So Abrahán taq aso Sara ỹalaxaguet ñi Dios

Saqaỹapeque ye Babel huoʼo ye lỹa ciudad lʼenaxat Ur. Ye maye na shiỹaxauapi saishet ỹioʼoxoren ñi Jehová ndotec ra ỹioʼoxoretac na ỹottaʼaʼt ndiospi. Qalaxaye huoʼo so shiỹaxaua lmaʼ ye Ur lʼenaxat Abrahán, so maye ỹioʼoxoretac ñi Jehová.

Ñi Jehová ʼenapega so Abrahán ʼeeta: «qocaʼai ana ʼalhua taq na arhuolecpi ra yaqtoʼ ʼanqoʼona yem ʼalhua maye ʼam sachaxana qome». Lcopaʼague ñi Dios ỹachaxanapeguem: «Chigoqchigui qome cam ʼam chegoxoguetpi, ra sauoʼo ca qalota shiỹaxauapi. Taqaʼen ra sanem ra ỹaỹamaxatchiguiñi ʼenauac na shiỹaxauapi ana ʼalhua».

So Abrahán saỹaỹaten ca huotaique ỹamaxague ñi Jehová qalaxaye ipiʼiỹa ñi maye. So Abrahán, aso lhua Sara, so ltaʼa Taré taq so lasoshec Lot ỹalaxaguet ñi Dios. So mayepi naỹamaxat nache qaʼai ye lmaʼ, jec taỹa ye qaỹoqta qaỹamaxague.

So Abrahán taq so lauolecpi iviraʼa ye ʼalhua maye ỹanem ñi Jehová, coʼollaxa so maye iviʼ 75 viʼiyel ra nachaalataxac. Seʼeso ʼalhua lʼenaxat Canaán. Huaña yeʼeye ñi Jehová ỹachaxanapeguem ʼeeta: «Neʼena ʼalhua mashe aualletaʼa nachena na sanem qome ca aỹalacpi». Qalaxaye so Abrahán taq aso Sara mashe ỹaxaiquiolqa taq qaica ca llalaqpi. Ỹoqoʼoye, ¿ca ʼeetec ra ipacchigui so ỹachaxanapec ñi Jehová?