Puha Fehuʻi

◼ ʻOku totonu ke fai ha lotu ʻi he ako Tohi Tapu ʻi he matapaá?

ʻOku lahi ʻa e ngaahi ʻaonga ʻo hono kamata mo fakaʻosi ha ako Tohi Tapu ʻaki ha lotu. Fakafou ʻi he lotú, ʻoku tau kole ai kia Sihova ki hono laumālie māʻoniʻoní ke ʻi heʻetau fetalanoaʻakí. (Luke 11:13) ʻOku toe fakamamafaʻi ʻe he lotú ki heʻetau tokotaha akó ʻa e mafatukituki ʻo ʻene ako Tohi Tapú pea akoʻi ai ia ki he founga ke lotu aí. (Luke 6:40) Ko ia ai, ʻoku lelei ke kamata ha lotu ʻi he vave taha ʻe ala lavá. Kae kehe, koeʻuhi ko e kehekehe ʻa e ngaahi tuʻungá, ʻoku fiemaʻu ki he faiakó ke ne ngāueʻaki ʻa e fakapotopotó ʻi he fili pe te ne fai ha lotu ʻi ha ako Tohi Tapu ʻi he matapaá.

Ko e moʻoniʻi meʻa mahuʻinga ʻe taha ke fakakaukau ki aí ko e ʻātakai ʻoku fai ai ʻa e akó. Kapau ʻoku ʻi ai ha kiʻi tuʻunga fakaekinaua pē, ʻe lava ke fai fakapotopoto ha lotu nounou ke kamata mo fakaʻosi ʻaki ha ako kuo ʻosi fokotuʻu. Kae kehe, kapau ko e fai peheé ʻe tohoakiʻi mai ai ʻa e tokanga ʻa e kakai ʻoku sio maí pe ʻai ai ke ongoʻi taʻefiemālie ʻa e tokotaha akó, ʻe sai ange nai ke tatali kae ʻoua ke lava ʻo fai ʻa e akó ʻi ha ʻātakai ʻoku lava ange ai ke na toko ua peé. Tatau ai pē pe ko fē ʻoku fai ai ʻa e akó, ʻoku totonu ke tau ngāueʻaki ʻa e fakafuofua leleí ke fakapapauʻi ʻa e taimi ke kamata ai ha lotú.—Sio ki he Ko ʻEtau Ngāue Fakafaifekau ʻo ʻEpeleli 2005, peesi 6.