PAXAGUENAXAT 26

¿Táʼaencoʼ huoʼo na qauemsat qataq ra nqueʼejnaxac na shiỹaxauapi?

Edición impresa

Ra huoʼo ca huaigui ca qauemsat, qalota na shiỹaxauapi nnajlaʼt: «¿Táʼaencoʼ?». Qomiʼ ñitonaqtapeguec ra ana la Biblia ỹasateguet neʼena nnataxac.

1. ¿ʼEetec so Satanás coʼollaxa ỹachaigui na qauemsat ana ʼalhua?

So Satanás nacheso so Diablo npaʼagueneʼ ñi Dios. Somaye huotaique ra ramaxasoxoolec so laỹipi, ỹoqoʼoye roʼonataxanguilo soua huaʼauchiguiñe shiỹaxauʼ, so Adán taq aso Eva, yaqtoʼ taqaʼen soua maye npaʼagueneʼ ñi Dios. Ỹañoxot reʼera chaʼaye ỹatenachet aso Eva (Génesis 3:1-5). Ỹanaigui ra lcuennataxac asomaye ra ñi Jehová ỹoxojñi cam noʼon. Somaye huotaique ra qaiʼamaqten ra na shiỹaxauapi ỹactec ra machiguiñi ra sa ỹalaxaguet ñi Dios. Coʼollaq so Satanás ỹan so huaʼauñe natenataxanaxac chaʼaye ʼenapega aso Eva ra saishet ra ileu. Ỹoqoʼoye aye la Biblia ʼenapec ra somaye «ỹataqta tenataxanaxaic, qataq nachiso so ltaʼa da natenataxanaxac» (Juan 8:44, TBSNT).

2. ¿Négueʼt ca lcauaʼa so Adán taq aso Eva?

Ñi Jehová qalota so ỹanema so Adán taq aso Eva, chaʼaye ỹataqta chitaqtaxanaxaic. Ñimaye ʼeetega ra ishet ra chec nam ỹottaʼaʼt ʼepaq ala huaigui so mataxaqui Edén, qalaq ʼoonole so sa ỹashenem (Génesis 2:15-17). Qalaxaye soua maye lcaʼagui ra chec aso ʼepaq ala. Aso Eva «nqat aso ʼoonole ala asomaye nache chec». Qaq ime nache so Adán «nataqaʼen chec» (Génesis 3:6). Nache soua maye sa ỹalaxagueta ñi Dios. Coʼollaxa so Adán taq aso Eva nalochiguiñe, ỹoʼoqoye maiche ra lalamaxat soua maye ỹoʼot ca ỹaỹamaqchiguiñe. Qalaq soua maye maiche lcaʼauʼa ra sa ỹalaxagueta ñi Dios, ra ỹoʼot reʼera nache huoʼo ra lleʼetaxaloxo qataq ỹachaxan ra sa nashenguet ra lamaxasoxonaxac ñi Dios. Reʼera lcaʼauʼa ỹoʼot ra ỹaguec ra nqueʼejnaxac soua maye (Génesis 3:16-19).

3. ¿ʼEetec ra qomiʼ ivirauga so lcaʼauʼa so Adán taq aso Eva?

Coʼollaxa so rpeʼenaxan so Adán taq aso Eva nache saq nalochiguiñi ra lataxac, qataq ỹachalec reʼera npeʼenaxac ʼenauac na llalaqpi. Ra qaimalligui so Adán, aye la Biblia ʼenapec: «Da huaʼauchiguiñi nasouaxashet ana ʼalhua chegoqchigui so Adán coʼollaq sa ỹalaq. Nache chegoqchigui deʼera nasouaxashet da yoʼoq da nleuaxa ana ʼalhua. Qaq chaʼaye ʼenauac da huoʼo da lasouaxashet, nache ʼenauac nataqaʼen da ileu namayepi» (Romanos 5:12).

Nache, ¿táʼaencoʼ huoʼo ra qanqueʼejnaxac? Huoʼo naxa chaʼaye ra saỹaỹamaxañi ra llicaʼaxagui qoʼ taqaʼen ra saỹaỹamaxañi ca ỹoʼot ca laỹipi shiỹaxauapi qataq huoʼo ye huaña huoʼo ra qanqueʼejnaxac chaʼaye ʼenauac qomiʼ huoʼo ye naʼaq ra qomiʼ nvita ca noʼon qataq ca qauem (ʼautaxaỹaxan Eclesiastés 9:11).

ÑIMITAQ RA PAXAGUENAXAT

Semetenaq táʼaencoʼ ra saishet ñimaxasoxolec ñi Dios na qauemsat qataq na queʼejnaxacpi huetaigui ana ʼalhua qataq ʼeetec ra lquiyaqteỹaxac ñimaye ra qomiʼ ilaʼa ra huoʼo ra qanqueʼejnaxac.

4. Na ỹasouaxat na qanqueʼejnaxac

Qalota na shiỹaxauapi iʼamaqten ra ñi Dios ramaxasoxootac ʼenauac ana ʼalhua. QaIaxaye, ¿ʼeesa reʼera? Qaumichiñi na VIDEO.

VIDEO: ¿Négueʼt ca ramaxasoxootac ana ʼalhua? (1:24)

Qautaxaỹaxañi Santiago 1:13 qataq 1 Juan 5:19, qataq qaumalligui neʼena:

¿Lasouaxashet ñi Dios na nqueʼejnaxacpi qataq ra qauemsat?

