Naʻá Ke ʻIloʻi?

Naʻe faifai ange pea toe langa ʻa e temipale ʻi Selusalemá ʻi he hili ʻa e 70 T.S.?

NAʻE tomuʻa tala ʻe Sīsū ko e temipale ʻo Sihová ʻe fakaʻauha ʻosi. Naʻe hoko eni ʻi he taimi naʻe fakaʻauha ai ʻa Selusalema ʻe he kau tau Loma naʻe taki ʻe Taitusí ʻi he taʻu 70. (Māt. 24:2) Ki mui ai, naʻe palani ʻa e ʻEmipola Loma ko Sulianí ke toe langa ʻa e temipalé.

ʻOku ʻiloa ʻa Suliani ko e ʻemipola pangani fakamuimui taha ia ʻo Lomá. Ko e ʻilamutu ia ʻo Konisitanitaine ko e Lahí, pea naʻe akoʻi ia ʻe he kau Kalisitiane lau pē ʻi hono taimí. Ka ʻi he taimi naʻá ne hoko ai ko e ʻemipola ʻi he taʻu 361, naʻá ne siʻaki ʻa e meʻa naʻa nau akoʻi kiate iá. ʻOku ui ia ʻi he ngaahi tohi hisitōliá ko Suliani ko e Fakafepaki ki he Tuí koeʻuhí he naʻá ne siʻaki ʻa e siasí.

Naʻe fehiʻa ʻa Suliani ʻi he faʻahinga ko ia naʻa nau pehē ʻoku nau Kalisitiané. Ko e ʻuhinga nai ʻe taha he ko e taimi ko ē naʻá ne taʻu ono aí, ko e kakai naʻa nau taku ko e Kalisitiané naʻa nau tāmateʻi ʻa ʻene tamaí mo hono ngaahi kāinga kehe. ʻOku pehē ʻe he kau faihisitōlia ʻo e siasí naʻe fakalototoʻaʻi ʻe Suliani ʻa e kau Siú ke nau toe langa honau temipalé. Naʻe fakakaukau ia ʻe fakamoʻoniʻi ʻe he meʻa ko ení ko Sīsuú ko ha palōfita loi ia.a

ʻOku ʻikai ha veiveiua naʻe loto ʻa Suliani ke toe langa ʻa e temipalé. Ka ʻoku ʻikai ke fakapapauʻi pe ko ia naʻá ne toe langa moʻoni iá. Pea kapau naʻá ne kamata ʻa e ngāué, ʻoku ʻikai fakapapauʻi pe ko e hā naʻá ne fakatupunga ke tuʻu ʻa e ngāué. Pe ko e hā pē ʻa e ʻuhingá, naʻe tāmateʻi ʻa Suliani ʻo ʻikai aʻu ki he taʻu ʻe ua hili ʻene hoko ko e ʻemipolá, pea naʻe ʻikai ʻaupito ke toe langa ʻa e temipalé.