Ñi Jehová remalle so Samuel

So ntaxaỹaxanec Elí huoʼo soua dos llalqaʼ: So Hofní taq Finehás. Soua maye taqaʼen ntaxaỹaxanecpi taq roʼonataxatac huaña añi npeʼl. Qalaxaye saishet ra ỹalaxaguet na lamaxasoxonaxac ñi Jehová taq saq iyaqnapec na shiỹaxauapi. Coʼollaxa so israelitapi irotauo na lachetaqtaxanaxac ỹanem ñi Jehová, so Hofní taq so Finehás nonaguet na ʼonaxaic lapat. So Elí ỹaỹaten ra soua llalqaʼ qauem ra lataxac, qalaxaye saishet ra nhuogaxalo. ¿ʼAm apetaʼa ra huoʼo ca ỹoʼot ñi Jehová?

Naicʼtaxa so Samuel ñaq nasa saq ʼenaʼam so Hofní taq Finehás. Ỹoqoʼoye ñi Jehová lauela ra lataxac so maye. Huoʼo so pe, so Samuel ñaq roʼocheta nache huaxaỹa so navilliaxac iaʼaxatega so maye. Ñishiguem nache taỹa so huetaʼa so Elí taq ʼenapec: «Mashe sotaʼa neʼena». Qalaxaye so Elí ỹasateguet: «Aỹem saishet ra ʼam seỹaxana. Ỹoltaxa ʼannaañi». So Samuel ỹoltaxa nnaañi. Qalaxaye so maye ỹoltaxa huaxaỹa so navilliaxac. Coʼollaxa so Samuel ỹoltaxa iviʼ so tercera ra huaxaỹa so navilliaxac nache so Elí nanomtaʼa ra ñi Jehová nacheñi ñi iaʼaxaatega so maye. Nache so Elí raʼaqtaxanem ra ltaxa huaxaỹa so navilliaxac taq iuen ra ỹasateguet: «Ña ʼautaqa Jehová, chaʼaye na ʼaramaxashec ʼam huaʼaqtega».

So Samuel ỹeʼeguelaxauo, nache nnalec so lmalaʼ taq huaxaỹa so navilliaxac: «Samuel, Samuel». So maye ỹasateguet: «Ña ʼautaqa Jehová, chaʼaye na ʼaramaxashec ʼam huaʼaqtega». Ñi Jehová ʼenapega: «Auaqtaxanem ca Elí ra sauoʼo ca nhuanaxaguec ca maye taq ca lauolecpi. Ca maye mashe ỹaỹaten na ỹoʼotaq qauem na llalacpi qalaxaye saishet ra nhuogaxalo». So lỹa naʼaq so Samuel ỹauatic soua lasom aso npeʼl, ʼenaʼam ʼenauac na naʼaxaʼte. So maye huoʼo ra l-lliaxa ra iaʼaxatem so lʼaqtac ñi Jehová so ntaxaỹaxanec. Qalaxaye so Elí iaʼaxana so maye taq inat: «¡ʼAm ỹalcolec, Samuel! ¿Ca ʼeetec ca lʼaqtac ñi Jehová?». Nache so Samuel raʼaqtaxanem ʼenauac.

So Samuel nquictasheguem ra llaxa taq ñi Jehová quetaʼ ra nauochaxaua so maye. ʼEnauac so israelitapi, ỹaỹateeta ra ñi Jehová lcaʼagui so Samuel ra yaqtoʼ lʼaqtaxanaxanec taq ra nmit na nasouaxashet.