata ia heʻema kamata ngāue tāimuʻá.” ʻIo, ki he tokolahi, ʻoku ʻomai ʻe he mālōloó ha faingamālie lelei taha ke fakalahi ai ʻenau ngāue fakafaifekaú pea utu ai ʻa e ngaahi tāpuaki lahi meia Sihova.
3 Hanganaki Femoʻuekina mo Fua Lahi: Ko e tokolahi ʻa ia ʻoku nau mālōlō he taimi ní naʻa nau tupu hake ʻi he ʻikai ʻa e ngaahi meʻangāue ʻa ia ʻoku lahi ʻi he ʻaho ní pea naʻa nau ako ke ngāue mālohi mei he taʻu siʻí. Neongo ʻoku ʻikai nai te nau kei maʻu ʻa e mālohi ʻo e toʻutupú, ʻoku nau kei hoko pē ko e kau ngāue fua lahi. ʻI he feituʻu vaʻa ʻe taha, ko e peseti ʻe 22 ʻo e kau tāimuʻá—ko e fanga tokoua mo e fanga tuofāfine ʻe toko 20,000 nai—ʻoku nau ʻi he tuʻunga ʻo e taʻu 60. Ko e faʻahinga taʻumotuʻa ange ko ení ʻoku nau tokoni lahi ki he ngāue fakamalangá. Ko ʻenau taukeí mo e ngaahi ʻulungaanga fakaʻotuá ʻoku hoko ia ko e fakakoloa ki he ngaahi fakatahaʻanga ʻoku nau ngāue aí.—Sem. 3:17, 18.
4 Ko e hanganaki femoʻuekina ʻi he ngāue fakafaifekau faka-Kalisitiané ʻoku tokoni ia ki he moʻui lelei ange pea mo ha tuʻunga fakalakalaka ʻi he moʻuí. Ko ha tuofefine taʻu 84 ʻa ia naʻá ne kamata tāimuʻa ʻi he taimi naʻá ne mālōlō aí naʻá ne pehē: “Ko hono maʻu ha ngaahi ako Tohitapu lahi mo e kakai mahuʻingaʻiá kuo tokoniʻi ai au ke hanganaki longomoʻui fakaʻatamai. ʻOku ʻikai haʻaku kā, ko ia ʻoku ou lue lalo lahi. ʻOku tauhi ai au ke u moʻui lelei.” Naʻe pehē ʻe ha ongo meʻa tāimuʻa taʻumotuʻa: “ʻOku tauhi kimaua ʻe he ngāué ke ma mālohi fakaʻatamai mo fakaesino. ʻOkú ma fakataha maʻu pē ai. ʻOkú ma kakata lahi pea fiefia ʻi he moʻuí.”
5 Ngāue ʻi he Feituʻu ʻOku ʻI Ai ha Fiemaʻú: Ko e kau Kalisitiane ʻe niʻihi kuo nau mālōlō ʻa ia ʻoku nau maʻu ʻa e ngaahi tuʻunga lelei fakapaʻangá kuo nau hiki ke ngāue ʻi he feituʻu ʻoku fiemaʻu lahi ange ai ʻa e kau malanga ʻo e Puleʻangá. Kuo fakalahi ʻe he niʻihi ʻenau ngāue fakafaifekaú ke ngāue ʻi ha malaʻe lea muli. ʻI he hangē ko e ʻapositolo ko Paulá, ko e kau malanga faivelenga ko ení ‘ʻilonga ha meʻa ʻoku nau fai, ʻoku nau fai koeʻuhi ko e Kosipelí, koeʻuhi ke nau ʻinasi ai fakataha mo e kakai kehé.’—1 Kol. 9:23.
6 Naʻe kamata tāimuʻa ha ongo meʻa ʻe taha ʻi he hili hono tauhi hake hona foha ʻe toko ua. Hili ha ngaahi taʻu lahi ʻo e tāimuʻá, naʻá na kamata ako ai ʻa e lea faka-Siainá. ʻI he taimí ni ʻi hona taʻu 70 tupú, naʻá na toki fiefia ai ʻi he sio ki he kulupu Siaina naʻá na ngāue fakataha mo iá ʻi heʻene hoko ko ha fakatahaʻangá. Ko ha tāpuaki moʻoni ē kuo hoko ki ha ongo meʻa hangē ko ení!
7 ʻIkai ha Mālōlō mei he Ngāue Fakafaifekaú: Lolotonga ko e tokolahi taha ʻo e kakaí ʻoku iku ʻo nau mālōlō mei heʻenau ngāue fakamāmaní, ʻoku ʻikai ha mālōlō ki ha Kalisitiane pē mei he ngāue ʻa e ʻOtuá. Kuo pau ke hokohoko atu faitōnunga kotoa ke “aʻu ki he ngataʻanga.” (Mt. 24:13, 14) Ko e moʻoni, ʻi he taʻumotuʻá, ʻoku ʻikai malava ai ʻa e niʻihi ke fai ʻa e meʻa lahi ʻo hangē ko ia naʻa nau fai ki muʻa ʻi he ngāue ʻa Sihová. Ka ko e meʻa fakalototoʻa ē ke sio kia kinautolu ʻoku nau fai ʻa e meʻa ʻoku nau malavá ʻi ha founga ʻaufuatō! ʻOku fakapapauʻi ʻe he Folofola ʻa e ʻOtuá kia kinautolu ʻe ʻikai fakangaloʻi ʻe Sihova ʻenau ngāué pea mo e ʻofa ʻoku nau fakahāhā ki hono huafá.—Luke 21:1-4; Hep. 6:10.
8 Kapau ʻokú ke fakaofiofi ki he taʻu mālōloó, ko e hā ʻoku ʻikai ai te ke fakakaukau faʻa lotu ki he founga ʻe lava ke ke ngāuekakatoʻaki ai ʻa ho ngaahi tuʻunga feliliuakí? ʻI he tokoni fakaʻotuá, te ke ʻiloʻi nai ai ʻoku fakaava atu ʻe he mālōloó kia koe ha matapā ke fakalahi ai ʻa e ngāue ʻoku ʻoatu ai ʻa e fakahīkihiki kia Sihová pea mo e ngaahi tāpuaki lahi.—Sāme 148:12, 13.