Fakaleleiʻi ʻEtau Pōtoʻi ʻi he Ngāue Fakafaifekaú—ʻAi ha Lēkooti ʻo e Faʻahinga Mahuʻingaʻiá

“Tokanga maʻu ai pē kiate koe tonu pea ki hoʻo faiako ʻoku faí.” (1 Tīm. 4:16) Ko e akonaki fakamānavaʻi eni ʻa e ʻapositolo ko Paula kia Tīmote ʻa ia ʻoku fakahaaʻi ai, tatau ai pē pe ʻoku tau kei foʻou pe taukei ʻoku totonu ke tau feinga mālohi ke fakalakalaka. Ke tokoniʻi kitautolu ke fai iá, ko ha ngaahi kupu hokohoko foʻou ʻe fakakaveinga “Fakaleleiʻi ʻEtau Pōtoʻi ʻi he Ngāue Fakafaifekaú” ʻe hā atu ia ʻi he Ko ʻEtau Ngāue Fakafaifekau. ʻI he kupu taki taha ʻe lāulea ai ki ha ngaahi pōtoʻi mahuʻinga mo ha ngaahi fokotuʻu ʻe niʻihi ʻi he founga ke fakalakalaka ai. ʻI he lolotonga ʻo e māhiná, fakalototoʻaʻi ʻa e tokotaha kotoa ke fai ha tokanga makehe ki he ngaahi fokotuʻu pōtoʻi ko iá. ʻI he fakaʻosinga ʻo e māhiná, ʻe ʻi ai ha konga ʻi he Fakataha Ngāué ʻe ʻomai ai ha faingamālie ke fakamatala ki he founga naʻa tau maʻu ʻaonga ai, ʻi he tokangataha ʻi hono ngāueʻaki ʻa e pōtoʻi ko iá. ʻI he māhiná ni ʻoku fakalototoʻaʻi kotoa kitautolu ke ngāue ki hono lēkooti ʻa e faʻahinga mahuʻingaʻiá.

ʻUhinga ʻOku Mahuʻinga Aí: Ke fakakakato ʻetau ngāue fakafaifekaú, kuo pau ke tau toe fai ʻa e meʻa lahi ange ʻo ʻikai ko e malanga pē. Kuo pau ke tau toe foki ki he faʻahinga naʻa nau fakahāhā ha mahuʻingaʻia pea akoʻi kinautolu, ʻa ia ko hono fuʻifuʻi ʻa e tenga ʻo e moʻoni kuo tau toó. (Māt. 28:19, 20; 1 Kol. 3:6-9) ʻOku fiemaʻu ki ai ʻa e toe kumi ki he tokotaha ko iá, talanoa fekauʻaki mo e meʻa ʻokú ne tokanga ki aí, pea hoko atu ʻi he meʻa naʻa tau fetalanoaʻaki ai ki muʻá. Ko ia ai, ʻi he taimi ʻoku tau maʻu ai ha tokotaha mahuʻingaʻia ʻoku fiemaʻu ke lēkooti ia.