5. Ra taỹaʼa ra lamaxasoxonaxac so Satanás

Qaumichiñi na VIDEO.

VIDEO: ¿Táʼaencoʼ ñi Dios ỹasheetec ra queʼejnaxac? (fragmento) (3:07)

Qautaxaỹaxañi Génesis 3:1-6 qataq qaumalligui neʼena:

¿ʼEetec ra latenataxanaxac so Satanás? (Semetenaq ye versículos 4 taq 5).
¿ʼEetec naua lʼaqtaqa roʼogoxona so Satanás yaqtoʼ ra qaiʼamaqten ra ñi Jehová ỹoxojñe cam noʼon na shiỹaxauapi?
¿Négueʼt soua lʼaqtaqa roʼogoxona so Satanás yaqtoʼ ra qaiʼamaqten ra na shiỹaxauapi saishet ra iuen ra lamaxasoxonaxac ñi Jehová yaqtoʼ machiguiñi?

Qautaxaỹaxañi Eclesiastés 8:9, qataq qaumalligui neʼena:

Queuoigui na viʼiyel ra ñi Jehová saishet ra ramaxasoxootac ana ʼalhua, ¿négueʼt na hualecna shiỹaxauapi?

Na imagenpi maye ỹachaxan ra huaigui ana ʼalhua chigoqchigui so ỹoʼot iviraʼa ca Mataxaqui: A. So ltaʼaraic mataxaqui. B. Na gobiernopi na shiỹaxauapi queuoigui na viʼiyel nlaxalec ana ʼalhua na saq ʼeesa nʼamaqtenaxacpi, nsoʼorache, alaataxacpi qataq na naʼaqchet ana ʼalhua. Ỹachaxana so ltaʼaraic na gobiernopi qaỹaloqnaxana: Egipto, China, Grecia, Roma, Gran Bretaña y Estados Unidos. C. Shiỹaxauapi huetalec ana ʼalhua qomchiye mataxaqui.

So Adán taq aso Eva nalochiguiñi qataq lmaʼ so mataqaʼ. Qalaxaye ỹalaxaguet so Satanás nache paʼaguenec ñi Jehová.
Ra ime ra mpaʼaguenec ñi Dios nache ʼenauac ana ʼalhua talec ra nasouaxashet, nqueʼejnaxac qataq ra nleuaxa.
Ñi Jehová nlaxajñi ra nasouaxashet, nqueʼejnaxac qataq ra nleuaxa. Nache na shiỹaxauapi ỹeʼeguelaxa ra nalochiguiñi qataq lmaʼ ca mataqaʼ.

6. Ñi Jehová iuet ra huoʼo ra qanqueʼejnaxac

¿Ỹoqochaʼa ñi Dios ra huoʼo ra qanqueʼejnaxac? ʼAmeten na ỹiriñe so ntaʼa David taq so apóstol Pedro. Qautaxaỹaxañi Salmo 31:7 qataq 1 Pedro 5:7, qataq qaumalligui neʼena:

Ñi Jehová ỹaỹaten ra qanqalanaxacpi qataq iuet ra huoʼo ra qanqueʼejnaxac, ¿ʼeetec ca ʼarquiyaqteỹaxac ra ʼauaỹaten reʼera?

7. Ñi Dios ỹapalaxat na nqueʼejnaxacpi ʼenauac na shiỹaxauapi

Qautaxaỹaxañi Isaías 65:17 taq Apocalipsis 21:3, 4, qataq qaumalligui neʼena:

Ñi Jehová ỹachaxanapec ra ỹapalaxat ʼenauac na ỹoʼot ra nqueʼejnaxac na shiỹaxauapi qataq ỹaỹamaxajñe ʼenauac na qauemsat. ¿ʼAm iʼañaqchet reʼera qaỹachaxanapec? ¿Táʼaencoʼ?

ʼAmeten ra

So huaʼauñe latenataxanaxac so Satanás, ỹasaxalec so qauem lʼaqtac ñi Jehová. Reʼera naigui ra nshepaxanaqchet ra lataxac qoʼ lʼenaxat ñimaye, so nasaxauec ỹoʼot ra na shiỹaxauapi iʼamaqten ra saishet ra ntaʼa soxoraic taq ỹaỹamaqchiguiñi. Yaqtaʼa ra ñi Jehová ỹapalaxat na nqueʼejnaxac na shiỹaxauapi nache maiche iuejlec ra lʼenaxat qoʼ iquitaxaqchet. Reʼera naigui ra ñi Dios ỹachaxanapec ra reʼera lʼonataxanaxac qaica ca ʼenaʼam. Ra iuejlec ra lʼenaxat ñi Jehová ỹataqta ỹactec ra ʼamaqtaqaic ʼenauacna (Mateo 6:9, 10, TBSNT).

HUOʼO NA NASAXAUEC RA: «Ñi Dios qomiʼ ỹoʼot yaqtoʼ huoʼo ra qanqueʼejnaxac».

¿Négueʼt ca ʼanasaxauec ʼam?

NA ʼAMAQTAQAIC

So Satanás qataq soua huaʼauchiguiñe shiỹaxauʼ nacheso soua lasouaxashet na qauemsat huetalec ana ʼalhua. Ñi Jehová iuet ra huoʼo ra qanqueʼejnaxac qataq yaqtaʼa ra ỹapalaxat ra queʼejnaxac.