Ko e Lotú ko ha Mālohi Ia ki he Melinó?
ʻI HONO fakavīkivikiʻi ʻe he niʻihi ko e siasi māʻoniʻoni taha ia ʻi he Puleʻanga Haʻa Kalisitiané, ko e Siasi ʻo e Faʻitoka Māʻoniʻoni ʻi Selusalemá kuo toe hoko ko ha fakaʻilonga ia ʻo e fekeʻikeʻi mo e fetāufehiʻaʻaki fakalotu. Fakatatau ki he talatukufakaholó, ko e siasí ʻoku fakaʻilongaʻi ia ko e feituʻu “ʻa ia ʻoku pehē tokua naʻe tanu pea toetuʻu hake ai ʻa Kalaisi mei he pekiá.” Kae kehe, ko e feituʻu toputapu ko ení kuo toe hoko ko e feituʻu ia ki he ngaahi fepaki anga-fakamālohi lahi. Ko e kau mōnike mo e kau pātele mei he ngaahi kulupu lotu “faka-Kalisitiane” kehekehe ʻe ono kuo nau fetauʻaki ʻi he ngaahi ʻīsiu ʻo e totonu ki hono ngāueʻaki ʻa e fale lotú. Ko e feʻauʻauhí kuo fakalalahi ia ʻi he ngaahi taʻu ki mui ní. Ko e vaʻa ʻo e kau polisí ki he fakamoveuveú naʻa nau fakanaunau tau ʻaki ha ngaahi laifolo ne pau ke nau kau mai ʻo puleʻi fakataimi ʻa e fale lotú.
Ko ha Hisitōlia ʻo e Fakamālohi
Ko e ngaahi meʻa naʻe hoko ʻi he Siasi ʻo e Faʻitoka Māʻoniʻoní ko e konga ia ʻo ha hisitōlia lōloa ʻo e lingitoto mo e tāmate tavale naʻe fakafehokotaki ki he māfana tōtuʻa fakalotu. ʻI ha vakai ki he ngaahi fepaki ki muí ni ʻi he ngaahi tafaʻaki kehekehe ʻo e māmaní, ko e tohi Violence in God’s Name ʻoku pehē ai: “Mei ʻInitonīsia ki ʻAilani Tokelau, ko e Hahake Lotolotó ki Kasimea, ʻInitia ki Naisīlia, ko e ʻOtu Palakaná ki Suli Langikā, ʻoku fakatonuhiaʻi ai ʻe he kau Kalisitiané, kau lotu Putá, kau Siú, kau Hinituú, kau Mosilemí mo e kau Sīkí ʻa e ngāueʻaki ʻo e fakamālohí ʻi he ngaahi ʻuhinga ʻoku nau maluʻi ai ʻa honau fakaʻilongá mo ʻenau ngaahi meʻa fakalotú.”
Neongo ia, ko e lahi taha ʻo e ngaahi lotú ʻoku nau ngāueʻaki ʻa e melinó mo e feongoongoí ko ha ongo tokāteline tefito. ʻI he faai mai ʻa e ngaahi kuongá, ko e ngaahi tefitoʻi moʻoni taʻesiokita hangē ko e ʻofa ki he kaungāʻapí mo e fakatoputapuʻi ʻa e moʻui fakaetangatá kuo poupouʻi faivelenga ia ʻe he lotú. ʻIkai ʻoku totonu leva ke ngāueʻaki ʻe he lotú ʻa hono ngaahi mālohi lahi fakaʻuliá ke maʻu ai ʻa e melinó? Ko e kau lotu loto-moʻoní ʻoku lelei ke nau sivisiviʻi ʻa e fehuʻi ko ení.