ʼEetec ra qanhuoteeteʼ caua ntaʼal

Ra huoʼo ca huaron naigui ra ỹoʼot ca maiche lauoʼ lʼecpi ralaxaic. Nagui cam ỹataqta ʼamaqtaqaic ana ʼalhua nacheca ca ʼaramoxoua. Reʼera petaʼa qalaqaic ra ỹaconguet caua ʼartaʼal. Qalaq reʼera sa ishet ra naigui ra ʼaualat ra ʼauauoteʼc qoʼ ra ʼauauoʼoi. Na lqataxac aye la Biblia ishet ra ʼam itauan ra ʼauʼañaqchet ye ʼarhuaỹaxac qataq ra maguiñi na maiche ʼarhuoʼ lʼecpi.

1 CAUA ʼARTAʼAL SA ISHET RA ʼACOUAʼAISALO

NA ʼENAC AYE LA BIBLIA: «Huoʼo naq ʼenec ʼanqaʼen ca ʼadtaʼa qataq aca ʼadateʼe» (Efesios 6:2, DNS). Naiʼctaxa ca ʼanʼaño, saxaỹet ra ʼauen ra huoʼo naq ʼenec ʼanqaʼen taq ra ʼauauoʼoi caua ʼartaʼal. Qalaq ʼauennataʼa ca ʼaramoxoua taqaʼen ñalec. Iuen ra sa icouaʼai caua ltaʼal. Ra nauochaxac «saishet da quiỹaxanaqtaqaic». Ỹoqoʼoye huanna ra ʼañiʼitalec ca ʼaramoxoua ra iʼamaqtoiguilo caua ltaʼal (1 Corintios 13:4; Gálatas 5:26).

RA ISHET RA ʼAUʼOT:

• Sa ʼanquigaxatrec ca ʼarʼaqtaqa, ʼeetaʼ: «Nam ʼarhuoʼ lʼecpi saxaỹet ra aỹem sa iyacnapec» qoʼ «Aca ʼarateʼe huanna ra ỹaỹamaxaren na soʼot»

• ʼAnʼañaxat ra ʼauaỹajneguet ye l-loxoc ca ʼaramoxoua

2 RA ʼAUEN, ʼAUʼAÑAXATCHIGUI YE ʼARUEL

NA ʼENAC AYE LA BIBLIA: «Ca ỹale caʼai qome ca ltaʼa qataq aca lateʼe, da yaqtoʼ lmayaxaua aca lhua, nache caamaye ʼeetaʼam da ʼoonolec shiỹaxaua» (Génesis 2:24). Ra mashe ʼauaron, petaʼa caua ʼartaʼal ñaq queta ra lhuennataxa ra ʼam qailoʼogue. Ỹoqoʼoye ỹaguec ra taỹapegueuʼalo ye ʼarhuaỹaxac.

Qamiʼ huetalguete ra qanaỹamaxachiỹaʼt huaʼague ca ishet ra iviraʼalo caua ʼartaʼal. Nache qoñiỹapegalo qauoitaʼai ra nauotaxanaqtaic. Ishet ra ʼam ʼeesa qalaq ʼanpottelec anqaʼen na ʼarʼaqtaqa (Proverbios 15:1). Ra huesoxoc, nmanaxac taq nhualaxavic ʼam itauan ra nhuoteetaʼt ca nhuoʼ lʼecpi taq sa ỹapinʼaguet «da huoʼo ca camachaqca» (Efesios 4:2, DNS).

RA ISHET RA ʼAUʼOT:

• Ra huoʼo ra ʼarhuogoxo na ʼarhuoʼ lʼecpi ra taỹapegueuʼa ye ʼarmaʼ, ʼanʼaqtaxaneʼ ca ʼaramoxoua qom qaica camachaqca

• Qanaỹamaxachiỹaʼt cam qoñiitapeguec