Nache huoʼo ca llalec iuataʼaguet

So Abrahán taq aso Sara mashe qalota viʼiyel ra huaronaʼt. Soua maye ỹalat so ỹataqta ʼonaxaic lmaʼ netaña ye Ur ra yaqtoʼ netaigui na lpeʼl. Qalaxaye aso Sara saishet ra ipettega so lmaʼ chaʼaye ipiʼiỹa ñi Jehová.

Aso Sara ỹataqta huoʼo ra lyaxa ra huoʼo ca llalec nache ʼenapega so Abrahán: «Ra añi ilata Agar taq ʼam ra huoʼo ca aỹalec nache ishet ra huoʼo ca ỹalec chigoqchigui añi maye». So lcopague aso Agar huoʼo so llalec nache qaỹanagui ra lʼenaxat Ismael.

So lcopague so qalota viʼiyel so Abrahán iviʼi coʼollaxa so 99 viʼiye ra nachaalataxac taq aso Sara 89 viʼiye, huoʼo soua tres shiỹaxauʼ namaqtega soua maye. So Abrahán qocheguet soua maye ra yaqtoʼ nmatec netoʼot aso qoipac taq ra lquiaxaua. ¿Négueʼt seʼesoua shiỹaxauʼ? Soua maye angelpi. Soua maye ʼenapega so Abrahán: «Na lỹa viʼi huoʼo ca aỹalec ʼam taq aso arhua». Aso Sara naxaỹaxaategalo netaigui ñi lpeʼl, so huaqchigui seʼeso nasaxauec nache paỹauo ra laỹalliguiyec taq nnataxateguelat: «Aỹem ỹataqta ỹaxainole, ¿petaʼa ishet ra huoʼo ca ỹalec?».

So lỹa viʼi aso Sara huoʼo so llalec ipacchigui so nasaxauec so lamaxashec ñi Jehová. Nache so Abrahán ỹanagui ra lʼenaxat Isaac, seʼeso lʼenaxat naigui «naỹalliguiyec».

Coʼollaxa so Isaac iviʼi so cinco viʼi ra lañaxataxac, nache aso Sara ilaʼa ra so Ismael ỹienai so maye. Aso maye huotaique ra mpaxajlec so llalec nache ʼenapega so Abrahán: «Auorauec añi Agar taq so Ismael». Huaʼauñe so Abrahán salauela. Qalaxaye ñi Jehová taqaʼen huotaique mpaxajlec so Isaac, nache ʼenapega so Abrahán: «Anaxaỹaxana ra lʼaqtac aso Sara. Aỹem selogue so Ismael, qalaq na sachaxanapecpi iuen ra ipacchigui ra chigoqchigui so Isaac».