So David taq Saúl

Lcopague so David ra ỹalauat so Goliat, nache so ntaʼa Saúl ỹanem ra lataxala so nalleppi. So David qalota so loxonecpi taq reʼera ỹataqta ỹaỹamaxareta na shiỹaxauapi. Ra saxaỹet ñiguelac chegaqaʼa so alaataxac nache aso ʼalpi caʼattaʼaguet so mayepi nache dasottagui taq doʼonaxaatagui: «So Saúl ỹalauat so mil ỹalleppi qaq so David ỹalauat so diez mil». Ỹoqoʼoye so Saúl ỹataqta huoʼo ra lquiỹaxa taq huotaique ỹalauat.

So David ỹaỹaten ra iviigui na nvique arpa. Huoʼo so naʼaq so maye nachaatauaʼa so Saúl iviitapigui aso nvique nache so ntaʼa ỹasaq aso laraxanaqte. Qalaxaye so David dasheʼeguet aso maye. Taq aso laraxanaqte nonaigui so nỹec. Nache so Saúl ỹoltaxa qalota huotaique ỹalauat so maye. So David ratauec taq nqalloxojñi huaña ye ʼalhua tojlec.

Nache so Saúl taq 3.000 nalleppi iqanapec so maye. So Saúl taigui so auac ra nqalloxojñi, so maye sa ỹaỹaten ra taqaʼen huetaigui so David taq ỹalleppi chaʼaye saishet ra ilaʼa. So ỹalleppi so David ʼenapega nchetac na lʼaqtac: «Nagui ishet ra aulauat ye Saúl». So David nchetauaʼa so Saúl yaqtoʼ saishet ra nanomtaʼa taq icheguec so lapo laỹi. Qalaxaye so David ntoxotac chaʼaye so ntaʼa, lcaʼaguishec ñi Jehová. Ỹoqoʼoye saq ỹashenem so nalleppi ra huoʼo ca ỹoʼotec so maye. Coʼollaq so Saúl paʼauec, nache so David naxanec so lʼaqtac: «Aỹem ishettaxa ra ʼam salauat qalaxaye saishet ra soʼot». Naicʼtaxa reʼera so Saúl queʼeta ra iqatac so maye.

Nache huoʼo so pe so David taq so lasoshec lʼenaxat Abisái nchetauaʼa so huetaña so Saúl taq qaica ca nanomalo soua maye. So Abner, maye ilotegue so Saúl, roʼocheta. So Abisái ʼenapega so David: «¡Nagui ishet ra soʼotaq, aỹem auashetem ra salauat!». Qalaxaye so David ỹasateguet: «Ñi Jehová maiche huapegue. ʼOnaxaic taxa ra ʼauacona aca laraxanaqte taq ca ñomaxaqui, nache qolac».

So David quisheguemec aso qasoxonaxa maye saqaỹapeque. Huaña ye paʼasheguem nache ishet ra ilaʼa ye huetaña so Saúl. So David naxanec so lʼaqtac: «¡Abner! ¿Táʼaencoʼ saishet ra ʼam paxajlec ye ntaʼa? ¿Chaq netaʼague aca laraxanaqte taq ca ñomaxaqui?». So Saúl ỹauaton na lavilliaxac so David taq ʼenapega: «ʼAm ishettaxa ra aỹem aualauat qalaxaye saishet ra auoʼot. Nagui saỹaten ra ʼam ralaxaic ntaʼa ye Israel». Nache so Saúl iguelaxa ye lmaʼ. Qalaxaye saishet ra ʼenauac so lauolecpi so Saúl, nquiaʼa so David.