Aso Rut taq Noemí

Coʼollaxa huoʼo so naʼaxaʼte huoʼo so nqouaxa ye Israel. Ỹoqoʼoye huoʼo aso ʼalo israelita lʼenaxat Noemí jec taỹa ye ʼalhua Moab lỹatac so lhua taq soua dos llalqaʼ. Lcopague ileu so lhua so Noemí. Soua llalqaʼ huaronguet soua dos moabita lashe: Aso Rut taq Orpá. Qalaxaye taqaʼen ileu soua llalqaʼ, reʼera ỹataqta ỹoʼot ra nquiʼic.

Aso Noemí laxaỹaxac ra qaica ca nqouaxa ye israel nache iguelaxa ye maye. Aso Rut taq Orpá qategue aso maye qalaxaye huaña na nqaʼaic laiñi aso Noemí ʼenapec: «Qamiʼ noʼon nhua taq noʼon natelpi. Aỹem ỹavela ra ỹoltaxa qauaroñi. Qaviʼiguelaqaiua ye qarmayi ye Moab». Soua ʼalol ỹasateguet: «Ỹataqta ʼam sauotaxac, saishet ra ʼam ñogonataqchigui». Aso Noemí ỹoltaxa ʼenapega ra iguelaxa ye lmaʼ. Nache aso Orpá iguelac qalaxaye aso Rut noʼonañi. Aso Noemí ʼenapega aso Rut: «Ten aso Orpá iguelaxa ye lalamaxat lmaʼ taq natamnaxalapi. Auaqategue aso maye nache auguelaxaua ye lmaʼ aca arateʼe». Qalaxaye aso Rut ʼenapega: «Saishet ra ʼam sheqaʼai. Ca arhuolecpi taqaʼen iuolecpi, taq ca anatamnaxala taqaʼen ñatamnaxala». ʼEetec ca arcuennataxac, ¿ca ʼeetec ca nanomaxa aso Noemí coʼollaq nasaxauec reʼera aso Rut?

Aso Rut taq aso Noemí iviraʼa ye Israel so mashe laloqoʼ ra qanqat na nanguishe cebada. Huoʼo so naʼaq, aso Rut tauga ye lanaxanqaʼ so Boaz ra yaqtoʼ natootaguet na nonañi maye qanqattac. So Boaz nacheso so llalec aso Rahab. So Boaz huaqteguelec ra aso Rut moabita lashe taq ra noʼon auochaxaua taq saishet ra ỹalat aso Noemí. So maye ʼenapega so lamaxashecpi ra qaraʼac huoʼo ca nonaxatañi ye nanaxanqaʼ yaqtoʼ aso Rut ishet ra laỹonat.

Seʼeso pe nache aso Noemí inat aso Rut: «¿Huaʼague ca qonetaña so auonataxatac?». Aso Rut ỹasateguet: «Ye lanaxanqaʼ so Boaz». Nache aso Noemí ʼenapec: «Seʼeso Boaz nacheso so lauolec so ihua. Qoqueta ra auonataxatac ye lanaxanqaʼ, qaica ca ʼam iguetaʼa huaña yeʼeye».

Aso Rut quetaʼ ra roʼonataxataq ye lanaxanqaʼ so Boaz iviraʼa so laloqoʼ ra imeʼ ra qanqat ana languishec. So Boaz ilaʼa aso Rut ỹataqta ʼonataxanaxai taq noʼon ra lataxac. Seʼeso naʼaxaʼte ca ỹale ra ileu taq qaica ca llalacpi, nache ca lauolec ishet ra huaronguet aca paʼai. Nache so Boaz huaronguet aso Rut. Huoʼo so llalec nache qaỹanagui ra lʼenaxat Obed. Lcopague qalota viʼiyel, so Obed nacheso som lapi so ntaʼa David. Soua nauochaxaua so Noemí ỹataqta machiguiñi, taq nasaxauec: «Huaʼauñe ñi Jehová ʼam ỹanem ara Rut ra ỹataqta ʼam ilogue. Qaq nagui nache huoʼo na arhual. Shioʼoxorenaq ñi Jehová souaxat reʼera».