Ngāueʻaki “Ko ha Talateu ki he Folofola ʻa e ʻOtuá”—Ke Kamata ha Fetalanoaʻaki
1. Ko e hā ʻa e meʻangāue foʻou kuo tau maʻu ki he ngāue fakafaifekaú?
1 Kuo ʻi ai ha konga ʻi he kamataʻanga ʻo e Tohi Tapu foʻou ʻa e New World Translation ʻoku ui “Ko ha Talateu ki he Folofola ʻa e ʻOtuá.” ʻE lava fēfē ke tau ngāueʻaki ʻa e meʻangāue foʻou ko ení ʻi he taimi ʻoku teuteu ai ki he ngāue fakafaifekaú? Ko e ngaahi konga Tohi Tapu ʻi lalo ʻi he ngaahi kaveinga Fakatohitapu kehekehe, ʻoku meimei tatau ia mo e anga hono fokotuʻutuʻu ʻo e tohi Reasoning, ʻoku lava ke ʻaonga ʻaupito ʻi hono kamataʻi ha fetalanoaʻaki.
2. ʻI he founga fē ʻe lava nai ke tau ngāueʻaki ʻa e “Ko ha Talateu ki he Folofola ʻa e ʻOtuá” ʻi he ngāue fakafaifekaú?
2 Te ke ngāueʻaki nai ʻa e fehuʻi 8 pea pehē: “ʻOku mau ʻaʻahi nounou mai ki he ngaahi kaungāʻapí koeʻuhi ʻoku fifili ʻa e kakai tokolahi, ‘ʻOku totonu ke tukuakiʻi ʻa e ʻOtuá ki he faingataʻaʻia ʻa e faʻahinga ʻo e tangatá?’ [ʻI he ngaahi feituʻu ngāue ʻe niʻihi, ʻoku ola lelei ange ke fakaʻaliʻali ʻa e fehuʻí ki he tokotaha-ʻapí.] Ko e hā hoʻo fakakaukaú? [Tuku ke ne tali.] ʻOku ʻomai ʻi he Tohi Tapú ʻa e tali fakafiemālie ki he fehuʻi ko iá.” ʻI he ngaahi konga Tohi Tapu ʻoku haá lau ha veesi ʻe taha pe lahi ange mei he Tohi Tapú. Kapau ʻoku fakahāhā ʻe he tokotaha-ʻapí ha mahuʻingaʻia, ʻe lava ke ke fakahaaʻi kiate ia ʻa e ngaahi fehuʻi ʻe 20 ʻoku hā ʻi he talateú pea tala ange ke ne fili ha fehuʻi ke lāulea ki ai ʻi he ʻaʻahi hokó. Pe ko hono tuʻuaki ange ʻa e taha ʻo ʻetau ʻū tohi ako ko ia ʻoku ʻi ai ʻa e fakamatala lahi ange ki he kaveinga naʻá mo toki lāulea ki aí.
3. ʻE anga-fēfē haʻatau ngāueʻaki ʻa e “Ko ha Talateu ki he Folofola ʻa e ʻOtuá” ke kamata ha fetalanoaʻaki mo ha kakai ʻoku ʻikai te nau kau ki ha lotu pe ʻikai tui ki he ʻOtuá?
3 ʻE lava ke tokoni ʻa e fehuʻi 4 mo e 13 ki he 17 tautefito ʻi he taimi ʻoku malanga ai ki he kakai ʻoku ʻikai te nau kau ki ha lotu pe ʻikai tui ki he ʻOtuá. Ko e fakatātaá, ʻe lava nai ke ke ngāueʻaki ʻa e fakamatala mei he fehuʻi 17 pea pehē: “ʻOku mau ʻaʻahi nounou mai ke ʻoatu ha ngaahi tokoni ki he ngaahi fāmilí. ʻI he ʻahó ni ʻoku fehangahangai ʻa e ngaahi fāmilí mo e ngaahi pole lahi, ʻokú ke loto-tatau nai mo ia? [Tuku ke ne tali] Ko e ngaahi hoa mali lahi ʻoku nau maʻu ʻa e tokoni mei he ngaahi lea fakapotopoto ko ení: “ʻOku totonu ki he uaifí ke ne fakaʻapaʻapa loloto ki hono husepānití.” [Kapau ko hoʻo fakalea ki ha uaifi, ʻe ʻikai fiemaʻu ke ke lave ko e toʻo eni mei he ʻEfesō 5:33, ka te ke liliu hoʻo fakalea ki he ʻEfesō 5:28 kapau ko ha husepāniti.] ʻOkú ke fakakaukau ʻe ʻaonga hono ngāueʻaki ʻa e fakahinohino ko ení ʻi he nofo malí?”
4. Ko e hā te ke leaʻaki nai ʻi he fakaʻosi hoʻo fetalanoaʻaki mo ha taha ʻoku ʻikai kau ki ha lotu pe ʻikai tui ki he ʻOtuá?
4 ʻI he fakaʻosi hoʻomo fetalanoaʻakí fai ha ngaahi fokotuʻutuʻu ke hoko atu ʻa e fetalanoaʻakí ʻi ha taimi kehe. ʻE lava ke ke fokotuʻutuʻu ke talanoa nai fekauʻaki mo ha taha ʻo e ngaahi konga Tohi Tapu mei he fehuʻi naʻá ke ngāueʻakí. Kapau ʻoku feʻungamālie, ʻai ke ʻiloʻi ʻe he tokotaha-ʻapí ko e ngaahi meʻa lelei naʻá ke vahevahe mo iá ʻoku mei he Tohi Tapú. Tuʻuaki ʻa e tohi ʻokú ke fakakaukau ʻe fakamānako kiate iá, ʻo fakatuʻunga pē ʻi hoʻomo fetalanoaʻaki ki muʻá mo e anga ʻene vakai ki he Tohi Tapú.—Sio ki he konga fakalahi ʻo e Ko ʻEtau Ngāue Fakafaifekau ʻo Tīsema 2013.