Puha Fehuʻi
◼ ʻOku totonu ke tufaki ʻe he Kau Fakamoʻoni ʻa Sihová ʻa e hiki tepi pe tatau ʻo e ngaahi malangá?
ʻOku fakaivimālohiʻi mo fakalototoʻaʻi kitautolu ʻe he ngaahi malanga Fakatohitapú. (Ng. 15:32) Ko ia ai, ʻoku fakanatula pē ke loto ke vahevahe atu ʻa e fakamatala fakalototoʻá ki he faʻahinga naʻe ʻikai te nau ʻi aí. ʻI hono ʻiloʻi ʻa e ngaahi meʻangāue hiki kehekehé, ʻoku lavangofua ai ke hiki ha malanga pea tufaki ki he niʻihi kehé. Kuo tauhi ʻe he niʻihi ha ngaahi malanga kuo hiki, ʻo kau ai ʻa e ngaahi malanga naʻe fai ʻi he ngaahi taʻu lahi kuohilí, pea ʻi he taumuʻa lelei kuo nau ʻave ʻa e ngaahi malangá ni pe hiki ia ki he kaungāmeʻá. Kuo hanga ʻe he niʻihi ʻo faʻu ha ngaahi Uepisaiti ʻo ʻai ki ai ʻa e ngaahi malangá ki ha taha pē ke ne hiki mei ai.
ʻOku lava ke mahino, ʻoku ʻikai taʻofi haʻatau hiki ʻa e ngaahi malangá ke ngāueʻaki fakafoʻituitui pe maʻá e ngaahi mēmipa ʻo hotau fāmilí. ʻIkai ko ia pē, ʻe fokotuʻutuʻu nai ʻe he kau mātuʻá ke hiki ʻa e ngaahi malangá ki he ngaahi mēmipa mahamahaki ʻo e fakatahaʻangá ʻa ia ʻoku ʻikai malava ke nau maʻu ʻa e ngaahi fakatahá. Kae kehe, ʻoku ʻi ai ʻa e ngaahi ʻuhinga lelei ke ʻoua ʻe tufaki ai ʻa e tatau pe hiki tepi ʻo e ngaahi malangá.
Koeʻuhi ʻoku faʻa fakahoko ʻa e ngaahi malangá fakataha mo e fakakaukau ki he fiemaʻu ʻa e feituʻú, ʻe lavangofua ke tau fakaʻuhingahalaʻi ʻa e ngaahi poiní ʻi ha hiki tepi kuo tufaki, koeʻuhi naʻe ʻikai te tau ʻiloʻi ʻa e ngaahi tuʻunga naʻe fai ai ʻa e malanga ko iá. ʻIkai ngata aí, ʻe faingataʻa ke tau fakapapauʻi ʻa e tokotaha naʻá ne fai ʻa e malangá pea mo e taimí, koeʻuhi ke lava ai ʻo tau maʻu ʻa e falala pau ko e fakamatala naʻe ʻomaí ʻoku ʻalu fakataha mo e taimí pea tonu. (Luke 1:1-4) ʻIkai ko ia pē, ko hono tufaki ʻo e ngaahi tatau pe hiki tepi ʻo e malangá ʻe ʻahiʻahiʻi nai ai ʻa e niʻihi ke nau fai pe tali ha tokanga taʻetotonu mo e fakalāngilangi.—1 Kol. 3:5-7.
ʻOku ngāue mālohi ʻa e tamaioʻeiki anga-tonu mo potó ke tokonaki ʻa e meʻakai fakalaumālié ʻi he “tufakaga” totonu pea ʻi he taimi “totonu.” (Luke 12:42, PM) ʻOku kau ki heni ʻa e fokotuʻutuʻu ke fai ʻa e ngaahi malangá ʻi he ngaahi fakatahaʻanga fakalotofonua ʻa e Kau Fakamoʻoni ʻa Sihová mo e ngaahi hiki tepi ʻe lava ke hiki mei he Uepisaiti jw.org fakaʻofisialé. ʻOku lava ke tau tuipau ʻe tokonaki mai ʻe he tamaioʻeiki anga-tonu mo potó mo ʻene Kulupu Pulé ʻa e meʻa ʻoku tau fiemaʻú koeʻuhi ke ʻai ai ke tau tuʻu maʻu ʻi he tuí.—Ng. 16:4, 5.