AKO 2

Anga Fakafetalanoaʻaki

2 Kolinitō 2:17

MEʻA KE FAÍ: Lea ʻi ha founga fakanatula mo loto-moʻoni ʻa ia ʻoku fakahaaʻi ai hoʻo ongoʻi fekauʻaki mo e kaveingá mo hoʻo kau fanongó.

Teuteu lelei mo faʻa lotu. Lotu ki ha tokoni ke tokangataha ʻo ʻikai kiate koe, ka ki hoʻo pōpoakí. Fakamaʻu ki ho ʻatamaí ʻa e ngaahi poini tefito ʻoku fiemaʻu ke ke fakahaaʻí. Fakahaaʻi ʻa e ngaahi fakakaukaú ʻi he lea pē ʻaʻau; ʻoua ʻe lau fakafoʻilea ʻa e ngaahi kupuʻi leá ʻi heʻene ʻasi ʻi he meʻa ʻoku pulusí.

Kapau ʻokú ke palani ke lau mei he Tohi Tapú pe ko ha tohi kehe, ʻai ke ke ʻiloʻi lelei ʻa e fakamatalá koeʻuhi ke ke lava ʻo lau fakalelei ia. Kapau ʻoku ʻasi ai ha lea ʻa ha kakai, lau ʻenau leá fakataha mo e ongoʻi, kae ʻoua ʻe fuʻu fakahāhā tōtuʻa ia.
Lea mei he lotó. Fakakaukau fekauʻaki mo e ʻuhinga ʻoku fiemaʻu ai ke fanongo ʻa hoʻo kau fanongó ki he pōpoakí. Tokangataha kiate kinautolu. Pea ko e anga hoʻo tuʻú, ngaahi fakaʻilongá, mo e fakafōtunga ho matá ʻe fakahaaʻi ai ʻa e loto-māfana mo e anga-fakakaumeʻa.

ʻOua ʻe fetoʻoaki ʻa e lea fakanatulá mo e lea noaʻiá. Tauhi maʻu ʻa e ngeia ʻa hoʻo pōpoakí ʻaki hono ngāueʻaki ʻa e lea mahino mo tonu fakakalama.
Sio ki hoʻo kau fanongó. Sio maʻu pē ki hoʻo kau fanongó kapau ʻoku ʻikai fakatupu ʻita ke fai pehē. Kapau ʻokú ke fai ha malanga, sio ki ha toko taha ʻi he kau fanongó ʻi he taimi taki taha, kae ʻikai ko e sio takai ki he kau fanongó fakalūkufua.