So Jefté ỹanot ra lʼaqtac ñi Dios

So israelitapi ỹoltaxa icouai ñi Jehová taq ỹioʼoxoren na diospi saq ʼeesa. Qalaxaye seʼeso ndiospi saishet ra mpaxajlec ỹoqoʼoye na shiỹaxauapi lmaʼ ye Ammón ỹoʼotec na qauem. Nache so pueblo qalota viʼiyel ra huoʼ ra nquejnaxac. Nache ʼenapega ñi Jehová: «Huoʼo ra qarasouaxashet ʼam huetoʼot ishet ra qomiʼ ʼausorec na qanpaxaguenaxauapi». Nache so israelitapi nlaxajñe seʼeso ndiospi saq ʼeesa taq ỹoltaxa ỹioʼoxoren ñi Jehová. Ỹoqoʼoye ñi maye sa naloʼoguet ra ỹalletagui na nquejnaxac so mayepi.

So israelitapi lcaʼagui so ỹale añaxaic lʼenaxat Jefté. So maye nataxala ra yaqtoʼ qailoguiʼ so ammonitapi. So Jefté ʼenapega ñi Jehová: «Ra qomiʼ atauan ra sauegaxanac nache san ra ỹaqtac ra ʼam sanem ca naʼautec ra chegoqteuaʼa ye imaʼ ra aỹem caʼattaʼaguet ra sevireuo». Ñi Jehová naxaỹaxana so natamnaxac so Jefté nache itauan ra loxonec.

Coʼollaq so Jefté ỹiguelaxa ye lmaʼ nache aso ʼoonole llale caʼattaʼaguet so maye. Aso maye rasottac taq iuaxaatagui aso lasaquiaxanata. Nagui nache, ¿négueʼt ca ỹoʼot so Jefté? So maye ntoueetaʼac coʼollaxa so ỹanot ra lʼaqtac ñi Dios nache ʼenapec: «¡ʼAm ỹalole ỹataqta ltaʼaraic ra aỹem ʼauoʼotec ra ñiquiʼic! Chaʼaye sanot ra ỹaqtac ñi Jehová, qaq ra ipacchigui reʼera nache iuen ra ʼam samaxaua ra yaqtoʼ auonataxan añi npeʼl huaña ye Siló». Aso llale ỹasateguet: «ʼAm itaʼa ra mashe aỹanot ca ʼaraqtac ñi Jehová nache iuen ra aupacchigui. Ndotec ra ʼam seỹaxanot ra secategue na ñauochaxauapi ra saxaỹa na qasoxonaxapi iviraʼa caua dos caʼagoxoiqa. Lcopague reʼera nache saỹaʼa añi npeʼl». Aso llale so Jefté ỹachaxan ra huoʼo ra lpiỹaxac taq ronotaxatac huaña añi npeʼl ʼenauac na nachaalataxac. Soua nauochaxauapi namaqtega aso maye ʼenauac na viʼiyel.