ʻOku Tuha Ia mo e Feinga!

KO E Lotu Fakafāmilí mo e ako Tohi Tapú ʻoku mahuʻinga ia kapau ʻoku fiemaʻu ke ʻohake ʻa e fānaú ʻi he ‘akonaki moe fakaboto ʻa Jihová.’ (Ef. 6:4, PM) Ko ia ai, kapau ko ha mātuʻa koe, ʻokú ke ʻilo ko e fānaú ʻe lavangofua ke nau hoko ʻo pipikoʻia. ʻE lava fēfē ke ke puke ʻenau tokangá? Fakakaukau ki he meʻa kuo fai ʻe he ngaahi mātuʻa ʻe niʻihi.

“ʻI he taimi naʻe kei iiki ange ai ʻa e fānaú,” ko e lau ia ʻa George, ʻi Kalefōnia, ʻAmelika, “ko au mo hoku uaifí naʻá ma feinga ke tauhi ʻa e ako Tohi Tapu fakafāmilí ke fakamānako. ʻI he taimi ʻe niʻihi naʻa mau tui kotoa ai ʻa e teunga ʻo e faʻahinga ʻi he Tohi Tapú pea fakatātaaʻi ha talanoa ʻi heʻemau lautohi mei he Ko ʻEku Tohi ʻo e Ngaahi Talanoa Faka-Tohitapú. Naʻe aʻu ʻo mau ngaahi ʻa e ngaahi naunau—ko e ngaahi heletā, sēpita, kato, mo e alā meʻa pehē. Naʻa mau toe vaʻinga ʻi he ngaahi keimi Fakatohitapu ‘mateʻi mai pē ko hai au’ pea faʻu ha papa vaʻinga Fakatohitapu ʻoku ʻi ai ʻa e ngaahi fehuʻi faingofua mo faingataʻa. Naʻe ʻi ai leva mo e ngaahi ngāue ke fai, hangē ko hono faʻu ha sīpinga ʻo e ʻaʻake ʻa Noá pe faʻu mo ha fakahokohoko ʻo e ngaahi meʻa Fakatohitapú. ʻI he taimi ʻe niʻihi naʻa mau ngāueʻaki ʻa e ngaahi lēsoni tā fakatātā ʻa ia naʻa mau fakatātaaʻi ai ha faʻahinga pe ko e ngaahi talanoa ʻi he Tohi Tapú. ʻI he taimi ní, ʻoku mau palani ha tā fakatātā ʻo e teunga tau fakalaumālie ʻoku fakamatalaʻi ʻi he Efeso 6:11-17, ʻa ia ʻoku mau fakamatalaʻi taki taha ai ʻa e meʻa ʻoku fakatātaaʻi ʻe ha konga pau. Ko e ngaahi founga ko ení kuo tokoniʻi ai kimautolu ke mau fiefia ʻi heʻemau ako fakafāmilí.”

Ko Debi, ko ha faʻē ʻi Michigan, ʻAmelika, ʻokú ne pehē: “Ko au mo hoku husepānití naʻá ma faingataʻaʻia ʻi he feinga ke maʻu ʻa e mahuʻingaʻia ʻa ʻema kiʻi taʻahiné ʻi he taimi naʻá ne taʻu tolu nai aí. ʻI he ʻaho leva ʻe taha, lolotonga hono lau leʻo-lahi ʻa e talanoa fekauʻaki mo ʻAisake mo Lepeká mei he Ko ʻEku Tohi ʻo e Ngaahi Talanoa Faka-Tohitapú, naʻá ku toʻo hake ai ha ongo tamapua ʻo kamata ke fakatātaaʻi ʻaki ʻa e talanoá. ʻI he taimi ní ʻokú ne tokanga lelei ki he foʻi lea kotoa pē! ʻI he ngaahi māhina hoko maí, kuo hoko ʻa e ongo tamapuá ko e faʻahinga kehekehe tokolahi ʻi he Tohi Tapú. Hili ʻemau lau ha talanoa, ko ʻema taʻahiné naʻá ne kumi holo ʻi he falé ki he ngaahi meʻa vaʻingá pe ko e ngaahi meʻa kehe ʻa ia ʻe lava ke ngāueʻaki ke fakatātaaʻi ʻa e talanoá. Naʻe hangē ia ha kumi koloá! Ko ha puha sū mo ha loufau kulokula naʻe hoko ia ko e fale ʻo Lēhapí fakataha mo ha afo kulokula. Ko ha ngata meʻa vaʻinga fute ʻe nima [mita ʻe 1.5] hono lōloá naʻe takatakaiʻi ʻi ha kauʻi taufale naʻe ngāueʻaki ia ko e ngata palasa ʻi he Nomipa 21:4-9. Naʻa mau tuku ʻa e ngaahi naunaú ʻi ha fuʻu kato lā. ʻI heʻema fiefiá, naʻe faʻa tangutu ʻema taʻahiné ʻi he loto falé ʻo hakule ʻene ‘kato talanoa Fakatohitapú.’ He meʻa fakafiefia ē ke sio kiate ia ʻokú ne fakatātaaʻi ʻa e ngaahi talanoá ʻi heʻene kiʻi founga pē ʻaʻana!”

Ko hono ʻohake ʻa e fānaú ʻoku ʻikai ke faingofua, pea ʻoku fiemaʻu ʻa e ngaahi lēsoni lahi ange ʻi he uike taki taha ke fakahūhū ai kia kinautolu ha holi ke tauhi kia Sihova. Ka ko e lotu fakafāmilí mo e ako Tohi Tapú ʻe lava ke hoko ia ko ha makatuʻunga ki ha fakahinohino fakalaumālie kehe. ʻOku ʻikai toe fehuʻia, ʻoku tuha ia mo e feinga!