Aso Rahab ỹoxojyiñi soua dos ỹaleʼt

Soua ỹaleʼt israelitapi qaỹamaq ra imeten ye ʼalhua Jericó. Nache netaña ye lmaʼ aso aloʼ lʼenaxat Rahab. Coʼollaxa so ntaʼa ye Jericó laxaỹaxac reʼera nache ỹamaxa ye lmaʼ aso Rahab soua nalleppi. Aso maye ỹoxojyiñi soua dos ỹaleʼt na paʼasheguem so lmaʼ nache ʼenapega so nalleppi ra ỹaqaʼa ca tateugalo ra nmitaique. Nache aso Rahab ʼenapega soua ỹaleʼt: «Aỹem qamiʼ setauan chaʼaye saỹaten ra ñi Jehová qamiʼ huetagueta taq neʼena ʼalhua qome qaralamaxachi. Ỹoqoʼoye qamiʼ seỹaxanoto ra qancaʼalaxateguesop na ihuolecpi».

Soua ỹaleʼt ʼenapega aso Rahab: «Ra acoñerauaʼa ca cuerda roja ñi nalloxoqui nache ʼenauac na arhuolecpi patauo na armaʼ ncaʼalec».

Aso Rahab itauan soua ỹaleʼt ra ỹalat ye Jericó ra huenotec tatoiguilo so nalloxoqui ye lmaʼ ỹauotaʼa so cuerda. Soua ỹaleʼt nqallioxooyiñi huaña añi qasoxonaxa queuogui soua tres naʼaxaʼte, lcopague iguelaxa ye huetaña so Josué. Nache so israelitapi ỹasoxolec so tala Jordán nache naỹamaxat ra ỹacona ye ʼalhua. Qome ye Jericó nache huaʼauñe ʼalhua ra ỹacona. Ñi Jehová ramaxasoxolec ra qaicolesop ye ciudad ye ʼoonolec naʼaq. Nache qaỹoʼot reʼera queuogui soua seis naʼaxaʼte. Nache so naʼaq septimo, qaicolesop siete veces ye naʼaq. Lcopague so ntaxaỹaxanecpi ỹashettrapigui caua lasheerel, taq so nalleppi naʼaxannec ca laʼalaxac. Nache so lpaqtaxanaxat ye ciudad huaʼaxauec. Naicʼtaxa so lmaʼ aso Rahab netaña so lpaqtaxanaxat saishet ra huaʼaxañe. Aso Rahab taq lauolecpi ncaʼalec chaʼaye aso maye piʼiỹa ñi Jehová.