So ralaxaic nataxala taq soua dos ʼalo añaxaiqa

So Josué ỹauecaʼaguet so npueblo ñi Jehová queuogui soua qalota viʼiyel, taq ileu coʼollaq iviʼi so 110 viʼiyel. So ñaq ncaʼaltauec so Josué ʼenauac so israelitapi ỹioʼoxoren ñi Jehová qalaxaye so ileu so maye nache ỹioʼoxoren na diospi saq ʼeesa ʼenaʼam so shiỹaxauapi lmaʼ ye Canaán. So israelitapi ñaq queʼeta ra saq ỹalaxaguet ñi Jehová nache ñi maye ỹaxanec ra so ntaʼa cananeo lʼenaxat Jabín ỹoʼotec ra qauem. Ỹoqoʼoye so pueblo nachoxoreteqot ñi Jehová ra itauan so mayepi. Nache ñi Jehová ỹanem so ralaxaic nataxala lʼenaxat Barac. So maye itauan so shiỹaxauapi ra ỹoltaxa ỹioʼoxoren ñi Jehová.

Aso naʼaqtaxanaxana Débora, aca naʼaqtaxanaxana nacheca ca ỹachetaq na lʼaqtac ñi Jehová maye ỹamaxalec ra nasaxauec. Aso maye ʼenapega so Barac ra taỹa chaʼaye iuen ra ỹanem ra lʼaqtac ñi Jehová: «Anqoʼona qome ye lauaxac Cisón anaiqapegue ca 10.000 nalleppi ra yaqtoʼ qanalaacheʼ so nalleppi ye Jabín. Huaña yeʼeye nache ʼoxonec so Sísara, lataxala seʼeso nalleppi». So Barac ỹasateguet aso Débora: «Sejec qalaxaye aỹem aucaʼategue». Aso maye ʼenapec: «ʼAm secaʼategue, qalaxaye iuen auaỹaten ra ʼam saishet ra aualauat ca Sísara. Ñi Jehová ʼenapec ra ỹanem aca ʼalo ra ỹalauat».

Aso Débora, so Barac taq so nalleppi tasheguemec añi qasoxonaxa lʼenaxat Tabor yaqtoʼ naỹamaxat ra alaataxac. Nache so Sísara laxaỹaxac reʼera nache laỹonat aso laigonapi alaataxaqui taq so nalleppi ra taỹa na paguiñe aso qasoxonaxa. Aso Débora ʼenapega so Barac: «Nagui ñi Jehová ʼam ỹanem ra ʼoxonec». Nache so Barac taq so 10.000 nalleppi ñiguilaxañe aso qasoxonaxa ra yaqtoʼ relogui so nallepi so Sísara.

Lcopague Ñi Jehová ỹoʼot ra npaxanec so lauaxac Cisón, nache aso laigonapi alaataxaqui reqapiangui na nshaxa. So Sísara huenotec aso laigona nache ratauec. So Barac taq so nalleppi rahuegaxan qaq so Sísara notauec nache nqalloxotoigui so npeʼl maye lmaʼ aso ʼalo lʼenaxat Jael. Aso maye ỹanem ra ñomgui so quetaq lcheʼ taq ỹapolec so maye. So nataxala rochaʼañe chaʼaye ỹaguec ra nasamñe. Aso Jael nchettauaʼa ra iraʼa aso lashe na npeʼl ra ỹaʼayigui na lqaic, nache ileu so maye.

Lcopague ivireuo so Barac ra nmittaique so Sísara. Aso Jael pauec so npeʼl nache ʼenapega: «Aỹala ʼam sachaxana ye ʼanmittaique». So Barac inoxonoigui so npeʼl nache ilalec so Sísara ra huetaiya, mashe ileu. Nache so Barac taq aso Débora ỹoʼon so nʼonec ra yaqto ỹioʼoxoren ñi Jehová chaʼaye itauan ra nauec so mpaxaguenaxauapi. Lcopague so israelitapi huoʼo ra nlagaxayec queuoigui so 40 viʼiyel.