Ñi Jehová ỹanem ra laʼañaxac so Sansón

Qalota so israelitapi ỹoltaxa ỹioʼoxoren na diospi saq ʼeesa. Ỹoqoʼoye ñi Jehová ỹaneguet so shiỹaxauapi lmaʼ ye Filistea ra ỹoʼotec ca qauem so mayepi. Qalaxaye huoʼo so saq ʼamaqtac israelitapi ỹauotec ñi Jehová, ʼenaʼam so Manóah. So maye taq aso lhua qaica ca llalacpi. Huoʼo so naʼaq ñi Jehová ỹamaq so lamaxashec ángel ra yaqtoʼ ỹaqtaxanem aso lhua so Manóah: «Huoʼo qome ca ʼaỹaʼalec ra ncaʼalaxateguesop ca israelitapi. Ca maye nache nazareo». ¿ʼAm auaỹaten négueʼt coʼollaxa neʼena nazareo? Nacheca ca shiỹaxaua qaiỹotauga ra qoỹanot ñi Jehová taq saishet ra qaichec na laue.

Lcopague ñiguiñe so llalec so Manóah nache qaỹanagui Sansón. Coʼollaq so mashe ỹe, ñi Jehová ỹanem ỹataqta ltaʼaraic ra laʼañaxac. ¡Ishet ra ỹalaut ca sauaxaic ỹahuotaʼa naua lhuaq! Huoʼo so naʼaq, so maye ỹalauat soua 30 filisteopi, ʼoonolec qaica ca itauan. Ỹoqoʼoye so mayepi ỹataqta nquiaʼa taq huotaique ỹaỹaten ca ʼeetec ra qaỹalauat so maye. Huoʼo so pe, so Sansón roʼocheta netaña ye Gaza. Nache so mpaxaguenaxauapi taỹa yeʼeye nache huetaña so lasom ye ciudad taq nauatalec iviraʼa ra yoxoñe yaqtoʼ qaỹalauat so maye. Qalaxaye so laiñi so pe so Sansón ñisheguem, taỹa ye lasom ye ciudad nache nqat. Lcopague ỹasaxalec na lallac nache irosheguema na pasheguem añi qasoxonaxa saqaỹapeque ye Hebrón.

Lcopague soua filisteopi taỹa ra remalle aso nauonaxaua so Sansón, lʼenaxat Dalila taq ʼenapega: «ʼAm sanaxam ca qalota plata ra alalec táʼaencoʼ ra ỹataqta ltaʼaraic ra laʼañaxac so Sansón. Chaʼaye huotaique qoroxonec taq secoñeraqaiʼ». Aso Dalila huotaique ỹaconguet aso plata, nache nasheeta. Huaʼauñe, so Sansón saishet ra huotaique raʼaqtaxanem aso Dalila chaq ỹachoxotague reʼera lañaxac. Qalaxaye aso maye sa ỹalemaxat taq saq ỹaxañi ra inattoʼot nache so Sansón nasamñe ỹoqoʼoye imatoʼot lquiyaqteỹaxac ra raʼaqtaxanem. So maye ʼenapec: «Saishet ra qaichec na ỹaue chaʼaye aỹem nazareo. Ra qaichec na ỹaue nache qaica qome reʼera ltaʼaraic ỹaʼañaxac». Ỹataqta saỹaỹamaxañi ra so Sasón ỹaʼaqtaxanem reʼera aso Dalila, ¿ʼeesa?

Nache aso Dalila raʼaqtaxanem soua filisteopi: «¡Nagui mayaʼ mashe saỹaten!». Aso maye ỹoʼochaqchet so Sansón naʼaxaataleguete naua lchel taq iaʼaxana so ʼoonolec ỹale ra ichec so laue. Nache aso Dalila ỹaʼalaxalec: «¡Na filisteopi netaina!». So maye nlouec qalaxaye nanomtaʼa ra qaica ca laʼañaxac. Nache so filisteopi ỹaconeuaʼa so maye nqat naua laʼaiʼte taq qaiqoñerai.

Huoʼo so naʼaq qalota so filisteopi laponaʼt huaña so templo som natamnaxala lʼenaxat Dagón. So mayepi nasaxauec: «Na qanatamnaxala dios qomiʼ ỹanem na Sansón. Qancachiuec ca Sansón yaqtoʼ saʼashaxanaq ca maye». Qanachaalataxaataña soua dos lauoqtel taq qaỹinai so maye. So Sansón iỹaxanot ñi Jehová: «ʼAm ñachoxonnot ra ỹoltaxa aỹem auanem ca ỹaʼañaxac». So maye, mashe ltaxa ñaxat na laue, nache naʼañaxat ra ỹamaxariñe soua dos lauoqtel. Nache huaʼaxañi naqaʼen aso maye taq ỹalauat ʼenauac so netaña yeʼeye. Taqaʼen ileu so Sansón.