Aso Ana iỹaxanot ñi Jehová ca llalec

So israelita lʼenaxat Elcaná huoʼo soua dos lhua: Aso Ana taq Peniná. Qalaxaye so maye ỹataqta ỹauotec aso Ana. Aso Peniná huoʼo so qalota llalacpi, qaq aso Ana qaica ca llalec. Ỹoqoʼoye aso Peniná ishehuetalec aso maye. ʼEnauac na viʼiyel, so Elcaná ỹauec so lauolecpi ye ʼalhua siló yaqtoʼ ỹioʼoxoren ñi Jehová huaña ye npeʼl ñi maye. Huoʼo so naʼaq netaña yeʼeye nache so Elcaná nanomtaʼa ra aso lhua Ana ỹataqta itoxoñi. Nache so maye ʼenapec: «Ana saishet ra atoxoñi, saishet ra ʼam ʼoonole, aỹem ỹataqta ʼam sauotec».

Lcopague aso Ana jec ra yaqtoʼ natamenot ñi Dios. Aso maye ỹaguec ra nỹeetac taq nqouaxahuetaqot ñi Jehová ra itauan. Nache ỹanot ra lʼaqtac: «Jehová ra auauoʼo qome ca ỹalec nache ʼam sanot yaqtoʼ ʼenauaque na naʼaxaʼte ra ʼam roʼonataxanot».

So ntaxaỹaxanec Elí ilaʼa aso Ana ra ỹataqta nỹeetac taq datac na alap, qaica ca lʼaqtac, nache so maye ipiʼitaxaatega ra taxai aso maye. Aso Ana ʼenapec: «ʼAm ỹataxala, saishet ra aỹem taxai. Chaqrata huoʼo ra ñeqalanaxac ltaʼaraic ỹoqoʼoye semaltegue ñi Jehová». So Elí nanomtaʼa ra imalqauec taq ʼenapega aso Ana: «Ñi Jehová ʼam ỹanem qome ca aỹaxataique». Aso Ana saishet ra iguelaxa ra itoxoñe. Lcopague, aso Ana huoʼo so llalec taq ỹanagui ra lʼenaxat Samuel. ʼAm ʼeetec ca arcuennataxac, ¿aso Ana ỹataqta machiguiñe?

Aso Ana saishet ra icouaʼai coʼollaxa so ỹachaxanapeguem ñi Jehová. Coʼollaq mashe ỹaxaañi ra l-llepaxac so Samuel nache irouaʼa añi npeʼl ra yaqtoʼ ra roʼonataxanot ñi Jehová. Aso maye ʼenapega so Elí: «Ñatamenot coʼollaxa ñi Jehová yaqtoʼ aỹem ỹanem neʼena nogotolec. Ỹoqoʼoye nagui nache sanot na maye ñi Dios yaqtoʼ roʼonataxan ʼenauac na naʼaxaʼte». So Elcaná taq aso Ana namaqtega so Samuel ʼenauac na viʼiyel taq ỹachetauo na lʼonatac túnica qoʼ logoxot ralaxaic. Lcopague ñi Jehová ỹoltaxa ỹanem aso Ana soua lỹa llalacpi, tres ỹaleʼt taq dos alpi.