Ko e Hā ʻE Liliú?

“ʻE ʻikai ofa heleta ha puleʻanga ki ha puleʻanga.”

“ʻOku ʻikai ha nofo ai te ne pehe, ʻOku ou mahaki.”

“ʻE ʻikai ke toe ʻi ai ha mate.”

KO E ngaahi fakamatala ʻi ʻolungá ʻe hā ngali fuʻu lelei ke moʻoni. Ka ʻoku lava ke tau fakapapauʻi ʻoku mahulu atu ia ʻi he fakakaukau fakaʻānauá. Ko e hā hono ʻuhingá? Koeʻuhi ʻoku ʻikai ko e ngaahi palōmesi ngeʻesi ia ʻa e kau politiki ʻa ia ʻoku ʻikai hanau mālohi ke liliu ʻa hotau māmaní. ʻI hono kehé, ko e ngaahi talaʻofa ʻoku lave ki ai ʻi ʻolungá ʻoku ʻi he Tohi Tapú ia.a

ʻOku ongoʻi ʻe he tokolahi ko e Tohi Tapú ko e tohi motuʻa ia ʻoku ʻikai haʻane kaunga mai ki hotau taimí. Ko e meʻa ia ʻokú ke tui ki aí? Kapau ko ia, ko e hā ʻoku ʻikai te ke vakaiʻi lelei ai ʻa e meʻa ʻoku ʻi he Tohi Tapú? Ko hono moʻoní, ko e Tohi Tapú ko e tohi toputapu pē ia ʻe taha ʻokú ne fakatotoloʻi ʻa e hisitōlia ʻo e faʻahinga ʻo e tangatá ʻo aʻu ki hono kamataʻangá tonu. ʻOku fakamatalaʻi ai ʻa e ngaahi meʻá ni:

● Founga naʻe tō ai ʻa e faʻahinga ʻo e tangatá ki he siva e ʻamanakí.​—Loma 5:12.

● Founga ʻo e fakataumuʻa ʻa e ʻOtuá ke fakaleleiʻi ʻa e tuʻungá.​—Sione 3:​16.

● ʻUhinga ʻoku ʻikai lava ai ʻa e ngaahi puleʻangá ʻo liliu hotau māmaní.​—Selemaia 10:23.

● ʻUhinga ʻoku lava ai ke tau falala ki he talaʻofa ʻa e ʻOtuá ke fai peheé.​—Siosiua 23:14.

ʻE toʻo moʻoni ʻe he ʻOtuá ʻa e fiekaiá, taú, mahamahakí mo e mate kuo hokosia ʻe he faʻahinga ʻo e tangatá? Ko e ʻamanaki peheé ʻoku ʻikai faingataʻa ke tui ki ai ʻi hoʻo tali pē ʻa e ngaahi meʻá ni:

1. Naʻe fakatupu kitautolu ʻe he ʻOtuá.

2. ʻOkú ne tokanga mai kiate kitautolu.

3. ʻOkú ne maʻu ʻa e mālohi ke liliu ʻa e māmaní.

4. ʻOkú ne fakataumuʻa ke fai pehē.

ʻOku ʻi ai ha ngaahi ʻuhinga lelei ke tali ʻa e ngaahi poini ko ia ʻe faá? Ko e Kau Fakamoʻoni ʻa Sihova, ʻa ia ʻoku nau pulusi ʻa e makasini ko ení, ʻoku nau fakaafeʻi koe ke ke kumi pē ʻe koe fakafou ʻi hano ako ʻo e Tohi Tapú.

Mahalo ʻoku ʻi ai haʻo Tohi Tapu ka ʻoku tātātaha hono laú pe ʻikai ke ke lau ia. Naʻa mo e kakai tokolahi ʻoku nau lau ʻa e Tohi Tapú ʻoku nau pehē ʻoku faingataʻa ke mahinoʻi ia. Kapau ʻoku moʻoni ia kiate koe, ʻoku mau fakaafeʻi koe ke ke fetuʻutaki ki he Kau Fakamoʻoni ʻa Sihová ki ha ako Tohi Tapu taʻetotongi ʻi ʻapi. Ko e laui miliona ʻa e kakai ʻi māmani lahí ʻoku nau maʻu ʻaonga mei he fokotuʻutuʻu ko iá. ʻOku anga-fēfē hono fai iá?

ʻI he uike taki taha, ʻe lava ke haʻu ha toko taha pe toko ua ʻo e Kau Fakamoʻoni ʻa Sihová ki ho ʻapí pe ko ha feituʻu faingamālie ange ke lāulea taʻetotongi ai mo ko e ki he Tohi Tapú. Ko e ngaahi ako Tohi Tapu ko ení te ne tokoniʻi koe ke tali ʻa e ngaahi fehuʻi hangē ko e, Ko e hā ʻoku tau faingataʻaʻia aí? Ko e hā ʻoku ʻikai malava ai ʻa e ngaahi puleʻanga fakaetangatá ke liliu e māmaní? Ko e hā ʻa e Puleʻanga ʻo e ʻOtuá, pea ʻe anga-fēfē ʻene fakahoko ʻe ia ʻa e meʻa ʻoku ʻikai malava ia ʻe he ngaahi puleʻanga fakaetangatá?

Ki ha fakamatala lahi ange ki he founga ke ke maʻu ʻaonga ai mei ha ako Tohi Tapu ʻi ʻapí, fetuʻutaki ki he Kau Fakamoʻoni ʻa Sihova ʻi ho feituʻú pe ʻaʻahi ki heʻemau Uepisaiti www.jw.org. ʻE lava foki ke ke toe tohi ki he tuʻasila feʻungamālie ʻoku maʻu ʻi he peesi 5 ʻo e makasiní ko ení.

[Fakamatala ʻi laló]