Ko ha Puleʻanga ʻE Pule ki he Māmaní Kotoa

ʻE lava ke ke mateʻi mai pe ko e hā ʻa e Puleʻanga ʻoku tau talanoa ki aí?— ʻIo, ko e Puleʻanga ia ʻo e ʻOtuá, ko e Puleʻanga ia te ne ʻai ʻa e māmaní ke hoko ko ha palataisi. Te ke saiʻia ke ako lahi ange ʻo kau ki he Puleʻanga ko ení?—

Ko e puleʻanga kotoa pē ʻoku ʻi ai hono tuʻi. Pea ko e tuʻí ʻokú ne puleʻi kotoa ʻa e kakai ʻi hono fonuá. ʻOkú ke ʻiloʻi pe ko hai ʻa e Tuʻi ʻi he Puleʻanga ʻo e ʻOtuá?— Ko Sīsū Kalaisi. ʻOku nofo ia ʻi hēvani. ʻOku vavé ni ke ne hoko ko e Tuʻi ki he tokotaha kotoa ʻi he māmaní! ʻOkú ke fakakaukau te tau fiefia ʻi he taimi ʻe Tuʻi ai ʻa Sīsū ki he māmaní kotoa?—

Te tau fiefia lahi ʻaupito! ʻI he palataisí, ko e kakaí ʻe ʻikai ke nau toe kē pe ō ki he taú. Ko e tokotaha kotoa te nau feʻofaʻaki. Heʻikai ke toe ʻi ai ha taha ʻe puke pe mate. ʻE sio ʻa e kuí, ʻe fanongo ʻa e tulí pea ko e faʻahinga ʻoku ʻikai lava ke ʻalú te nau lava ʻo lele mo puna. ʻE lahi ʻa e meʻakaí ki he tokotaha kotoa. Pea ko e fanga manú te nau vā lelei ʻiate kinautolu pea kaumeʻa mo kitautolu. Ko e kakai kuo nau maté te nau toe moʻui mai. Ko e tokolahi ʻo e kau tangata mo e kau fefine naʻá ke ako fekauʻaki mo kinautolu ʻi he polosiua ko ení hangē ko Lepeka, Lēhapi, Tēvita mo ʻIlaisiā te nau toe moʻui mai foki! Te ke saiʻia ke ke feʻiloaki mo kinautolu ʻi he taimi te nau toe moʻui mai aí?—

ʻOku ʻofa ʻa Sihova ʻiate koe pea loto ke ke fiefia. Kapau ʻe hokohoko atu hoʻo ako fekauʻaki mo Sihová pea talangofua maʻu pē kiate ia, ʻe malava ke ke moʻui taʻengata ʻi he māmani palataisi fakaʻofoʻofá! Te ke loto ki aí?—