ʻOku ʻi Ai ha Tokotaha ʻOkú Ne Fakatupunga ʻa e Koví Kotoa?

“NAʻÁ KU lulululu mo e tēvoló.” Ko e lea ia ʻa e komanitā ʻo e ngaahi kongakau ʻa e Ngaahi Puleʻanga Fakatahatahá ʻi Luanitaá, ʻi heʻene fakakaukauloto ki he ʻikai te nau malava ke taʻofi ʻa e fakaʻauha fakafaʻahinga ʻi he fonua ko iá lolotonga ʻa e 1994. ʻI he fakamatala ki he anga-fakamamahi taʻealatui ki ai ʻi he taimi ko iá, naʻe fakamatala ʻa e tokotaha mamata ʻe taha: “Kapau ʻoku ʻi ai ha taha ʻoku kei fakatoʻotoʻa ke ne fakaʻikaiʻi ʻa Sētane, ta fetaulaki ʻi ha faʻitoka ʻo e fuʻu kau mate tokolahi ʻi Luanitaá.” Ko e ngaahi tōʻonga fakalilifu peheé ko e ngāue moʻoni ia ʻa e Tēvoló?

Ko e tokolahi taha ʻo e kakaí ʻoku ʻikai te nau vakai ki he fakamālohi tavalé mo e anga-fakamamahí ko e ngāue ia ʻa ha meʻamoʻui laumālie fulikivanu taʻehāmai. ʻOku fakakaukau ʻa e tokolahi ko e ngaahi meʻa peheé ko ha tupu ia mei he kovi tukufakaholo ʻi he natula fakaetangatá pea ko e tupuʻanga tefito ʻo e koví ko hotau poto fakanatula siokitá. ʻOku fakamahalo ʻa e niʻihi ko ha kulupu ʻo e kau koloaʻiá mo e mālohí, ko ha faʻahinga netiueka fakapulipuli ʻi he māmaní kotoa, kuó ne tākiekina ʻa e kakaí ʻi he laui taʻu koeʻuhí ke ne puleʻi ʻa e māmaní. Pea ko e moʻoni, ʻoku ʻi ai e faʻahinga ʻoku nau tukuakiʻi ʻa e ngaahi puleʻanga he ngaahi fonuá mo e kau pulé ki he fakamaau taʻetotonu mo e faingataʻa kotoa ʻoku nau sio ki aí.

Ko e hā ʻokú ke tui ki aí? Ko e hā ʻoku lahi fau ai ʻa e koví, fakamamahí, tōʻonga fakalilifú, mo e faingataʻá ʻi he māmaní kotoa he ʻahó ni neongo e ngaahi feinga ke ikuʻi iá? Ko e hā ʻoku hā ngali tūʻulu vave atu ai ʻa e faʻahinga ʻo e tangatá ki ha ʻalunga fakaʻauha-kita, ʻo fakaongotuli ki he ngaahi fakatokanga kuo toutou faí? ʻOku ʻi ai ha tokotaha ʻokú ne fakatupunga kotoa ia? Ko hai moʻoni ʻokú ne puleʻi ʻa e māmaní? ʻE fakaʻohovaleʻi nai koe ʻe he talí.