So huaʼauchiguiñe ntaʼa ye Israel

Ñi Jehová mashe ỹanem so israelitapi so shiỹaxauapi nmit na nasouaxashetpi yaqtoʼ ỹauecaʼaguet qalaxaye so mayepi huotaique ra huoʼo ca ntaʼa. Ỹoqoʼoye qoinapega so Samuel: «ʼEnauac na qarhuoreuapi huoʼo na ntaʼa ỹoqoʼoye qomiʼ taqaʼen sauoqtaique». So Samuel ỹataqta saỹaỹamaxaren reʼera. Nache natamenot ñi Jehová, ñi maye ỹasateguet: «Na pueblo saishet ra ʼam ỹoʼotan, na mayepi aỹem ỹoʼotan. Auaqtaxanem ra ishet ra huoʼo ca ntaʼa qalaxaye ca maye qalota ca iỹaxanaique». Naicʼtaxa reʼera so mayepi ʼenapec: «¡Qomiʼ sauoqtaique ca qartaʼa!».

Nache ñi Jehová ʼenapega so Samuel ra huoʼo ca ỹale lʼenaxat Saúl nache ca maye huaʼauchiguiñe ntaʼa. Coʼollaq so Saúl nqoʼona so Samuel ye ʼalhua Ramá, nache so Samuel ungió so maye, ra icorelec na lqaic na aceite reʼera naigui ra so maye lcaʼaguishec ñi Jehová yaqtoʼ ntaʼa.

Lcopague, so Samuel laỹonat so israelitapi yaqtoʼ ỹachaxaneguet so ralaxaic ntaʼa. Qalaxaye saishet ra qaỹanata so maye. ¿Auaỹaten táʼaencoʼ? Chaʼaye so maye nqañoxottaigui so ñaʼacpi. Huaña so qaỹanata nache qaỹauegueuaʼa so laiñi som netaña so pueblo. So maye qaica ca napacalec ra lalogaxa taq ỹataqta ʼonaxaiqolec. So Samuel ʼenapec: «¡Ten, na lcaʼaguishec ñi Jehová!». Coʼollaq so shiỹaxauapi ilaʼa seʼeso ntaʼa nache ỹataqta machiguiñe.

Huaʼauñe, so ntaʼa Saúl ỹalaxaguet ñi Jehová taq so Samuel. Qalaxaye lcopague naralaxat. Huoʼo so naʼaq, so Samuel maye lʼaqtaxanaxanec ñi Jehová, ʼenapega so Sául ra iuataʼaguet so maye yaqtoʼ ỹoʼot ca lachetaqtaxanaxat. So Saúl saishet ra ishet ra ỹoʼot reʼera. Qalaxaye so Samuel qaỹaloqteguet nache so Saúl ỹoʼot so lachetaqtaxanaxat. ¿Négueʼt ca ỹoʼot so Samuel? So maye ʼenapega: «¿Táʼaencoʼ ra saishet ra aualaxaguet ñi Jehová?». So Saúl, ¿petaʼa ỹapaxaguenec reʼera ra iuen ra saxaỹet ỹalaxaguet ñi Jehová?

Lcopague, so Saúl taỹa ra relogui so amalequitapi, taq so Samuel ʼenapega ra iuen ra ỹalauat ʼenauac qaica ca noʼonaxatañe. Qalaxaye so Saúl noʼonaxatañe so ntaʼa Agag. Nache ñi Jehová ʼenapega so Samuel: «Aỹem ỹalat so Saúl, mashe saishet ra aỹem ỹalaxaguet». So Samuel ỹataqta itoxoñe taq ʼenapega so Saúl: «Ñi Jehová lcaʼagui ca ralaxaic ntaʼa chaʼaye ʼam mashe saq aualaxaguet». Coʼollaq so Samuel ncolliñi ra jec, nache so Saúl ỹaconaʼague na laỹe so lapoʼ taq ỹoʼot ra colaqaʼague. So Samuel ʼenapega so Saúl: «Reʼera qonetec nagui, nache ʼeetec ñi Jehová ra ncolaxatauec ra aroʼonataxanaxac». Reʼera naigui ra ñi Jehová ỹanem reʼera noʼonataxanaxac ca lỹa shiỹaxaua ra yoqtaʼ ʼeesa ỹalaxaguet taq ỹauotec ñi maye.