ʻOku ʻAonga Fēfē Kiate Kitautolu ʻa e Ngaahi Tefitoʻi Moʻoni ʻi he Tohi Tapú?

1. Ko e hā ʻoku fiemaʻu ai kiate kitautolu ha tatakí?

Ko hotau Tokotaha-Fakatupú ʻoku poto ange ia ʻiate kitautolu. ʻI he tuʻunga ko ha Tamai ʻofá, ʻokú ne tokanga mai kiate kitautolu. Pehē foki, naʻe ʻikai te ne fakataumuʻa ke ʻoua te tau fakafalala ange kiate ia. (Selemaia 10:23) Ko ia ʻoku hangē tofu pē ko e fiemaʻu ki ha kiʻi tama ʻa e tataki ʻa e ongo mātuʻá, ʻoku fiemaʻu kiate kitautolu kotoa ʻa e tataki ʻa e ʻOtuá. (ʻAisea 48:17, 18) ʻOku tokonaki mai ʻe he ngaahi tefitoʻi moʻoni ʻi he Tohi Tapú ʻa e tataki ʻa ia ko ha meʻaʻofa mei he ʻOtuá.​—Lau ʻa e 2 Tīmote 3:16.

ʻOku akoʻi mai ʻe he ngaahi lao mo e ngaahi tefitoʻi moʻoni ʻa Sihová kiate kitautolu ʻa e founga lelei taha ʻo e moʻuí he taimí ni mo fakahāhaaʻi mai kiate kitautolu ʻa e founga ʻe lava ke tau maʻu ai ʻa e ngaahi pale taʻengata ʻi he kahaʻú. Koeʻuhi ko e ʻOtuá naʻá ne fakatupu kitautolú, ʻoku totonu pē ke tau fai ha tali loto-houngaʻia ki heʻene tatakí.​—Lau ʻa e Saame 19:7, 11; Fakahā 4:11.

2. Ko e hā ʻa e ngaahi tefitoʻi moʻoni ʻi he Tohi Tapú?

Ko e ngaahi tefitoʻi moʻoni ʻi he Tohi Tapú ko ha ngaahi fakakaukau tefito. Ko e ngaahi laó, ʻi he tafaʻaki ʻe tahá, ʻe ngāueʻaki nai ia ki ha ngaahi tuʻunga pau. (Teutalōnome 22:8) Kuo pau ke tau ngāueʻaki ʻa e mafai fakaefakakaukaú ke mahinoʻi ʻa e anga hono ngāueʻaki ʻo ha tefitoʻi moʻoni ʻi ha tuʻunga pau. (Palōveepi 2:10-12) Ko e fakatātaá, ʻoku akoʻi mai ʻe he Tohi Tapú ko e moʻuí ko ha meʻaʻofa ia mei he ʻOtuá. ʻE lava ʻe he tefitoʻi moʻoni tefito ko iá ke ne tataki kitautolu ʻi he ngāué, ʻi ʻapi, pea ʻi he lolotonga ʻo ha fononga. ʻOkú ne taki kitautolu ke tau fai ha teuteu ki muʻa, ke tau malu ai.​—Lau ʻa e Ngāue 17:28.

3. Ko fē ʻa e ongo tefitoʻi moʻoni ʻoku mātuʻaki mahuʻingá?

Naʻe lea ʻa Sīsū ʻo kau ki ha ongo tefitoʻi moʻoni ʻoku mātuʻaki mahuʻinga. ʻOku fakahaaʻi mai ʻe he ʻuluakí ʻa e taumuʻa tefito ʻo e moʻui ʻa e faʻahinga ʻo e tangatá​—ke nau ʻilo ʻa e ʻOtuá, ke ʻofa kiate ia, pea ke tauhi faitōnunga kiate ia. Ko e ʻuluaki tefitoʻi moʻoni ko ení ʻoku totonu ke tau fakakaukau ki ai ʻi he kotoa ʻo ʻetau ngaahi filí. (Palōveepi 3:6) Ko e faʻahinga ʻoku nau moʻuiʻaki ʻa e tefitoʻi moʻoni ko ení ʻoku nau hoko ko e kaumeʻa ʻo e ʻOtuá, maʻu ʻa e fiefia moʻoní, pea mo e moʻui taʻengatá.​—Lau ʻa e Mātiu 22:36-38.

