So Josué taq so gabaonitapi

So laỹipi nacionpi ye Canaán ỹaỹaten coʼollaxa so huaigui ye Jericó, nache so ntaʼalpi naỹonat ra qailogui so israelitapi. Qalaxaye so shiỹaxauapi lmaʼ ye Gabaón npenguet ra lcuennataxac. Nache ỹaariñi soua logoxot ltoxoiqa nache taỹa so netaña so Josué taq ʼenapec: «Sachegoxosaqaʼa ye ʼalhua ỹataqta qaỹoqta. Saxasoqteguelec ñi Jehová taq ʼenauac so qamiʼ ỹoʼoteque huaña ye Egipto taq ye Moab. Qomiʼ sauotaique ra aramaxashecpi, ra auaan ca araqtac ra saishet ra qomiʼ aualauat».

So Josué ỹamaqten so mayepi taq ỹan ra lʼaqtac saishet ra ỹalauat. Qalaxaye lcopaʼague soua tres naʼaxaʼte so maye laxaỹaxac ra saq ʼeesa reʼera, so gabaonitapi saishet ra chegaqaʼague ca ʼalhua qaỹoqta, so mayepi lmaʼ ye Canaán. Ỹoqoʼoye so Josué inat: «¿Táʼaencoʼ ra qomiʼ auatenachet?». So mayepi ỹasat: «Chaʼaye ỹaguec na qayiiỹaxa. Saỹatenac ñi Jehová qamiʼ huetagueta taq npaxajlec. Ishet petaʼa ra saishet ra qomiʼ aualauat». So Josué ipacchigui so lʼaqtac saishet ra huoʼo ca ỹoteque.

So lcopaʼague, cinco soua ntaʼalpi cananeopi taq so nalleppi taỹa ra nuaxane so gabaonitapi. So Josué taq so nalleppi queuoigui ʼenauac seʼeso pe ra yaqtoʼ itauan ra nqaʼalaxateguesop so gabaonitapi. Nache so nteʼetom nalaarat. So cananeopi ratauec qamachaqca ca tatiga qalaxaye ñi Jehová ỹoʼot ra anaq na lache laterai ra tajlec so mayepi. So Josué ỹaxanot ñi Jehová ra nache netaña añi Nalaʼ. Huanna nache ʼeetec reʼera añi Nalaʼ. ¿Táʼaencoʼ ra ỹaxanaique so Josué reʼera? Chaʼaye ỹataqta piʼiỹa ñi Jehová. Nache seʼeso naʼaq saishet ra huenoxoñe añi Nalaʼ iviraʼa so israelitapi nauec so ntaʼalpi cananeopi taq so nalleppi.