Ko e tefitoʻi moʻoni hono uá ʻoku lava ke ne tataki kitautolu ki ha ngaahi vahaʻangatae melino mo e niʻihi kehé. (1 Kolinitō 13:4-7) Ko hono ngāueʻaki ʻa e tefitoʻi moʻoni ko eni hono uá ʻoku kau ki ai ʻa e faʻifaʻitaki ki he founga ʻo e fakafeangai ʻa e ʻOtuá ki he kakaí.​—Lau ʻa e Mātiu 7:12; 22:39, 40.

4. ʻOku ʻaonga fēfē ʻa e ngaahi tefitoʻi moʻoni ʻi he Tohi Tapú kiate kitautolu?

ʻOku akoʻi ʻe he ngaahi tefitoʻi moʻoni ʻi he Tohi Tapú ʻa e ngaahi fāmilí ki he founga ke fāʻūtaha ai ʻi he ʻofá. (Kolose 3:12-14) ʻOku maluʻi foki ʻe he Folofola ʻa e ʻOtuá ʻa e ngaahi fāmilí ʻaki hono akoʻi mai ha toe tefitoʻi moʻoni tataki ʻe taha​—ko e nofo malí ʻoku totonu ke tuʻuloa.​—Lau ʻa e Sēnesi 2:24.

ʻI he muimui ki he ngaahi akonaki ʻa e Tohi Tapú, ʻe lava ke tau maluʻi ai hotau tuʻunga lelei fakamatelié mo fakaeongó. Ko e fakatātaá, ʻoku faʻa saiʻia ange ʻa e kau pule ngāué ʻi he kau ngāue ko ia ʻoku nau moʻuiʻaki ʻa e ongo tefitoʻi moʻoni ʻi he Tohi Tapú ʻa ia ko e faitotonú mo e ngāue tōtōiví. (Palōveepi 10:4, 26; Hepelū 13:18) ʻOku toe akoʻi kitautolu ʻe he Folofola ʻa e ʻOtuá ke tau fiemālie pē ʻi he ngaahi meʻa ʻoku fiemaʻu paú pea ke fakamahuʻingaʻi ʻa e kaumeʻa mo e ʻOtuá ʻo māʻolunga ia ʻi he ngaahi meʻa fakamatelié.​—Lau ʻa e Mātiu 6:24, 25, 33; 1 Tīmote 6:8-10.

Ko hono ngāueʻaki ʻa e ngaahi tefitoʻi moʻoni ʻi he Tohi Tapú ʻoku lava ke ne maluʻi ʻetau moʻui leleí. (Palōveepi 14:30; 22:24, 25) Ko e fakatātaá, ko e pipiki ki he lao ʻa e ʻOtuá ki he konaá ʻoku maluʻi ai kitautolu mei he ngaahi mahaki fakatupu maté mo e ngaahi fakatuʻutāmakí. (Palōveepi 23:20) ʻOku fakaʻatā kitautolu ʻe Sihova ke tau inu ʻa e ngaahi inu ʻolokaholó kae fakafuofua pē. (Saame 104:15; 1 Kolinitō 6:10) ʻOku ʻaonga kiate kitautolu ʻa e ngaahi tefitoʻi moʻoni ʻa e ʻOtuá ʻi heʻene akoʻi kitautolu ke tau maluʻi ʻo ʻikai ngata pē ʻi he ngaahi meʻa ʻoku tau faí kae toe pehē foki ki heʻetau ngaahi fakakaukaú. (Saame 119:97-100) Kae kehe, ʻoku ʻikai ke fakaʻapaʻapaʻi ʻe he kau Kalisitiane moʻoní ʻa e ngaahi tuʻunga ʻa e ʻOtuá koeʻuhí pē ki ha lelei maʻanautolu. ʻOku nau fai iá ke lāngilangiʻia ai ʻa Sihova.​—Lau ʻa e Mātiu 5:14-16.